Swahili Bible2

31

1KANDI ebi byona obubyahireho, aba Isareri bona abakaba baloho bagenda omu mbuga za Yuda, bacwacwana amabale agaraihire, batema Aserimu, basesa ebiikaro ebiraihire nebyoto omu Yuda yona nomu Benyamini, nomu Eferaimu na Manase, okuhikya obubabihwerekerize byona. Kandi abana ba Isareri bagaruka, omuntu wena hali obutakabwe, omu mbuga zabu. 2Kandi Hezekiya akataho embu zabanyakatagara Nezabalevi nkembu zabu okuziri, omuntu wena nkokuherezakwe okukuli, banyakatagara Nabalevi, habwebihongwa byobusinge, habwokuhereza, kandi habwokusima, kandi habwokukugiza omu malembo gorukande rwa MUKAMA. 3Kandi akaragira ekicweka ekyebintu byomukama habwebihongwa ebyokeze, habwehingwa ebya nyenkya na kairirizi, nebihongwa ebyokeze habwa sabiti, kandi habwokwezi okuboneka, kandi habwobugenyi obwatairweho, nkokukihandikirwe omu biragiro bya MUKAMA. 4Kandi akaragira abantu abaikaraga Yerusalemu bahe omugabo ogwa banyakatagara Nabalevi, bo behayo bonka hali ebiragiro bya MUKAMA. 5Kandi ekiragiro eki obukyarangainwe, abana ba Isareri baleta muno muno emiganuro eyengano, neyamarwa, neyamagita, neyobwoki, neyensagi zona ezomu misiri; nekicweka kya ikumi ekya byona bakakireta muno. 6Kandi abana ba Isareri na Yuda abaikaraga omu mbuga za Yuda, nabo bakaleta ekicweka kya ikumi ekyente nentama, nekicweka kya ikumi ebyebintu ebyasoroirwe, ebibasorolire MUKAMA Ruhanga wabu, babituma emitumo. 7Omu kwezi kwakasatu bakabanza ekutaho emiganda yemitumo, bagimara omu kwezi kwa musanju. 8Kandi Hezekiya nabakuru obubaizire barora emitumo, basima MUKAMA, nabantube Isareri. 9Nubwo Hezekiya yakaguza banyakatagara Nabalevi ebyemitumo. 10Azaliya nyakatagara omukuru, owomu nju ya Zadoki, yamugarukamu nagamba ati Abantu bakaba kuleta ebisembo omu nju ya MUKAMA, itwe tukalya twaiguta, twasagisaho bingi: baitu MUKAMA aguhaire omugisa abantube; kandi ebisagireho nibyo binu ebingi ebyahuirwe. 11Nubwo Hezekiya yaragira okutekaniza ebisika omu nju ya MUKAMA; babitekaniza. 12Batahyamu ebisembo nebicweka bya ikumi nebintu ebyasoroirwe nokwesigwa: kandi Konaniya Omulevi nuwe akabali omulemi wabu, na Simei mugenziwe nuwe akabali wakabiri. 13Na Yehyeri, na Azaziya, na Nahasi, na Asaheri, na Yerimosi, na Yozabadi, na Eryeri, na Isimakiya, na Mahasi, na Benaya, nibo bakaba bali barolerezi hansi yomukono gwa Konaniya na Simei mugenziwe, abatairweho Hezekiya omukama, na Azaliya omulemi wenju ya Ruhanga. 14Na Kole mutabani wa Imuna Omulevi, omukumirizi owaha irembo eryoburugaizoba, nuwe yarole’raga ebihongwa ebya Ruhanga ebyokugonza, okugaba ebisembo ebya MUKAMA, nebintu ebirukukira okwera. 15Kandi hansi yogu hakaba haroho Edeni, ya Miniamini, gwabu ogubaragirwe, okuhaga bene babu nkembu zabu okuzikaba ziri, nabakuru nabato. 16Okwongera ha bali abahandikirwe amabara gabasaija abakaba bahikize emyaka esatu nokukiraho, bona abatahaga omu nju ya MUKAMA, nkomulimo gwa bukyabukya okugukaba guli, habwokuhereza kwabu nomulimo gwabu ogwaragwirwe, nkembu zabu okuzikaba ziri; 17kandi abo abahandikirwe amabara gabaisenkurubo abomu banyakatagara, Nabalevi abakaba bahikize emyaka abiri nokukiraho, omu mulimo gwabu ogwaragirwe nkembu zabu okuzikaba ziri; 18nabo abahandikirwe amabara gabaisenkurubo abana babu abato nabakazi babu, nabatabani babu, nabahara babu, okuhikya ekitebe kyona: baitu omumulimo gwabu ogwatairweho bakeyeza bonka omu kuhiki’ra: 19kandi habwabatabani ba Aroni banyakatagara, abakaba bali omu malisizo gembuga zabu, omu rubuga rwona, hakaba harumu abasaija abayatuirwe amabara gabu, okuhaga emigabo abasaija bona abomu banyakatagara, na bona abahandikirwe amabara gabaisenkurubo omu Balevi. 20Nukwo Hezekiya yakozire ati omu Yuda yona; yakora ebirungi kandi ebyobulyo kandi ebyokwesiga omu maiso ga MUKAMA Ruhangawe. 21Kandi omulimo gwona oguyatandikire omu kuhereza okwomu nju ya Ruhanga, nomu biragiro, nomu byatairweho, okuse’ra Ruhangawe, akagukora nomutimagwe gwona, yatunga omugisa.