Swahili Bible2

13

1KANDI kikahika enyuma yebi, Abusalomu mutabani wa Daudi akabanyina munyanya omurungi ha maiso, ibaralye nuwe Tamali, kandi Amunoni mutabani wa Daudi akamugonza. 2Amunoni yatuntura muno nokurwara narwara habwomunyanya Tamali; baitu akabali muisiki atamanyire musaija, kandi kikamulema Amunoni okumukora kigambo. 3Baitu Amunoni akabanyina enganjanie ibaralye nuwe Yonadabu, mutabani wa Simeha mugenzi wa Daudi: kandi Yonadabu akabali omusaija wenkurungutaniza. 4Yamugambira ati Kiki ekirukukwanura kiti obukyabukya, iwe omwana womukama? Torukuntebeza? Amunoni yamugambira ati Ningonza Tamali munyanya mugenzi wange Abusalomu. 5Yonadabu yamugambira ati Byama ha kitabu kyawe, oyefole omurwaire:’so obwaliija okukorora omugambire oti Leka munyanya nyowe Tamali aije, nkwesengerize, ampereze ebyokulya, acumbe ebyokulya omu maiso gange, mbirole, mbirire omu ngaroze. 6Nukwo Amunoni yabyamire ati nayerwaza: kandi omukama obuyaizire okumurora, Amunoni yagambira omukama ati Leka munyanya nyowe Tamali aije nkwesemgerize, anzumbire emigati ebiri omu maiso gange, ndire omu ngaroze. 7Daudi yatuma omuka hali Tamali nagamba ati Genda hati bunu omu nju ya Amunoni munyanyoko, omucumbire ebyokulya. 8Nukwo Tamali yagenda omu ju ya Amunoni munyanya; kandi akaba abyamire. Yatwara ensano yagibumba, yakora emigati omu maisoge yayokya emigati. 9Yatwara ekikarango yagiihura omu maisoge; baitu yayanga okulya. Amunoni yagamba ati Abasaija bona baruge namberendi. Bamurugaho abasaija bona. 10Amunoni yagambira Tamali ati Leta ebyokulya omu kisika, ndire omu ngaro zawe. Tamali yatwara emigati eyiyacumbire yagireta omu kisika hali Amunoni munyanya. 11Baitu obuyagiirize hali uwe agiryeho, yamukwataho, namugambira ati Ija obyame nanyowe munyanya nyowe. 12Yamugarukamu ati Nangwa munyanya nyowe, otaswaza; baitu ekigambo ekiingana kiti tikihikikirire okukorwa omu Isareri: leka okugira obutami bunu. 13Nanyowe nditwara nkaha ensoni zange? Naiwe olifoka nkomu wabadomadoma omu Isareri. Nukwo hati bunu, nkwesengerize, baza nomukama; baitu talikunyima. 14Baitu yayanga okuhu’ra irakalye: baitu okuba wamani okukira uwe yamuhamba yabyama nauwe. 15Nubwo Amunoni yamunoba okunoba kwingi muno: baitu okunoba okuyamunobere kukakira obwingi okugonza okuyamugondeze. Amunoni yamugambira ati Imuka ogende. 16Yamugambira ati Nangwa, baitu ekibi kinu ekikoto ekyorukunkora nombinga nikikira kiri ekyonkozire, Baitu tiyayenda kumuhu’ra. 17Kandi yayeta omuherezawe ayamuherezaga nagamba ati Binga omukazi onu namberendi, okinge oruigi enyumaye. 18Kandi uwe akaba ajwaire orugoye orwemiringo mingi nyingi: baitu nukwo bajwaraga bati abahara bomukama abatamanyire musaija. Omuherezawe yamuturukya, yakinga oruigi enyumaye. 19Tamali yata iju ha mutwegwe, yatemura ekyokujwarakye ekyemiringo nyingi ekyakaba ajwaire; yayetweka emikono yayegendera, nayamuza nagenda. 20Kandi Abusalomu munyanya yamugambira ati Amunoni mugenzi wange aikare naiwe? Baitu hati bunuculera, munyanya nyowe: nuwe munyanyoko; leka okukitaho omuntima ekigambo eki. Nukwo Tamaliyaikaraho omu nju ya Abusalomu munyanya atanyina iba. 21Baitu omukama Daudi obuyahulire ebigambo ebi byona yakwatwaekiniga kingi. 22Abusalomu atabaze na Amunoni nobukyakuba ekirungi nobu kyakuba ekibi: baitu Abusalomu akanoba Amunoni, habwokuhamba Tamali munyanya. 23Kandi kikahika emyaka ebiri ehikire obuyahinguireho Abusalomu akabanyina abasazi bebyoya byentama omu Baalihazora eherire Eferaimu: Abusalomu yayeta abana bomukama bona. 24Kandi Abusalomu yaija hali omukama yagamba ati Dora ’nu omuiru wawe anyina abaszi bebyoya byentama; nkwesengerize omukama nabairube bagenda nomuiru wawe. 25Omukama yagambira Abusalomu ati Nangwa mwana wange, tuleke okugenda itwena, tutajunwahya. Yamuhambiriza: baitu yayanga okugenda, baitu yamusabira omugisa. 26Nubwo Abusalomu yagamba ati Oraba oyangire oti, lema mugenzi wange agende naitwe. Omukama yamugambira ati Kiki ekiramutwara naiwe? 27Baitu Abusalomu yamuhambiriza, nukwo yalekera Amunoni nabana bomukama bona bagende naiwe. 28Abusalomu yaragira abairube nagamba ati Murole muno omutima gwa Amunoni obuguraba gusemerirwe amarwa; obundabagambira nti Muteme Amunoni, nubwo muramuita muleke okutina: nyowe timbaragire? Mugume omutima, mube emanzi. 29Abairu ba Abusalomu bakakora Amunoni nka Abusalomu okuyaragire. Nubwo abana bomukama bona baimuka, omuntu wena yatemba enyumbuye yairuka. 30Kandi kyahika obubakaba bali omu muhanda, ebigambo byahika obubakaba bali omu muhanda, ekigambo byahika hali Daudi ngu Abusalomu aisire abana bomukama bona, tihasigaireho nomu. 31Omukama yaimuka yatemura ebyokujwara bye, yabyama hansi; abairube bona bayeme’raho ebyokujwarabya byabu bitemukire. 32Kandi Yonadabu mutabani wa Simeha mugenzi wa Daudi yagarukamu nagamba ati Mukama wange aleke okutereza ati baisire abasigazi bona abana bomukama; baitu Amunoni wenka nuwe afire: baitu omu kutekereza kwa Abusalomu nukwo yamalirire ati okubandiza ha kiro ekiyahambiremu Tamali munyanya. 33Nukwo hati bunu mukama wange omukama aleke okubihi’rwa ekigambo eki natekereza abana bona bomukama afire; baitu Amunoni wenka nuwe afire. 34Abusalomu yairuka. Omusigazi ogu akaba nalinda, yaimukya amaisoge yarora, kandi dora, hakaija abantu baingi nibajja barugire omu muhanda gwa ha rusozi enyumaye. 35Yonadabu yagambira omukama ati Dora abana bomukama baizire: nkomuiru wawe okwagambirege nukwo kibaire kiti. 36Kandi kyahika obuyalekere okugamba baija, baimukya amakuru gabu niba’ra: nomukama nabairube bona ba’ra muno. 37Baitu Abusalomu yairuka yagenda hali Talimai mutabani wa Amihuru omukama wa Gesura. Daudi yali’ra omwanawe obukyabukya. 38Nukwo Abusalomu yairukire ati yagenda Gesura, yaikarayo emyaka esatu. 39Obwomezi bwomukama Daudi bwayegomba okurugayo okugenda hali Abusalomu: baitu akahumura ebya Amunoni, baitu uwe akaba afire.