Swahili Bible2

33

1MANASE akaba ahikize emyaka ikumi nebiri hayandize okulema; yalemera Yerusalemu emyaka atano netano. 2Akakora ekibi omu maiso ga MUKAMA, nakuratira ebinugwa byabakafiri, MUKAMA abayabingire omu maiso gabana ba Isareri. 3Baitu akagaruka okwombeka ebiikaro ebiraihire Hezekiya ise ebiyasesere hansi; yaimukya ebyoto habwa Baalimu, yakora Aserosi, yaramya ihe ryona eryahaiguru, yabiko’ra. 4Kandi akombeka ebyoto omu nju ya MUKAMA, nambere MUKAMA yagambire ati Omu Yerusalemu numwo harabamuga ibara lyange okuhikya ebiro byona. 5Kandi akombekera ekyoto ihe ryona erya haiguru omu zigati ebiri ezenju ya MUKAMA. 6Kandi akarabya abanabe omu mu’ro omu kihanga ekyomwana wa Hinomu: kandi yaraguraga ebiriija, yateraga engisa, yakoraga amasano, yagendaga hali abo ababandwa emzimu, nabafumo: akakora kibi kingi omu maiso ga MUKAMA, okumubihiza. 7Kandi akataho ekisisani ekyasaruirwe ekiyakozire omu nju ya Ruhanga, Ruhanga eyiyagambireho hali Daudi na hali Sulemani mutabaniwe ati Omu nju enu nomu Yerusalemu, eyinayegombozi omu nganda zona eza Isareri, nuho ndaikazayoga ibara lyange ebiro byona: 8kunu tindigaruka ebiro byona okuihaho ekigere kya Isareri ha nsi eyinaterireho baisenkuru inywe; kimu kyonka obubalyerinda okukora byona ebinabaragire, ebiragiro byona nebyatairweho nebyaragirwe habwomukono gwa Musa. 9Kandi Manase akasisisa Yuda nabomu Yerusalemu, kandi bakora kibi okukira amahanga, MUKAMA agayahwerekerize omu maiso gabana ba Isareri. 10MUKAMA yagambira Manase nabantube: baitu batateho omutima. 11Nikyo MUKAMA yabaletireho engabwa ezihe eryomukama wa Asura, kandi bakwata Manase nenjegere, nibamuboha nensengo, bamutwara Baburoni. 12Kandi obwakabali omu bujune, yayesengereza MUKAMA Ruhangawe, yayebundaza muno omu maiso ga Ruhanga wa baisenkuru. 13Yamusaba; kandi uwe yayesengerezebwa, yahu’ra okusabakwe, yamuga’ra Yerusalemu omu bukamabwe. Nukwo Manase yamanyire ati MUKAMA nuwe Ruhanga.

14Kandi hanyuma yebi akombeka muhuruzi yaheru ha rubuga rwa Daudi, ha rubaju rwa Gihoni orwobugwaizoba, omu kihanga, nokuhikya omulyango ogwirembo eryencu; yayehinguliriza Oferi, yagiraihya muno; yataho engabwa ezobumanzi omu mbuga zona eza Yuda ezikaba kiroho muhuruzi. 15Kandi akaihaho abacwezi babanyaihanga, nekisisisani omu nju ya MUKAMA, nebyoto byona ebiyayombekire ha rusozi orwenju ya MUKAMA, nomu Yerusalemu, yabibinga omu rubuga. 16Yayombeka ekyoto kya MUKAMA, yakihongeraho ebyonzira ebyebihongwa byobusinge ebyokusima, yaragira Yuda okuko’ra MUKAMA, Ruhanga wa Isareri. 17Baitu abantu bakeyongera okusara ebyonzira omu biikaro ebiraihire, baitu hali MUKAMA Ruhanga wabu wenka. 18Lero engeso ezindi eza Manase nokusabakwe hali Ruhangawe, nebigambo byabarozi abamugambire omu ibara lya MUKAMA Ruhanga wa Isareri, dora, bihandikirwe omu ngeso ezabakama ba Isareri. 19Nokusabakwe, kandi Ruhanga okuyayesengerizibwe uwe, nekibikye kyona nekyokusisakye kyona, nebiikaro nambere yayombekere ebiikaro ebiraihire yaimukya Aserimu nebisisani ebyasaruirwe, obwakaba atakebundaize: dora bihandikirwe omu bigambo bya Hozai. 20Kandi Manase yagwijagira nabaisenkuru, bamuzika omu njuye wenka: kandi Amoni mutabaniwe yalema omu kiikarokye.

21Amoni akaba ahikize emyaka abiri mwebiri hayabandize okulema; yalemera Yerusalemu emyaka ebiri. 22Akakora ekibi omu maiso ga MUKAMA, nka Manase ise okuyakozire: kandi Amoni akasa’ra ebyonzira ebisisani byona ebyasaruirwe Manase ise ebiyakozire, yabiko’ra. 23Kunu atabundaze omu maiso ga MUKAMA, nka Manase ise okuyayebundaize; baitu Amoni ogu yayeyongeraga okusisa. 24Kandi abairube bakamugambirana ensita, bamuitira omu njuye wenka. 25Baitu abantu abensi bakaita bona abagambiraine ensita omukama Amoni: abantu bensi bafora Yosiya mutabaniwe omukama omu kiikarokye.