Swahili Bible2

13

1OMU mwaka gwa Yoasi mutabani wa Ahaziya omukama wa Yuda ogwamakumi abari mwesatu, Yehoahazi mutabani wa Yehu yabanza okulema Isareri omu Samaliya, yalemera emyaka ikumi na musanju. 2Akakora ekibi omu maiso ga MUKAMA, yakuratira ebibi bya Yeroboamu mutabani wa Nebati ebiyasisize Isareri; atabirugemu. 3Ekiniga kya MUKAMA kyayakira Isareri, yabahayo omu mukono gwa Hazaeri omukama wa Aramu, nomumukono gwa Beni-hadadi mutabani wa Hazaeri ebiro byona. 4Yehoahazi yayesengereza MUKAMA, MUKAMA yamuhu’ra: baitu akarora okwerenge’rwa okwa Isareri, omukama wa Aramu okuyaberengerire. 5(MUKAMA yaha Isareri omujuni, kandi barugayo omu mukono Gwabaramu: abana ba Isareri baikaraga omu hema zabu nkomu biro byaira. 6Baitu bataruge omu bibi ebyenju ya Yeroboamu ebiyasisize Isareri, baitu babigenderamuga: kandi na Asera zikaikaraho omu Samaliya). 7Baitu atasigire Yehoahazi abantu, rundi abaha mbarasi amakumi atano negali ikumi nabasaija abagenda nebigere kakumi: baitu omukama wa Aramu akabahwerekereze, ya bafora nkecucu eya kuhura. 8Kandi ebigambo ebindi ebya Yehoahazi, na byona ebiyakozire, namanige tibihandikirwe omu kitabu kyebyomu businge bwabakama ba Isareri? 9Yehoahazi yagwijagira nabaisenkuru; bamuzika omu Samaliya: na Yoasi mutabaniwe yalema omu kiikarokye.

10Omu mwaka gwa Yoasi omukama wa Yuda ogwa makumi asatu mu musanju Yehoasi mutabani wa Yehoahazi akabanza okulema Isareri omu Salamiya, yalemera emyaka ikumi na mukaga. 11Akakora ekibi omu maiso ga MUKAMA;ataruge omu bibi byona ebya Yeroboamu mutabani wa Nebati ebiyasisize Isareri: baitu yabigenderamu. 12Kandi ebigambo ebindi ebya Yoasi na byona ebiyakozire namanige agayarwanisize na Amaziya omukama wa Yuda, tibihandikirwe omu kitabu kyebyomu businge bwa bakama ba Isareri? 13Yoasi yagwijagira nabaisenkuru: Yeroboamu yaika’ra ha kitebekye: Yoasi yazikwa omu Samaliya hamu nabakama ba Isareri.

14Lero Erisa akaba arwaire endwaraye eyamuisire: kandi Yoasi omukama wa Isareri Yasirimuka namberali yamuliri’ra nagamba ati Isenyowe, isenyowe egali za Isareri, nabaha mbarasi bayo! 15Erisa yamugambira ati Kwata obuta bwawe nengobe: yakwata obuta nengobe. 16Yagambira omukama wa Isareri ati Ta omukono gwawe ha buta: yataho omukonogwa. Erisa yata engaroze ha ngaro zomukama. 17Yagamba ati Kingura dirisa oburugaizoba: yalikingura. Nubwo Erisa yagamba ati Rasa: yarasa. Yagamba ati Engobe ya MUKAMA eyokusingura, engobe eyokusingura Aramu: baitu olitema Abaramu omu Afeki okuhikya obwolibahwerekereza. 18Yagamba ati Kwata engobe: yazikwata. Yagambira omukama wa Isareri ati Rasa hansi: yarasa emirundi esatu, yaleka 19Omusaija wa Ruhanga yamubihi’rwa, yamugamba ati Okurasire emirundi etano, rundi mukaga; nubwo wakutemere Aramu okuhikya obwoligihwerekereza: baitu hati bunu olitema Aramu emirundi esatu yonka.

20Erisa akafa, bamuzika. Lero ebihanda Byabamoabu bakaramagira ensi nambere omwakagubandiza. 21Kandi kyahika, obubakaba nibazika omuntu, dora bakarora ekihanda; banagaga omusaija omu kituro kya Erisa: omusaija obuyahikire ha magufa ga Erisa, ahonaho yahumbuka yayeme’ra nebigerebye.

22Kandi Hazaeri omukama wa Aramu akarenge’ra Isareri ebiro byona ebya Yehoahazi. 23Baitu MUKAMA akabagi’ra embabazi, yabataho omutima, habwekiraganokye na Ibrahimu, Isaka na Yakobo, tiyayenda okubahwerekereza, kunu atababinge omu maisoge nokuhikya hati. 24Hazaeri omukama wa Aramu yafa; na Bene-hadadi mutabaniwe yalema omukiikarokye. 25Kandi Yehoasi mutabani wa Yehoahazi yagaruka okuiha omu Mukono gwa Bene-hadadi mutabani wa Hazaeri embuga eziyaihire omu Mukono gwa Yehoahazi ise omu bulemu.

Yoasi akamutera emirundi esatu, yagara embuga za Isareri.