Swahili Bible2

14

1KANDI Yoabu mutabani wa Zeruya akabona omutima gwo mukama guli hali Abusalomu. 2Kandi Yoabu yatuma Tekoa, yaihayo omukazi wamagezi yamugambira ati Nkwesengerize, oyefole nkanyakuferirwe, ojwale ebyokujwara ebyokuferwa nkwesengerize, kunu otesiga amagita, baitu foka nkomukazi amazire ebiro bingi nali’ra abafu: 3Kandi otahe hali omukama, obaze nauwe nkebigambo binu okubiri. Kandi Yoabu yamuherera ebigambo okugamba. 4Omukazi owa Tekoa obuyabalize nomukama, yagwa hansi ajumaire naramya nagamba ati Juna, omukama. 5Omukama yamugambira ati Obaire ki? Yagarukamu ati Mazimakwo ndi mukazi omufakati, iba nyowe afire. 6Omuzana wawe akabanyina abana babiri, abo bombi barwana omu musiri, tihabaho muntu okubabaganizamu, baitu omu akatema ondi yamuita. 7Kandi, dora bona abomunju egi baimukirire omuzana wawe nibagamba ngu Leta ogu ayatire mugenziwe, tumuite habwobwomezi bwa mugenziwe ouyaisire, nukwo hahwerekereze omugwetwa nauwe: nukwo baliraza omu’ro gwange ogusigaireho, tibalisigira iba nyowe ibara nobukyakuba ekiijukyo hansi yona. 8Omukama yagambira omukazi ati Genda omunju yawe, nanyowe ndiragira ebigambo byawe okubiriba. 9Omukazi owa Tekoa yagambira omukama ati Mukama wange omukama, okutahiki’ra kube hali nyowe, na ha nju ya isenyowe: omukama akire omusango nekitebekye ekyokubukama. 10Omukama yagamba ati Omuntu wena obwalikugambira ekigambo omulete namberendi, taligaruka okukorakoraho obundi. 11Nubwo yagamba ati Nkwesengerize omukama aijuke MUKAMA Ruhanga wawe, omuhozi wenzigu ezesamaga atagaruka okuhwerekereza, aleke okuhwerekereza omwana wange. Yagamba ati Nka MUKAMA okwali omwomezi, tihaligwa hansi akasoke komwana wawe na kamu. 12Omukazi yagamba ati Leka, nkwesengerize, omuzana wawe agambe ekigambo hali mukama wange omukama. Yagamba ati Gamba. 13Omukazi yagamba ati Nukwo, kiki ekikukoleze ekigambo ekiingaine kiti ha Bantu ba Ruhanga? Baitu ha obwagambire nasisana nkanyakuyina omusango, baitu omukama taga’ra omuka owe ouyabingire. 14Baitu itwe kituhikirire okufa, kandi tuli nkamaizi agasesekere hansi, agatasobora okutahwa; kunu Ruhanga taihaho bwomezi, baitu acwa amagezi, anyakubingirwe aleke okuikara ali omuiruki namberali. 15Nukwo hati bunu nikyo nyizire okugambira ekigambo kinu mukama wange omukama, baitu abantu bantinisize: omuzana wawe akagamba ati Hati bunu ndabaza nomukama; rundu ndabaza nomukama; rundi omukama arakora eki omuzanawe ekyasabire. 16Baitu okuhu’ra omukama arahu’ra, okujuna omuzanawe omu mukono gwomusaija ogu arukwenda okuhwerekereza nyowe nomwana wange ahamu. Omu bugwetwa bwa Ruhanga. 17Nubwo omuzana wawe yagamba ati Leka, nkwesengerize, ekigambo kya mukama wange omukama kibe kyokuhumuza: baitu nka maraika wa Ruhanga nukwo mukama wange omukama ali okwetegeraza ebirungi nebibi: kandi MUKAMA Ruhanga wawe abe naiwe. 18Omukama yagarukamu yagambira mukazi ati Otansereka, nkwesengerize, kigambo kyona ekindakukaguza. Omukazi yagamba ati Mukama wange omukama agambe. 19Omukama yagamba ati Omukono gwa Yoabu guli naiwe omu bigambo binu byona? Omukazi yagarukamu nagamba ati Nkobwomezi bwawe okubuloho, mukama wange omukama, busaho asobora okuhabira ha mukono gwobulyo nobuhokuba ha mukono gwemoso okuruga ha kigambo kyona omukama ekyagambire: baitu omuiru wawe Yoabu nuwe andagire, kandi nuwe ataire ebigambo binu byona omu kanwa komuzana wawe: 20okuhindura ekigambo okukisisana nikyo omuiru wawe Yoabu akolire ekigambo kinu: kandi mukama wange wa magezi, nkamagezi agamaraika wa Ruhanga, okumanya byona ebiri omu nsi. 21Omukama yagambira Yoabu ati Dora ’nu, nkozire ekigambo kinu: nukwo ogende, oga’re omusigazi Abusalomu. 22Yoabu yagwa hansi ajumaire, yaramya, yasabira omugisa omukama: Yoabu yagamba ati Hati bunu omuiru wawe amanyire mboine embabazi omu maiso gawe mukama wange omukama, baitu omukama akozire eki omuiruwe ekyamusabire. 23Nukwo Yoabu yaimuka, yagenda Gesura, yaleta Abusalomu Yerusalemu. 24Omukama yagambaati Ahindukire enjuye wenka, baitu aleke okurora amaiso gange. Nukwo yahindukira enjuye wenka, tiyabona amsiso gomukama. 25Lero, omu Isareri yona hakaba hataruma nomu asimibwa oburungibwe okuingana na Abusalomu: okuruga ha mara gekigere okuhikya ha ruhorohozi rwomutwegwe tiharoho kamogo. 26Kandi obuyayemwanga omutwegwe, (kandi omwaka gwona obugwahwahoga yayemwanga: baitu isoke l likamujwahya, nikyo yayemweraga) yalengaga isoke aryaha mutwegwe sekeri bikumi bibiri, nkekirengo kyomukama okukiri. 27Kandi Abusalomu akazara abana abojo basatu nomuisiki omu, ibaralye nuwe Tamali: akabali mukazi omurungi ha maiso. 28Kandi Abusalomu yaikarayo Yerusalemu emyaka ebiri ehikire: tiyabona maiso gomukama. 29Kandi Abusalomu yatumira Yoabu, yamusindika agende hali omukama; baitu yayanga okuija namberali: yagaruka okumutumira omurundi ogwakabiri, baitu yayanga okuija. 30Nikyo yagambire abairube ati Murole, omusiri gwa Yoabu guherire ogwange, kandi anyina sayiri oku; mugende mugyokye nomu’ro. Abairu ba Abusalomu bayokya omusiri nomu’ro. 31Nubwo Yoabu yaimuka yaija hali Abusalomu omu njuye, yamugambira ati Abairu bawe bokize ki omusiri gwange? 32Abusalomu yagarukamu Yoabu ati Dora, nkakutumira nti Ija hanu nkutume hali omukama okugamba oti Kiki ekyanyihire Gesura? Kyakubaire kirungi nyowe okuikarayo na hati hona: nukwo hati bunu leka ndole amaiso gomukama; haraba haroho okusisa omulinyowe, anyite: 33Kandi Yoabu yaija hali omukama yamutebeza: kandi obuyayesere Abusalomu, yaija hali omukama, yainamya amaisoge hansi omu maiso gomukama: omukama yanywegera Abusalomu.