Swahili Bible2

18

1KANDI Daudi akabara omuhendo gwabantu abakaba bali nauwe, yataho engabwa ezenkumi nengabwa ezebikumi okubalema. 2Daudi yasindika abantu, ekicweka ekyakasatu omu mukono gwa Yoabu, nekicweka ekyakasatu omu mukono gwa Abisai mutabani wa Zeruya, mugenzi wa Yoabu, ekicweka ekyakasatu omu mukono gwa Itai Omugiti. Omukama yagambira abantu ati Mazimakwo nanyowe ndaramaga hamu nainywe. 3Baitu abantu bagamba ngu Toramaga iwe: baitu itwe obuturairuka tibatuteho mutima; rundi nobuturafaho ekicweka kyaitu tibatuteho mutima: baitu iwe halitwe noingama nkakakumi omuhendo: nukwo hati bunu ekikira oburungi, oyetekaniza okutujumura noruga ha rubuga. 4Omukama yabagambira ati Ekimurasima nikyo ndakora. Omukama yayeme’ra ha rubaju rwomusango’ro, nabantu bona baturuka bikkumi kandi enkumi. 5Omukama yaragira Yoabu na Abisai na Itai nagamba ati Mumukwate mpora habwange omusigazi ogu Abusalomu. Abantu bona bakahu’ra omukama obuyaragire engabwa zona ebya Abusalomu. 6Nukwo abantu baramaga omu bwe’re okurwana na Isareri” obulemu bwabaho omu kibira kya Eferaimu. 7Kandi abantu ba Isareri bakabingwa omu maiso gabairu ba Daudi, habaho ha kiro eki okuita kwingi abasaija bukumi bubiri. 8Baitu obulemu bukahika ensi yona: nekibira kyalya abantu baingi ha kiro eki okukira abaisirwe busitama. 9Kandi Abusalomu yaitirana abairu ba Daudi atamanyire. Kandi Abusalomu akaba atembere enyumbuye, enyumbu yaraba hansi yamatagi egomuti omuhango omuhomozi, omutwegwe gwakwata ha muhomozi, yahimbwa omu mwanya hagati haiguru na hansi: enyumbu eyakaba atembere yagenda omu maiso. 10Omuntu yakibona yatebeza Yoabu nagamba ati Dora, mboine Abusalomu ahanikirwe omu muhomozi. 11Yoabu yagambira omusaija ogu ayamutebize ati Kandi dora, oboine eki, waba ki okumutera hansi? Nkukuhaire ebicweka ebyefeza ikumi kandi nomweko. 12Omusaija yagambira Yoabu ati Nobunkuhairwe ebicweka ebyefeza rukumi omu ngaro zange, nyowe tinkwenzire okugo’ra omukono gwange hali omwana womukama: baitu omu kuhu’ra kwaitu omukama aragire iwe na Bisai na Itai nagamba ati Mwerinde omuntu wena aleke okukora ha musigazi Abusalomu. 13Baitu kakuba nakozire ebyebisubi okuita obwomezibwe (kandi tiharoho kigambo ekiserekerwe omukama) iwe wenka wakunyehogere. 14Yoabu yagamba ati Tindikusobora okuikaraho nti naiwe. Yatwara emposo isati omu mukono gwe yazicumisa Abusalomu omu mutima obwakaba akiri omwomezi omunda yomuhomozi. 15Kandi abasigazi ikumi abakwataga ebyokurwanisa bya Yoabu bamwehinguliriza Abusalomu bamutema bamuita. 16Yoabu yatera engwara, abantu bagaruka nibaleka okuiruki’ra Isareri: baitu akatanga abantu. 17Kandi batwara Abusalomu bamunagaomu kina ekikoto ekyomu kibira, bamutumaho omutumo gwamabale omukoto muno: kandi Isareri yona bairuka bataha omuntu wena omu hemaye. 18Lero Abusalomu akatwara yayeyimukiza wenka enyomyo, enyakuli omu kihanga kyomukama: baitu akagamba ati Tinyina mwana okuijukyaga ibara lyange: yaruka enyomyo ibaralye wenka: nikyetwa kiijukyo kya Abusalomu nokuhikya hati. 19Kandi Ahimaazi mutabani wa Zadoki akagamba ati Leka nyiruke hati bunu ntwekere omukama Amakuru MUKAMA okwamuholire enzigu ha banyanzigwabe. 20Yoabu yamugambira ati Iwe totwale amakuru ekiro kinu, baitu hati totwale amakuru, baitu omwana womukama afire. 21Kandi Yoabu yagambira Omukusi ati Genda otebeze omukama ebyoboine. Omukusi yainamira Yoabu yairuka. 22Nubwo Ahimaazi mutabani wa Zadoki yagaruka okugambira Yoabu omurundi ogwakabiri ati Baitu leka nanyowe nyiluke nkuratire Omukusi. Yoabu yagamba ati Noyendera ki okuiruka, mwana wange, baitu totunge empera yamakuru? 23Baitu nobukiraba kiti, nyowe nyiruke. Yamugambira ati Iruka. Kandi Ahimaazi yairuka omu muhanda Gwekyeya, yatangisa Omukusi. 24Kandi Daudi akaba aikalire hagati yemiryango ebiri: omulinzi yatemba ha rusu rwirembo yahika ha muhuruzi, yaimukya amaisoge yarora, kandi dora, omuntu nairuka ali wenka. 25Omulinzi yayami’ra yatebeza omukama. Omukama yagamba ati Obwaraba ali wenka buli alesere amakuru. Yaija bwango yai’ra haihi. 26Omulinzi yarora omuntu ondi nairuka: omulinzi yateta omukumirizi nagamba ato Doara, omuntu ondi nairuka ali wenka. Omukama yagamba ati Nauwe alesere amakuru. 27Omulinzi yagamba ati Nintekereza nti okuiruka kwowokubanza nukusisana nkokuiruka kwa Ahimaazi mutabani wa Zadoki. Omukama yagamba ati Musaija murungi ogu, alesere amakuru amarungi. 28Ahimaazi yayeta yayami’ra nagambira omukama ati Mirembe. Yainama omu maiso gomukama najumara nagamba ati Akugizibwe MUKAMA Ruhanga wawe, baitu ahaireyo abasaija abaimukize emikono yabu mukama wange omukama. 29Omukama yagamba ati Omusigazi Abusalomu aliyo kurungi? Ahimaazi yagarukamu ati womukama, nyowe omuiru wawe, mboinege okujaga’ra kwingi, baitu mbaire ntarukumanya amakuru. 30Omukama yagamba ati Wekube oyeme’raho. 31Yayekuba yayeme’raho. Kandi dora, Omukusi yaija; Omukusi yagamba ati Ndetire mukama wange omukama amakuru: baitu MUKAMA akuholire enzigu ha kiro kinu halibo bona abakuimukirire. 32Omukama yagambira Omukusi ati Omusigazi Abusalomu aliyo kurungi. Omukusi yagarukamu ati Abanyanzigwa ba mukama wange omukama, na bona abakuimuki’ra okukukora kubi, babe nkomisigazi ogu okwali 33Omukama yasalirwa muno, yatemba ekisika ekiri haiguru ha irembo ya’ra: kandi obuyatembere yagamba ati Ai, Mwana wange, mwana wange Abusalomu! Kakuba nyowe nkuferire, Abusalomu mwana wange, mwana wange!