Swahili Bible2

5

1NUKWO omulimo gwona Sulemani oguyakozire habwenju ya MUKAMA gwahwa. Kandi Sulemani yatahyamu ebintu Daudi ise ebiyasoroire; efeza, nezabu, nebintu byona, yabita omu mahu’ro agenju ya Ruhanga. 2Nubwo Sulemani yasoroza hamu abakuru ba Isareri, nemitwe yona eyenganda, abakuru abenju zabaisebo eza bana ba Isareri, hali Yerusalemu, baiheyo esanduko eyekiragano kya MUKAMA omu rubuga rwa Daudi oruli Sayuni. 3Kandi abasaija bona aba Isareri bakesoroza hali omukama ha bugenyi, obukaba buli omu kwezi okwa musanju. 4Nabakuru ba Isareri bona bakaija, kandi Abalevi bahimba esanduko. 5Kandi baleta esanduko, nehema yokutangatanganiramu, nebintu byona ebirikwera ebikaba biri omu Hema; nibyo banyakatagara Abalevi babiresere. 6Kandi omukama Sulemani nekitebe kyona ekya Isareri, abamwesorolizeho, bakaba bali omu maiso gesanduko, nibahayo ebyonzira entama nente, ezitarabazirwe nobukwakuba okumanywa obwingi bwazo. 7Kandi banyakatagara batahya esanduko eyekiragano kya MUKAMA omu kiikaro kyayo, omu isabiro eryenju, ha kiikaro ekirikukira okwera, nuho hansi yamapapa gabakerubi. 8Baitu bakerubi bakasasanura amapapa gabu haruguru yekiikaro kyesanduko, kandi bakerubi bakasweke’ra haiguru esanduko nemigamba yayo ha ruguru. 9Kandi emigamba ekaba eraihire eti entuli zemigamba ikarorwa omuntu ayemere hali esanduko omu maiso gisabiro; baitu itarorwe ayemere aheru: kandi nuho eri, nokuhikya hati. 10Omu sanduko hakaba hatarumu kantu, rundi amabale abiri Musa agayatairemu Holebu, MUKAMA obuyaragaine ekiragano nabana ba Isareri, obubarugire omu Misiri. 11Kandi kyahika banyakatagara bona abakaba baloho bakaba beyereze bonka, batalinde embu zabu; 12Kandi Nabalevi abakaba bali abazini, abo bona, Asafu, Hemani, Yedusuni, na batabani babu na bene babu, bajwaire ekitani esemire, banyina enyege nendongo nenanga, bakeme’ra ha rubaju rwekyoto orwoburugaizoba, kandi hamu nabo banyakatagara kikumi mwabiri nibatera amakondere): 13kyahika, abatezi bamakondere nabazini obubateraine hamu, okuimukya iraka limu lyonka eryokukugiza nokusima MUKAMA; kandi obubaimukize iraka lyabu hamu namakondere nenyege nebintu ebigamba, bakugiza MUKAMA ngu Baitu uwe murungi: baitu okuganyirakwe kwebiro nebiro: nubwo enju yaijura ekicu, enju mali eya MUKAMA, 14nikwo banyakatagara ba tasobole okweme’raho okuhereza habwekicu: baitu ekitinisa kya MUKAMA kyaijura omu nju ya Ruhanga.