Swahili Bible2

36

1NUBWO abantu abomu nsi batwara Yehoahazi, mutabani wa Yosiya, bamufora omukama omu kiikaro kya ise Yerusalemu. 2Yehoahazi akaba ahikize emyaka amakumi abiri nesatu hayabandize okulema: kandi akalemera amezi asatu Yelusalemu. 3Omukama wa Misiri yamwaka obukama Yerusalemu, yacwera ensi etaranta ezefeza kikumi, netaranta eyezabu emu. 4Kandi omukama wa Misiri yataho Eryakimu mugenziwe okuba omukama okulema Yuda na Yerusalemu, yahindura ibaralye Yehoyakimu. Kandi Neko yatwara Yehoahazi mugenziwe, yamuleta Misiri. 5Yahoyakimu akaba ahikize emyaka amakumi abiri netano hayabandize okulema; akalemera Yerusalemu emyaka ikumi na gumu: kandi yakora eki ekikaba kiri kibi omu maiso ga MUKAMA Ruhangawe. 6Nebukadeneza, omukama wa Baburoni, yamuramagira, yamuboha namasamba, amutwale Baburoni. 7Kandi Nebukadeneza akatwara Baburoni ha bintu ebyomu nju ya MUKAMA, yabita omu yekaruye Baburoni. 8Kandi ebindi Yehoyakimu ebiyakozire, nobugwagwabwe obuyakozire, nebi ebiyasangirwe nabyo, dora, bihandikirwe omu kitabu kyabakama ba Isareri na Yuda: kandi Yehoyakini mutabaniwe yalema omu kiikarokye. 9Yehoyakini akaba ahikize emyaka munana hayabandizr okulema. Akalemera Yerusalemu amezi asatu nebiro ikumi: kandi yakoraga eki ekikaba kiri kibi omu maiso ga MUKAMA. 10Kandi omwaka obugwahikire, omukama Nebukadeneza yatuma, yamuleta Baburoni, ha mu nebintu byomuhendo ebyomu nju ya MUKAMA, yataho, Zedekiya mugenziwe okuba omukama okulema Yuda na Yerusalemu. 11Zedekiya akaba ahikize emyaka amakumi abiri na gumu hayabandize okulema: kandi akalemera Yerusalamu emyaka ikumi na gumu: 12Kandi yakoraga eki ekikaba kiri kibi omu maiso ga MUKAMA Ruhangawe: ateculeze omu maiso ga Yeremiya nabi, obuyagambire ebiruga omu kanwa ka MUKAMA. 13Kandi akemera omukama Nebukadeneza ayamurahize Ruhanga: baitu akagumya engotoye, nagumanganiza omutimagwe, aleke okuhindukira MUKAMA Ruhanga wa Isarerii. 14Kandi abakuru bona abomu banyakatagara nabantu, bakasobya muno nkobugwagwa bwona obwabamahanga okubuli; kandi basisa enju ya MUKAMA eyiyayereze Yerusalemu. 15Kandi MUKAMA Ruhanga waabaisenkurubo akabatumira omu bakwendabe, nazinduka omu rukyakya natuma; baitu akaba akwatirwe abantube embabazi, nekiikarokye ekyokuikaramu: 16baitu bakate’ra enaku abakwenda ba Ruhanga, nibagaya ebigambobye, nibasekereza banabibe, okuhikya mukire abantube, kunu hatabeho okukira. 17Nikyo yaletire halibo omukama Wabakalidaya, ayaisire abasigazi babu na busitama omu nju yabu erukwera, atakwatirwe embabazi omusigazi nobwakuba omuisiki, nobwakuba omugurusi, nobwakuba ahwisire: akahayo bona omu mukonogwe. 18Nebintu byona ebyomu nju ya Ruhanga, ebihango nebike, nebyomuhendo ebyomu nju ya MUKAMA, nebikwato ebyomukama nebyabakurube: ebi byona akabireta Baburoni. 19Kandi bayokya enju ya Ruhanga, basesa muhuruzi ya Yerusalemu, bayokya enju gamu gona nomu’ro, nibahwerekereza ebintu byona ebirungi ebyamu. 20Nabo abakaba bakizire empirima yabatwara Baburoni; baikaraga bali bairube, na batabanibe okuhikya obusinge obwobukama bwa Peresi: 21okuhikiriza ekigambo kya MUKAMA omu kanwa ka buyagarukire okusemezebwa nesabiti zayo: baitu ebiro ebyekaberi kifuruka yayerindaga sabiti, okuhikya emyaka ensanju.

22Kandi omu mwaka ogwokubanza gwa Kuro, omukama wa Peresi, ekigambo kya MUKAMA ekyomu kanwa ka Yeremiya kihikirizibwe, MUKAMA akekambisa omutima gwa Kuru, omukama wa Peresi, kandi yaranganiza ebyokuduma omu bukamabwe bwona, kandi yabihandika ati 23Nukwo Kuro, omukama wa Peresi, agambire ati Obukama bwona obwa hansi MUKAMA Ruhanga wamu iguru abumpaire; kandi andagire okumwombekera enju Yerusalemu oruli omu Yuda. Wena ali omulinywe owomu bantube bona, MUKAMA Ruhangawe aikale nauwe, kandi atabale.