Swahili Bible2

17

1KANDI Ahitoferi akagambira Abusalomu ati Kankomemu hati bunu abasaija kakumi mwenkumi ibiri, nyimuke mpondere Daudi ekiro kinu: 2ndamuhikaho ajwahire nengaroze zitanyina amani, ndimutinisa: nabantu bona abali nauwe barairuka: kandi ndatema omukama wenka: 3kandi ndaga’raho abantu bona namberoli: omusaija oworukuse’ra bwarafa buli bona bagarukire: abantu bona baliba nobusinge. 4Ekigambo eki kyasimwa muno Abusalomu, nabakuru bona aba Isareri. 5Kandi Abusalomu yagamba ati Mwete na Husai Omwaraki, tuhu’re kandi ekyaragamba. 6Husai obuyaizire hali Abusalomu, Abusalomu yabaza nauwe nagamba ati Nukwo Ahitoferi agambire ati: turakora nkekigambokye okukiri? Obukiraba kitalikyo, iwe ogambe. 7Husai yagambira Abusalomu ati Amagezi Ahitoferi agacwire hati bunu tigali marungi. 8Kandi Husai yagamba ati Iwe omanyire ’so nabasaijabe, baba basaija emanzi, basalirwe omutima, nkedubu eyomu kisaka enyakuihirweho obwana bwayo: kandi ’so aba omusaija omurwani, tarukugonya omu Bantu. 9Dora hati araba ayeserekere omu kina, rundi omu kiikaro kindi: kandi kirahika abantu abae oboburaba bagwire okubanza, wena akihu’ra aragamba ati Haroho kuitwa omuli abo abagenda na Abusalomu. 10Kandi nogu owobumanzi, nomutimagwe guli nkomutima gwentale, elihwe’ra kimu: baitu Isareri yona bamanyire ’so aba musaija wamani, nabo abali nauwe basaija emanzxi. 11Baitu nyowe ncwire nti Isareri yona basorozebwe hamu namberoli, okuruga Dani nokuhikya Beerisaba, nkomusenyi oguli ha musa gwenyanja obwingi; kandi nti iwe wenka ogende aramage. 12Nukwo tulimuhikaho omu kiikaro mbere alisangwa, kandi tilimugwera nkorume okurugwa hansi: kandi haluwe na ha basaija bona abali nauwe titulisigaho nomu. 13Kandi, obwaliba atahire omu rubuga omunda, nubwo Isareri yona baliretera orubuga oru emiguha, kandi turirucundira omu kyambu okuhikya hatalizokerayo kabala na kamu. 14Abusalomu nabasaija bona ba Isareri bagamba ngu Amagezi ga Husai Omwaraki nigakira oburungi amagezi ga Ahitoferi. Baitu MUKAMA akaba ataireho okuita magezi amarungi aga Ahotoferi, nukwo MUKAMA aletere Abusalomu akabi. 15Kandi Husai yagambira Zadoki na Abyasara banyakatagara ati Nukwo ati Ahitoferi ahaire Abusalomu amagezi nabakuru ba Isareri; nanyowe nukwo muhaire nti. 16Nukwo hati bunu tuma bwango, mutebeze Daudi muti Otagonya ekiro kinu ha myogo yirungu; baitu okwambuka mwambuke; omukama aleke okumirwa, nabantu bona abali nauwe. 17Kandi Yonsani na Ahimaazi bakasigara haihi Neni-rogeri; kandi omuzana yagendaga nabatebeza; bo baturukaga nibatebeza omukama Daudi: baleke okurorwa nibataha ha rubuga. 18Baitu omwojo akababona, yatebeza Abusalomu: bo barugayo bwango bombi, bakaija hali enju yomusaija omu Bahurimu, kandi ogu akabayina eziba omu zigatiye; nuho basirimukira. 19Kandi omukazi yakwata ekifundikizo yakita ha kanwa kiiziba, yayanjaraho engano ehonzere; kunu busaho kigambo ekyamanyirwe. 20Abairu ba Abusalomu bakaija hali omukazi omu nju; nibagamba ngu Bali nkaha Ahimaazi na Yonasani? Omukazi yabagambira ati Bambukire akamu kamaizi. Kandi obubabaseruire nibabura, bagarukayo Yerusalemu. 21Kyahika bo obubamazire okugenda batebeza omukama Daudi; bagambira Daudi ngu Muimuke mwambuke amaizi bwango: baitu nukwo Ahitoferi abacwerire ati amagezi. 22Daudi yaimuka nabantu bona abakaba bali nauwe, bayambuka Yorudani: obuire obubwahikire nyenkya hatasigaleho nomu atarayambukire Yorudani. 23Kandi Ahitoferi obuyaboine ati tibakuratire amagezige, yatandika enkainaye, yaimuka yayegendera omuka hali orubugarwe, yasemeza ebyenjuye, yayehanika; yafa, kandi yazikwa omu kituro kya ise. 24Kandi Daudi akaija Mahanaimu. Abusalomu akambuka Yorudani, uwe nabasaija bona aba Isareri hamu nauwe. 25Kandi Abusalomu akafora Amasa omukuru wihe omu kiikaro kya Yoabu. Kandi Amasa akabali mwana womusaija ibaralye nuwe Itura Omuisareri, ayatahire hali Abigali omuhara wa Nahasi, munyanya Zeruya nyina Yoabu. 26Isareri na Abusalomu bakatema orukande omu nsi ya Gireadi. 27Kandi kyahika Daudi obuyaizire Mahanaimu, Sobi mutabani wa Amyeri owa Lodeba na Bazilai Omugireasi 28owa Rogelimu, bakaleta ebitabu, nengano na sayiri nensano, nebicoli, nebihimba, nenkole 29namacande, nobwoki, namagita, nentama, namata agente agomere, habwa Daudi nabantu abakaba bali nauwe okulyaho: baitu bakagamba ngu Abantu bayina enjara, kandi bajwahire, kandi bakwasirwe iroho omu irungu.