Swahili Bible2

32

1HANYUMA, yebi, kandi hanyuma yokwesiga oku, Senakeribu omukama wa Asura akaija, yataha omu Yuda, yatera enkande ha mbuga ezikaba ziroho muhuruzi, yatekereza okuzenyagira wenka. 2Kandi Hezekiya obuyaboine Senakeribu aizire, kandi amalirire okurwanisa 3Yerusalemu, yahanura amagezi nabakurube nabasaija be bamani okuigara ensoro zamaizi ezikaba ziri aheru yorubuga; bamukonyera. 4Nukwo abantu baingi bakaba besoroize hamu, baigara ensoro zona, nakambu akakaba nikagera hagati yensi, nibagamba ngu Nikigasaki abakama ba Asura okuija nokusanga amaizi maingi? 5yaguma omutima, yayombeka muhuruzi yona ekaba eseserwe hansi, yagiraihya okuhika ha nkomero, na muhuruzi endi aheru, yagumya Miro omu rubuga rwa Daudi, yakora ebyokurwanisa nengabu, bingi muno. 6Yataho engabwa ezokurwana okulema abantu, yabasoroleza namberali omu ikute eriri ha irembo eryorubuga,yabagambira ebyokuhumuza nagamba ati 7Mufoke wamani mugume omutima, mutatina nobukwakuba okufobe’ra habwomukama wa Asura, nobuhokuba habwekitebe kyona ekyanyinakyo: baitu anyakuli naitwe nakira obukuru anyakuli nauwe: 8hamu nauwe haroho omukono gwomubiri; baitu hamu naitwe haroho MUKAMA Ruhanga waitu okutukonyera, nokurwana obulemu bwaitu. Abantu bahumura habwebigambo bya Hezekiya omukama wa Yuda.

9Hanyuma yebi Senakeribu omukama wa Asura akatuma abairube Yerusalemu (lero uwe akabali omu maiso ga Rakisi, nobusobozibwe hamu nauwe) yabatunga hali Hezekiya omukama wa Yuda, na hali Yuda yona abakaba bali Yerusalemu, nagamba ati 10Nukwo agambire Senakeribu omukama wa Asura ati Inywe nimwesiga ki, nimuikara omu nkomero za Yerusalemu? 11Hezekiya tarukubahibabihabiha, okubahayo mufe enjara niroho, nagamba ati MUKAMA Ruhanga waitu nuwe alitujuna omu mukono gwomukama aw Asura? 12Tinuwe Hezekiya ogu ayamuihire ebiikarobye ebiraihire nebyotobye, naragira Yuda na Yerusalemu nagamba ati Muraramyaga omu maiso gekyoto kimu kyonka, kandi nuho murayote’rahoga emyami’ro? 13Timumanyire nyowe na baisenkuru nyowe ebitwakozire amahanga gona agensi? abacwezi abamahanga abensi bakasobora okujuna ensi yowabu omu mukono gwange? 14Alinkaha omu bacwezi bona abamahanga ago baisenkuru nyowe agabahwerekerize kimu, arasoboire okujuna abantube omu mukono gwange, Ruhanga wanyu asobole okubajuna inywe omu mukono gwange? 15Nukwo hati bunu Hezekiya aleke okubabihabiha, nobukwakuba okubasonasona omu mulingo ogu, kunu inywe mutamuikiriza: baitu busaho mucwezi owihanga lyona, rundi owobukama bwona arasoboire okujuna abantube omu mukono gwange, nomu mukono gwabaisenkuru nyowe: okukira muno Ruhanga wanyu talisobora okubajuna omu mukono gwange? 16Kandi abairube bakeyongera okujuma MUKAMA Ruhanga, nomuiruwe Hezekiya. 17Akabahandika nebaruha, eyokusekereza MUKAMA, Ruhanga wa Isareri, nokumujuma nagamba ati Nkabacwezi abamahanga abensi okubatarajunire abantu babu omu mukono gwange, nukwo Ruhanga wa Hezekiya atalijuna abantube omu mukono gwange. 18Kandi bakami’ra niraka erihango omu rulimi Rwabayudaya hali abantu ba Yerusalemu abakaba bali ha muhuruzi, okubakanga, nokubatuntuza; nukwo banyage orubuga. 19Kandi bakabaza na Ruhanga wa Yerusalemu, nkokubabaza na bacwezi abamahanga agensi, abali mirimo yengaro zabantu. 20Kandi Hezekiya omukama, na Isaya nabi mutabani wa Amozi, basaba habwebi, bakunga iguru. 21MUKAMA yatuma maraika, yamaraho abasaija bona abamani abobumanzi, nabakuru nengabwa, omu rukande rwomukama wa Asura. Nukwo yagarukayo nensoni ezamaiso omu nsiye wenka. Kandi obuyatahire omu nju yomucweziwe, abo abarugire omu ndaye wenka bakamuitirayo na busitama. 22Nukwo MUKAMA yajunire ati Hezekiya nabomu Yerusalemu omu mukono gwa Senakeribu omukama wa Asura, nomu mukono gwabandi bona, yabaterekereza ha mbaju zona. 23Kandi baingi bakaletera MUKAMA ebisembo Yerusalemu, nebintu ebyomuhendo hali Hezekiya omukama wa Yuda: nokunyumizibwa akanyumizibwa omu maiso gamahanga gona okuruga omu kasumi ako.

24Omu biro ebi Hezekiya akarwara, yakiha haihi okufa: yasaba MUKAMA; kandi yabaza nauwe, yamuha akokuro’raho. 25Baitu Hezekiya atasasule nkomugisa ogwamukozirwe okugukaba guli; baitu omutimagwe gukenyumiza: nikyo ekiniga kyamuhikiraho, na ha Yuda na Yerusalemu. 26Baitu Hezekiya yayebundaza habwokwenyumiriza okwomutimagwe, uwe nabomu Yerusalemu, kandi ekiniga kya MUKAMA kitabahikeho omu biro bya Hezekiya 27Kandi Hezekiya akabanyina itungo lingi nekitinisa kingi muno: yayetungira amahu’ro agefeza, nagezabu, nagobubale obwomuhendo, nagebiboya, nagengabu, nagebintu ebirungi ebyemiringo yona; 28kandi namaguli habwensagi ezengano nezamarwa nezamagita; namasibiko habwebisoro ebyemiringo yona, namagana omu masibiko. 29Kandi akeko’ra embuga, nitungo eryembuzi neryente nyingi muno: baitu Ruhanga akamuha ebintu bingi muno. 30Nuwe Hezekiya ogu ayaigaire ensoro eyeruguru eyamaizi ga Gihoni, yagaterekereza okugera ha rubaju rwobugaizoba orworubuga rwa Daudi. Kandi Hezekiya akatunga omugisa omu miromoye yona. 31Baitu omu bigambo ebyabakwenda babakuru ba Baburoni, abamutumire okukaguza ebyakoku’raho akakozirwe omu nsi, Ruhanga akamusigaho amulenge, amanye byona ebikaba biri omu mutimagwe. 32Lero ebigambo ebindi ebya Hezekiya nengesoze enungi, dora, zihandikirwe omu kwolekwa kwa Isaya nabi mutabani wa Amozi, omu kitabu kyabakama ba Yuda na Isareri. 33Kandi Hezekiya yagwijagara na baisenkuru, bamuzika omu ntembotembo eyagasani yabana ba Daudi: na Yuda yona nabomu Yerusalemu bamutaho ekitinisa omu kufakwe. Kandi Manase mutabaniwe yalema omu kiikarokye.