Swahili Bible2

6

1Nubwo Sulemani yagamba ati MUKAMA akagamba ati araikaraga omu muirima kasira. 2Baitu nyowe nkwombekire enju eyokuikaramu, ekiikaro kyawe ekyokuikaramuga ebiro byona. 3Omukama yahindura amaisoge, yasabira omugisa ekietebe kyona ekya Isareri bayeme’raho. 4Yagamba ati Aimwe MUKAMA, Ruhanga wa Isareri, ayagambire nakanwake na Daudi isenyowe, kandi akihikirize nomukonogwe, 5nagamaba ati Okuruga ebiro obunaire abantu bange omu nsi ya Misiri, ntegomboze orubuga omu nganda zona eza Isareri okwombekamu enju, ibara lyange liikaleyoga; kunu ntegomboze omuntu nomu okuba omukuru okulema abantu bange Isareri: 6baitu nyegomboize Yerusalemu, ibara lyange liikaleyoga; kandi nkegomboza Daudi okulema abantu bange Isareri. 7Lero kikaba kiri omu mutima gwa Daudi isenyowe okwombeka enju habwibara lya MUKAMA, Ruhanga wa Isareri. 8Baitu MUKAMA yagambira Daudi isenyowe ati Baitu kikaba kiri omu mutima gwawe okwomebka enju habwibara lyange, iwe okakora kurungi okuitikereza omu mutima gwawe: baitu 9nobukiri kiti, iwe otalyombeka enju; baitu omwana wawe aliruga omu nda yawe, nuwe alyombeka enju habwibara lyange. 10Kandi MUKAMA ahikirize ekigambokye ekiyagambire; baitu nyowe nyimukire omu kiikaro kya Daudi isenyowe, nyikalire ha kitebe kya Isareri, nka MUKAMA okuraganize, kandi nyombekere harumu ekiragano kya MUKAMA, ekyiragaine nabana ba Isareri. 11Kandi nuho ntaire esanduko, nambere harumu ekiragano kya MUKAMA, ekiyaragaine nabana ba Isareri. 12Kandi yayeme’ra omu maiso gekyoto kya MUKAMA omu maiso gekitebe kyona ekya Isareri, yasasanura engaroze: 13(baitu Sulemani akaba akozire ekiikaro ekyemiringa, okuraiha kwakyo mikono etano, noburaibura bwakyo mikono esatu, yekita hagati yezigati; kandi yakyeme’raho, yateza amaju hansi omu maiso gekitebe kyona ekya Isareri, yasasanura engaroze haiguru): 14yagamba ati Ai MUKAMA, Ruhanga wa Isareri tiharoho Ruhanga ondi nka iwe, nobuhokuba omu iguru, nobuhokuba ha nsi; arukukwata ekiragano nebyokuganyira nabairu bawe, abarukugendera omu maiso gawe nomutima gwabu gwona: 15iwe ayakwasire nomuiru wawe Daudi isenyowe eki ekiwamuraganize: ego, akagamba nakanwa kawe, wakihikiriza nomukono gwawe, nkokukiri hati: 16nukwo hati bun, ai MUKAMA Ruhanga wa Isareri, Linda na Daudi isenyowe eki ekiwamuraganize nogamba oti Tihalikuburaho omusaija omu maiso gange okuika’ra ha kitebe kya Isareri: kimu kyonka abana bawe obubalyerinda omuhanda gwabu, okugenderaga omu biragiro byange nkaiwe okuwagenderaga omu maiso gange. 17Nukwo hati bunu, ai MUKAMA, Ruhanga wa Isareri, ekigambo kyawe kinanukirwe, ekiwagambire omuiru wawe Daudi. 18Baitu Ruhanga aliikara mazima hansi? Dora, iguru niguru erya haiguru torukusobora okuligyamu: kirisura ki enju enu eyinyombekere iwe okugihikamu? 19Baitu iwe oteho omutima ha kusaba kwomuiru wawe, na ha kusaba kwomuiru wawe, na ha kwesengerezakwe, ai MUKAMA Ruhanga, okuhu’ra okukunga nokusaba omuiru wawe ebyarukusaba omu maiso gawe: 20amaiso gawe gaigukire enju enu ekiro na nyamusana, ekiikaro ekiwagambire okuikazayo ibara lyawe; okuhu’raga okusaba omuiru wawe okwarasabaga hali ekiikaro kinu. 21Naiwe ohu’rege okwesengereza okwomuiru wawe, kandi okwabantu bawe Isareri, obubarasabaga hali ekiikaro kinu: ego, ohu’rege noyema omu kiikaro kyawe ekyokuikaramu, omu iguru; kandi obworahu’raga oganyirege. 22Kandi omuntu obwarasisiraga omutahiwe, kandi ekirahiro bakimutaho okumurahiza, kandi aija okurahira omu maiso gekyoto kyawe omu nju enu: 23iwe ohu’rege omu iguru, kandi okolege, ocwege emisango yabairu bawe, nojunaniza omuntu omubi, okumuletara ha mutwegwe omuhandagwe; naoihaho omusango ha nyakuhikirire, okumuha nkokuhiki’rakwe okukuli. 24Kandi abantu bawe Isareri obubarabingwaga abanyanzingwa, habwokusisira iwe; obubaliba nibahinduka, nibatura ibara lyawe, nibasaba nobesengereza omu maiso gawe omu nju enu: 25iwe ohu’rege omu iguru, oganyirege ekibi kyabantu bawe Isareri, obaga’reyoga omu nsi eyiwabahaire bo nabaisenkurubo. 26Iguru obulirakingwahoga, enjura etarukugwa, habwokusisa kwabu namberoli; obubaliba nibahindukira ekiikaro kinu, nibatura ibara lyawe, nibahinduka okuleka ekibi kyabu, obworababonabonesaga: 27iwe ohu’rege omu iguru, oganyirege ekibi kyabairu bawe, kandi ekyabantu bawe Isareri, obwolibegesa omuhanda omurungi ogubahikirire okugendamu; kandi onagege enjura hansi yawe, eyiwahaire abantu bawe okuba obugwetwa. 28Enjara obweragwaga omu nsi, rundi orufu, rundi okuhukurwa, rundi okuhumba, rundi kadoima, rundi enzige; abanyanzigwa obubarabagotaga omu nsi eyembuga zabu; obuharahahoga orufu rwona, rundi okurwara kwona; 29okusaba kwona rundi okwesengereza kwona okurasabwaga omuntu wena, rundi abantu bawe bona aba Isareri, abalimanya omuomu omuhitogwe wenka nobujunebwe wenka, kandi alisasanura engaroze hali enju enu: 30iwe ohu’rege omu iguru ekiikaro kyawe ekyokuikaramu, oganyirege, kandi ogaru’rege omuntu wena nkemihandaye yona okweri, oworukumanya omutimagwe: (baitu iwe, iwe wenka omanyire emitima yabana babantu); 31bakutinege, okugenderaga omu mihanda yawe, ebiro byona obu baraikaraga omu nsi eyiwahaire baisenkuruitwe. 32Kandi ebyomunyaihanga, atali womu Bantu bawe Isareri, obwararugaga omu nsi ya Hara habwibara lyawe erikuru, nengaro zawe ezamani, nomukono gwawe ogugoroirwe; obubaraijaga okusaba omu maiso genju enu: 33iwe ohu’rege omu iguru ekiikaro kyawe ekyokuikaramu, okolege byona omunyaihanga ebyarakukungiraga; abantu bona abahansi bamanye ibara lyawe, okukutina, nkabantu bawe Isareri okubakora, kandi bamanye ngu enju enu eyinyombekere neyetwa ibara lyawe. 34Abantu bawe obubararamagiraga abanyanzigwa babu, omu muhanda gwona ogworabasindikamuga, nibasaba Iwe hali orubuga runu oruwayegomboize, na hali enju eyinyombekere habwibara lyawe: 35iwe ohu’rege omu iguru okusaba kwabu nokwesengereza kwabu, notonganira ebigambo byabu ebyobulyo. 36Obubarakusisiraga (baitu tiharoho muntu atasisa), naiwe nobabihi’rwa, nabahayo hali omunyanzigwa, bo babasenguze nibabatwara omu nsi ya hara rundi haihi; 37baitu obubalyeyijukya omu nsi nambere balisengurwa, nibahunduka nibakwesengereza omu nsi yabo ababasenguize, nibagamba ngu Tukasisa, twakora ebyebwereme, twakora kubi; 38kandi obubaliba nibagaruka namberoli nomutima gwabu gwona, nobwomezi bwabu bwona omu nsi eyokusengurwa kwabu, nambere babasenguize, nibasaba barolerire ensi yowabu, eyiwahaire baisenkurubo, kandi orubuga oruwayegomboize, nenju eyinyombekere habwibara lyawe: 39iwe ohu’rege omu iguru, ekiikaro kyawe ekyokuikaramu, okusaba kwabu nokwesengereza kwabu, kandi otonganirege ebigambo byabu ebyobulyo; kandi oganyirege abantu bawe abakusisira. 40Hati bunu ai Ruhanga wange, nkwesengerize amaiso gawe gaigukege, namatu gawe ogatege, hali okusaba okurasabwaga omu kiikaro kinu. 41Nukwo hati bunu, oimuke ai MUKAMA Ruhanga, otahe omu kiikaro kyawe ekyokuhumu’ramu, iwe nesanduko eyobusobozi bwawe: banyakatagara bawe, ai MUKAMA Ruhanga, bajwalege okujunwa, nabarukwera bawe basemererwege habwoburungi. 42Ai MUKAMA Ruhanga, otahindura enyuma amaiso gogu ouwesesereho amagita: ijuka ebyokuganyira ebya Daudi omuiru wawe.