Swahili Bible2

24

1OMU birobye Nebukadeneza omukama wa Baburoni akaija, kandi Yehoyakimu yafoka omuiruwe emyaka esatu: nubwo yahinduka yamwemera. 2MUKAMA yatuma okurwana nauwe ebihanda Byabakalidaya, nebihanda bya Abasura, nebihanda bya Abamoabu, nebihanda byabana ba Amoni, yabatuma hali Yuda okugihwerekereza, nkekigambo kya MUKAMA okukiri ekiyagambire habwomukono gwabairube banabi. 3Mazimakwo habwekiragiro kya MUKAMA eki kyaija hali Yuda, okubaihaho omu maisoge, habwebibi bya Manase, nka byona ebiyakozire okubikaba biri; 4kandi habwesagama etaloho musango eyiyasesere; baitu akaijuza Yerusalemu nesagama etaloho musango: MUKAMA yayanga okuganyira. 5Kandi ebigambo ebindi ebya yehoyakimu na byona ebiyakozire, tibihandikirwe omu kitabu kyebyomu businge bwabakama ba Yuda? 6Nukwo Yehoyakimu yagwijagira nabaisenkurube: kandi yehoyakini mutabaniwe yalema omu kiikarokye. 7Omukama wa Misiri atagaruke okurugayo omu nsiye wenka: baitu omukama wa Baburoni akaba anyagire, okuruga ha kambu ka Misiri okuhikya ha kyambu Furati, byona ebikaba biri byomukama wa Misiri. 8Yehoyakini akaba ahikize emyaka ikumi na munana hayabandize okulema; yalemera amezi asatu omu Yerusalemu: ibara lya nyina nuwe Nehusita omuhara wa Erinasani owa yerusalemu. 9Yakora ekibi omu maiso ga MUKAMA, nka byona ise ebiyakozire okubikaba biri. 10Omu biro ebi abairu ba Nebukadeneza omukama wa Baburoni bakaija Yerusalemu, orubuga rwagotwa. 11nebukadeneza omukama wa Baburoni yaija hali orubuga, abirube obubakaba nibarugota; 12yehoyakini omukama wa Yuda yaturuka yaija hali omukaa wa Baburoni, uwe na nyina nabairube: omukama wa Baburoni yamunyaga omu mwaka gwobusingebwe ogwa munana. 13Kandi akaihayo ebikwato byona ebyomu nju ya MUKAMA, nebikwato ebyomu nju yomukama, yasaramu ebicweka ebintu byona ebyezabu Sulemani omukama wa Isareri ebiyakozire omu yekaru ya MUKAMA, nka MUKAMA okuyagambire. 14Kandi yasengura yerusalemu yona, nabakuru bona, nabasaija bona abamani abobumanzi, abasenurwa kakumi, nabafundi bona, nabahesi: hatasigalebo nomu, rundi abanaku bonka abomu Bantu abensi. 15Yatwara Yehoyakini Baburoni; nanyinomukama, nabakazi bomukama, nabakonwabe, nabasaija abakuru bomu nsi, yabasengura nabaiha yerusalemu nabatwara Baburoni. 16Nabasaija bona abamani, abantu kasanju, nabafundi nabahesi rukumi, bona bamani bamanyire okurwana, abo omukama wa Baburoni akabasengura yabaleta Baburoni. 17Omukama wa Baburoni yafora Mataniya mugensi wa ise omukama omu kiikarokye, yahindura ibaralye zedekiya.

18Zedekiya akaba ahikize emyaka amakumi abiri mu gumu hayabandize okulema; yalemera emyaka ikumi na gumu omu Yerusalemu: ibara lya nyina nuwe Hamautali omuhara wa Yeremiya owa Libuna. 19Yakora ekibi omu maiso ga MUKAMA, nka byona Yehoyakimu ebuyakozire okubikaba biri. 20Baitu habwekiniga kya MUKAMA kikahiki’ra omu Yerusalemu na Yuda, okuhikya obuyababingire omu maisoge: kandi Zedekiya yayemera omukama wa Baburoni.