Swahili Bible2

23

1OMUKAMA yatuma, basoroleza namberali abakuru bona aba Yuda naba Yerusalemu. 2Omukama yatemba omu nju ya MUKAMA, nabasaija bona abomu Yerusalemu hamu nauwe, na nabanyakatagara, nabanabi, nabantu bona, abato nabakuru: yasoma omu matu gabu ebigambo byona ebyekitabu kyekiragano ekyazoirwa omu nju ya MUKAMA. 3Omukama yayame’ra ha rututi, yaragana omu maiso ga MUKAMA, Okukuratira MUKAMA, nokukwata ebiragirobye, nebiyamanyisize, nebiyataireho, nomutimagwe gwona nobwemezibwe bwona, okugumya ebigambo ebyekiragano kinu ebyahandikirwe omu kitabu eki: nabantu bana baye’ra ha kiragano. 4Kandi omukama yaragira Hirikiya nyakatagara omukuru wabu, nabanyakatagara abomulingo ogwakabiri, nabakumirizi baturukye omu yekaru ya MUKAMA ebintu byona ebyakolirwe Baali na Asera, niho ryona eryahaiguru: yabyokeze aheru ya Yerusalemu omu iswa lya Kideroni, yatwara Iju lyabyo Beseri. 5Kandi yaihaho banyakatagara bebisisani, abakama ba Yuda ababataireho okwetera emyami’ro omu biikaro ebirahire ebyomu mbuga za Yuda, nomu biikaro ebyahe’raine na Yerusalemu; nabo aboyote’raga emyami’ro Baali, nizoba, nokwezi, nenyunyuzi, nihe ryona eryahaiguru. 6Kandi yaiha Asera omu nju ya MUKAMA, yagitwara aheru ya Yerusalemu ha kambu Kideroni, yagisamba yagicucura yanaga ecucu yayo ha bituro byabana babantu. 7Kandi yasesa enju zabakuhya, abakaba bali omu nju ya MUKAMA, nambere abakazi barukiraga Asera ebikingyo. 8Kandi yaiha banyakatagara bona omu mbuga za Yuda, yasisa ebiikaro ebiraihire nambere banyakatagara bayote’raga emyami’ro okuruga Geba nokuhikya Beeriseba; yasesa ebiikaro ebiraihire ebyamalembo agakaba gali ha mulyango gwirembo lya Yosuha omulemi worubuga, ebikaba biri ha Mukono gwemoso ha irembo eryorubuga. 9Baitu banyakatagara abebiikaro ebiraihire batatembe okuija hali ekyoto kya MUKAMA omu Yerusalemu, baitu bakalya emigati etatumbisibwe hamu na bagenzi babu. 10Kandi yasisa Tofeti eri omu kihanga kyabana ba Hinomu, omuntu wena aleke okurabya omwanawe rundi omwisiki omu mu’ro hali Moleki. 11Kandi yaihaho embarasi abakama ba Yuda ezabahaire izoba ha mulyango gwenju ya MUKAMA, ha kisika kya Nasani-meleki omukonwa, ekikaba nikihe’rana neyekaru; yayokya egali zizoba nomu’ro. 12Nebyoto ebikaba biri ha rusu rwekisika ekyoruguru ekya Ahazi, abakama ba Yuda ebibakozire, nebyoto Manase ebiyakozire omu zigati ibiri ezenju ya MUKAMA, omukama akabisesa, yabinaga hansi okubiihayo, yanaga ecucu yabyo omu kambu Kideroni. 13Nebiikaro ebiraihire ebikaba birolerire Yerusalemu, ebikaba biri ha rubaju rwobulyo orworusozi orwokujunda, Sulemani omukama wa Isareri ebiyayombekire Asitoresi ekinugwa kya Abazidoni, na Kemosi ekinugwa kya Moabu, na Mirikomi ekinugwa ekyabana ba Amoni, omukama akabisisa. 14Kandi yacwacwana amabale agaraihire, yatema Aserimu yaijuka ebiikaro byazo amagufa gabantu. 15Nekyoto ekikaba kiri Beseri, nekiikaro ekiraihire Yeroboamu mutabani wa Nebati ayasisize Isareri ekiyakozire, nekyoto eki nekiikaro eki ekiraihire yabinaga hansi; yayokya ekiikaro ekiraihire, yakisamba, 16Kandi Yosiya obuyahandikire yarora ebituro ebikaba biri omu rusozi oku;yatuma yaiha amagufa omu bituro, yabyokeza ha Kyoto, yakisisa, nkekigambo kya MUKAMA okukikaba kiri omusaija wa Ruhanga ekiyadumire, ayadumire ebigambo binu. 17Nubwo yagamba ati gasani yoha eyindukurora? Abasaija borubuga bamugambira ngu Nikyo kituro kyomusaija wa ruhanga, ayarugire omu Yuda, yaduma ebigambo ebi ebyokozire ha Kyoto kya Beseri. 18Yagamba ati Mumuleke; omuntu wena aleka okuihayo amagufage. Nukwo baleka amagufage, hamu namagufa ga nabi ayarugire Samaliya. 19Kandi nenju zona ezebiikaro ebiraihire ebikaba birir omu mbuga za Samaliya, abakama ba Isareri ebibakozire niberemera okubihiza MUKAMA, Yosiya akabiihaho, yabikora nka byona okubirir ebiyakozire omu Beseri. 20yaita na banyakatagara bona abebiikaro ebiraihire ebikaba biri oku, ha byoto, yayokya halizo amagufa gabantu; kandi yagaruka yarusalemu.

21Omukama yaragira abuntu bona nagamba ati Mulinde okuhingurwaho hali MUKAMA Ruhanga wanyu, / nkokukihandikirwe omu kitabu kinu ekyekiragano. 22Mazimakwo batalinde okuhingurwaho okwaingaine kuti okuruga ebiro byabacwi bemisango abacweraga Isareri emisango, nobuhokuba omu biro byona ebyabakama ba Isareri nobuhokuba ebyabakama ba Yuda; 23baitu omu mwaka gwa Yosiya ogwa ikumi na munana okuhingurwaho kunu kukalindwa hali MUKAMA omu Yerusalemu. 24Kandi abo abakaba nibabandwa emizimu, nabarogo, na terafimu, nebisisani, nebinugwa byona ebyaboinwe omu nsi ya Yuda nomu Yerusalemu, Yosiya akabiihaho agumye ebigambo ebyebiragiro ebyahandikirwe omu kitabu Hirikiya nyakatagara ekiyazoire omu nju ya MUKAMA. 25Kandi busaho mukama okumusisana ayamubandize ayahindukire MUKAMA nomutimagwe gwona ebya Musa okubikaba biri; kandi hanyumaye hataimuke ondi okumusisana. 26Baitu MUKAMA atahinduke okuleka ekiniga kyokubihirwakire Yuda habwokwerema kwona okwa Manase okuyamubihize. 27MUKAMA yagamba ati Na Yuda ndigiihaho omu maiso gange, nkokunaihireho Isareri, kandi ndinaga orubuga runu orunakomeremu, Yerusalemu, nenju eyinagambireho nti Ibara lyange lirabaga omu. 28kandi ebigambo ebindi ebya Yosiya, na byona ebiyakozire, tibihandikirwe omu kitabu kyebyomu businge bwabakama ba Yuda? 29Omu birobye Faraho-neko omukama wa Misiri akaramagira omukama wa Asura ha kyambu Furati: omukama Yosiya yagenda okumurwanisa; kandi yamuitira Megido obuyamuboine. 30Babairube bamuhimbire omu gali afire, bamuiha Megido, bamuleta Yerusalemu bamuzika omu kiturokye wenka. Abantu abensi batwara Yehoahazi mutabani wa Yosiya, bamusesaho amagita, bamufora omukama omu kiikaro kya ise. 31Yehoahazi akaba ahikize emyaka amakumi abirir mwesatu hayabandize okulema; yelemera amezi asatu omu Yerusalemu: ibara lya nyina nuwe Hamutali omuhara wa Yeremiya owa Libuna. 32Yakora ekibi omu maiso ga MUKAMA, nka byona baisenkurube ebibakozie okubiri. 33Kandi Faraho-neko akamuboha nensengo Ribura omu nsi ya hamasi, aleke okulema omu Yerusalemu; yacwera ensi omusoro ogwetaranta zefeza kikumi netaranta yezabu. 34Faraho-neko yafora Eryakimu mutabani wa Yosiya omukama omu kiikaro kya Yosiya ise, yahindura ibaralye yehoyakimu: baitu akaihaho Yehoahazi; yaija Misiri yaferayo. 35Kandi yehoyakimu yaha Faraho efeza omusoro okuleta erupiya nkekiragiro kya Faraho okukikaba kiri: yasoroza efeza nezabu habantu bensi, omuntu wena nkokuyacwerirwe, okugiha Faraho-neko. 36Yehoyakimu akaba ahikize emyaka amakumi abiri mwetano yahabandize okulema: yalemera emyaka ikumi na gumu omu Yerusalemu: ibara lya nyina nuwe Zebida omuhara wa Pedaya owa Ruma. 37Yakora ekibi omu maiso ga MUKAMA, nka byona okubiri baisenkurube ebibakozire.