Swahili Bible2

5

1KANDI Naamani, engabwa eyihe lyomukama wa Aramu, akabali omusaija omukuru hali mukamawe, kandi wekitinisa, baitu habwogu MUKAMA akaha Aramu okusingura: kandi akabali omusaija wamani emanzi, baitu akabali omugenge. 2Kandi Abaramu bakaramaga ebihanfa, banyaga omu nsi ya Isareri omuisiki omuto; ogu yaherezaga mukazi wa Naamani. 3Yagambira amugolewe ati Kuba mukama wange abaire ali na nabi anyakuli omu Samaliya! aba amukirize ebigengebye. 4Omuntu yataha nagambira mukamawe ati nukwo omuisiki agambire ati owomu nsi ya Isareri. 5Omukama wa Aramu yagamba ati leka, ndatweka ebaruha hali omukama wa Isareri. Yarugayo yatwara etaranta zefeza ikumi. 6Kandi yaleta ebaruha hali omukama wa Irareri, erulugamba eti Ebaruha enu obwerikahika namberoli, dora ntumire omuiru wange Naamani namberoli, omutambire ebigengebye. 7Kandi kikahika omukama wa Isareri obuyamazire okusoma ebaruha, yatemura ebyokujwarabye, nagamba ati / ninyowe Ruhanga, okuita nokufora omwomezi, omuntu onu okutuma namberendi okutambira omuntu ebigengebye? Baitumutekereze, mbesengerize, murole okwase’ra hokukunganira nanyowe. 8Kandi kyahika, erisa omusaija wa Ruhanga obuyahulire omukama wa Isarei atemuire ebyokujwarabye, yatuma hali omukama nagamba ati Kiki ekikutemuize ebyokujwara byawe? Leka aije namberendi hati bunu, kandi aramanya okuharoho nabi omu Isareri. 9Nukwo, Naamani yaija nembarasize negalize, yayeme’raho ha mulyango gwenju ya Erisa, 10Kandi Erisa yatuma omukwenda haluwe nagamba ati genda oyoge emirundi musanju omu Yorudani, kandi omubiri gwawe guragarukaho namberoli, kandi orasemezebwa. 11baitu Naamani yabihirwa, yarugaho nagamba ati Mazimzkwo araturuka namberendi, nayeme’raho nakunga ibara lya MUKAMA Ruhangawe narabyarabya omukonogwe hali orufu, nakiza ebigenge. 12Abana na Fapa, ebyambu bya Damasiko, tibirukukira oburungi amaizi gona agomu Isareri? Tinsobora okwoga omu nokusemezebwa? Nukwo yakubuka yarugaho abihirwe. 13Abaherezabe bai’ra haihi bamugambira ngu Tata, kakuba nabi akurabirire ekigambo ekikoto, iwe tokukikozire? Nukwookukira muno obwakugambira ati Yoga osemezebwe? 14nubwo yasirimuka, yayibika omu Yorudani emirundi musanju, nkomusaija wa ruhanga okuyagambire: omubirigwe gwagarukaho, nkomubiri gwomwana omuto, yasemezebwa. 15Yagaruka hali omusaija wa ruhanga, uwe nekitebekye kyona, yaija yayeme’ra omu maisoge: yagamba ati Dora, hati bunu manyire nyi Busaho Ruhanga omu nsi zona, rundi omu Isareri honka:nukwo nkwesengerize, ikiriza okutwara ekisembo kyomuiru waew. 16baitu yagamba ati Nka MUKAMA okwali omwomezi oudukweme’ra omu maisoge, timpabwe kantu. Yamwesengereza okukihabwa; baitu yayanga. 17Naamani yagamba ati Oraba oyangire, ikiriza nkwesengerize, nyowe omuiru wawe mpabwe itaka nkerihimbwa enyumbu ibirir; baitu okuruga hati omuiru wawe tahongege ekihongwa ekyokeze, nobukyakuba ekyonzira hali abacwezi abandi, rundi hali MUKAMA wenka. 18Ekigambo kini MUKAMA akiganyire omuiru wawe; mukama wange obaragendaga omu nju ya Rimoni okuramiza omu na yesigama ha mukono gwange, nanyowe ninyinamira omu nju ya Rimoni, MUKAMA aganyirege omuiru wawe omu kigambo kinu. 19yamugambira ati Genda nobusinge. Nukwo yamurugaho nagenda omwanya omuke.

20Baitu Gehazi omuhereze wa Erisa omusaija wa ruhanga yagamba ati Dora, mukama wange aganyire naamani onu Omwaramu, obwatahairwe omu mukonogwe eki ekyalesere: nka MUKAMA okwali omwamezi ndamuiruki’ra, muiheho ekintu. 21Nukwo gehazi yakuratira Naamani. Kandi Naamani obuyaboine omuntu namuiruki’ra enyuma, yaruga omu gali okumuitirana, yagamba ati harungi? 22yagamba ati Harungi. Mukama wange antumire nagamba ati dora, hati bunu haizirege namberendi abasigazi babiri abomu bana ba banabi, narugire omu nsi yensozi eya Eferaimu; obahe, nkwesengerize etaranta yefeza nemijwaro emirundi ebiri. 23Naamani yagamba ati Ikiriza, otwale etaranta ibiri. Yamuhambiriza, yaboha etaranta ibiri ezefeza omu nsahu ibiri, nemijwaro emisundi ebiri, yabitweka abairube babiri; babyetweka omumaisoge. 24Kandi obuyaizire hali orusozi, yabiiha omu ngaro zabu, yabyahura omu nju: yayohereza abasaija, bagenda. 25Baitu uwe yatahamu, yayeme’ra omu maiso ga mukamawe. Erisa yamugambira ati Norugankaha Gehazi? Yagmba ati Omuiru wawe tagenzire hantu. 26Yamugambura ati Omutima gwange tigugenzire ha galiye okukuitirana? Kanu niko kasumi kokuheramu efeza nebyokujwara, nemisisri eyemizeitumi, neyemizabibu, nentama, nente, nabairu, nabazana? 27Nikyo ebigenge bya Naamani biragumiraga haliwe na hali abaijukuru bawe ebiro byona. Kandi yaruga omu maisoge ali omugenge nayera nkebirika.