Swahili Bible2

22

1YOSIYA akaba ahikize emyaka munana hayabandize okulema; yalemara emyaka amakumi asatu mu gumu omu Yerusalemu: ibara lya nyina nuwe Yedida omuhara wa Adaya owa Bozikasi. 2Yakora ebirungi omu maiso ga MUKAMA yagendera omu mumuhanda gwona ogwa Daudi isenkuru, tiyahabira ha Mukono gwobulyo nobuhokuba ha gwemoso.

3Kandi kikahika omu mwaka gwa Yosiya ogwa ikumi na munana, omukama yatuma Safani mutabani wa Ahaziya, mutabani wa Sarumu omukandiki, hali enju ya MUKAMA nagamba ati 4Genda hali Hirikiya nyakatagara, abale erupiya eziretwa omu nju ya MUKAMA, abakumirizi ezibasoroize omu Bantu: 5baziheyo hali omukono gwa bakozi bomulimo abarukurole’ra enju ya MUKAMA: bazihe abakozi bemirimo abali omu nju ya MUKAMA, basemeze okuseseka okwenju. 6hali ababaizi, na hali abambeki, na hali abakozi bamabale; nokugura emiti na mabale agatematemerwe okusemeza enju. 7Baitu batabale omuhendo nabo gwerupiya ezahairweyo omu Mukono gwabu; baitu bakakora nokwesigwa. 8Kandi Hirikiya nyakatagara omukuru wabu yagambira Safina omuhandiki ati Mboine ekitabu kyebiragiro omu nju ya MUKAMA. Hirikiya yaha Safina ekitabu, yakisoma. 9Safina omuhandiki yaija hali omukama, yamuletera ebigambo, yagamba ati Abairu bawe baihiremu erupiya ezasangirwe omu Mukono gwabakozi bemirimo abarukurole’ra enju ya MUKAMA. 10Safina omuhandiki yagambira omuhandiki ati Hirikiya nyakatagara ampaire ekitabu. Safina yakisoma omu maiso gomukama. 11Kandi kyahika, omukama obuyahulire ebigambo ebyomukitabu kyebiragiro, yatemura ebyokujwarabye. 12Omukama yaragira Hirikiya nyakatagara, na Ahikamu mutabani wa Safina, na Akibora mutabani wa Mikaya, na Safina omuhandiki, na Asaya omuiru womukama, nagamba ati Mugende, 13mukaguze ahali MUKAMA habwange, na habwabantu na ha bwa ba Yuda yona, ebyebigambo byekitabu kinu ekizoirwe: baitu ekiniga kya MUKAMA kingi ekitwakireho, baitu baisenkuru itwe batahu’re ebigambo ebyekitabu kinu, okukora nka byona okubiri ebyatuhandikirweho. 14Nukwo Hirikiya nyakatagara, na Ahikamu, na Akibora, na Safina, na Asaya, bagenda hali Hulida nyakatagara-mukazi, muka Sarumu mutabani wa Tikiva, mutabani wa Harahasi omujweki; (lero akaba naikara Yerusalemu omu kicweka ekya kabiri); bahanura nauwe. 15Yabagambira ati Nukwo agambire MUKAMA, Ruhanga wa Isareri ati Mugambire omusaija abatumirege namberendi muti Nukwo agambire MUKAMA ati Dora, 16ndireta akabi ha kiikaro kinu, na ha Bantu abamu, ebigambo byona ebyomu kitabu omukama wa Yuda ekyasomere: 17baitu bakanfuruka, bayote’ra emyami’ro abacwezi, nukwo bayereme okumbihiza no mulimo gwona ogwengaro zabu; nikyo ekiniga kyange kiryakira hali ekiikaro kinu, tikirirara. 18Baitu hali omukama wa Yuda abamutumirege okukaguza ahali MUKAMA, nukwo muramugambira muti Nukwo agambire MUKAMA, Ruhanga wa Isareri, ati ebyebigambo ebyohulire, 19baitu omutima gwawe gubaire norworoba, kandi wayebundaza wenka omu maiso ga MUKAMA, obwohulirege ebinagambire ha kiikaro kinu, kandi ha abantu abamu, nti balifika ekifuruka kandi omukyeno, watermura ebyokujwara byawe, wali’ra omu maiso gange; nanyowe nkuhulire, agambire MUKAMA. 20Nikyo dora, ndikusoloreza hali baswenkuru, kandi olitwarwa hali ekina kyawe nobusinge, kunu amaiso gawe tigalirora akabi kona akandiretera ekiikaro kinu. Bagaruka okuletera omukama ebigambo.