Swahili Bible2

30

1KANDI Hezekiya akatumira Isareri yona na Yuda yona, kandi yahandikira ebaruha Eferaimu na Manase, baije hali enju ya MUKAMA Yerusalemu, okulinda Okuhingurwaho hali MUKAMA Ruhanga wa Isareri. 2Baitu omukama akaba ahanuire, nabakurube, nekitebe kyona ekyomu Yerusalemu, okulya Okuhingurwaho omu kwezi kwakabiri, 3baitu batasobole okukulya omu kasumi ako, baitu banyakatagara bakaba batakayereze baingi bati okumara omulimo, nabantu bakaba batakesoroize omu Yerusalemu. 4Kandi ekigambo kyaba kirungi omu maiso gomukama nagekitebe kyona. 5Nukwo bagumyaho ekiragiro okuduma ekigambo omu Isareri yona, okuruga Beeri-seba nokuhikya Dani, baije balye Okuhingurwaho, hali MUKAMA Ruhanga wa Isareri omu Yerusalemu: baitu bakaba batarukulya abant baingi nkebiragiro okubyahandikirwe. 6Nukwo abakwenda bagenda nebaruha ezahandikirwe omukama nabakurube, bahikya Isareri yona na Yuda yona, kandi nkekiragiro kyomukama okukikaba kiri ngu inywe abana ba Isareri, muhindukire MUKAMA Ruhanga wa Iburahimu, Isaka, na Isareri, agarukiremu inywe abasigaireho bakizire omukono gwomukama wa Asura. 7Kandi mutasisane nabaisenkuru inywe, kandi nka bene banyu abasisire MUKAMA Ruhanga wabaisenkurubo, nokuhayo yabahayo hali okuhwereke’ra, nkokumuboine. 8Nukwo hati bunu mutaba bengoto egumire, nka baisenkuru inywe okubakaba bali; baitu mweheyo hali MUKAMA, mutahe hawe harukwera, hayayereze okuhikya ebiro byona, muko’re MUKAMA Ruhanga wanyu, ekinigakye ekingi kibarugeho. 9Baitu obumuligaruka okuhindukira MUKAMA, bene banyu nabana banyu balibona embabazi hali abo ababasenguire, kandi baligaruka omu nsi enu: baitu MUKAMA Ruhanga wanyu wembabazi kandi wokuganyira, talihindura amaisoge okubarugaho, obumulimuhindukira. 10Nukwo abakwenda bebaruha baraba omu mbuga ezindi nezindi, omu nsi ya Eferaimu na Manase, nokuhikya Zeburuni: baitu bakabasekereza nibate’ra enaku. 11Baitu abamu abomu Asere na Manase na Zeburuni bakebundaza, baija Yerusalemu. 12Nomu Yuda omukono gwa Ruhanga gwabaho okubaha omutima gumu, bakole ekiragiro kyomukama nekyabakuru habwekigambo kya MUKAMA. 13Kandi abantu baingi bakesoroleza Yerusalemu okulya obugenyi obwemigati etatumbisibwe omu kwezi kwakabiri, ekitebe kingi muno. 14Kandi bakaimuka baihaho ebyoto ebikaba biri omu Yerusalemu, kandi nebyoto byona ebyokwote’raho emyami’ro bakabiihaho, babinaga omu kambu Kidironi. 15Nubwo baita Okuhingurwaho ha kiro kya ikumi na bina ekyokwezi kwakabiri: kandi banyakatagara Nabalevi bakakwatwa ensoni, bayeyeza bonka, baleta ebihogwa ebyokeze omu nju ya MUKAMA. 16Bayeme’ra omu kiikaro kyabu nkokubaragirwe, nkebiragiro bya Musa omusaija wa Ruhanga okubiri: banyakatagara bamisa esagama, eyibaihire omu mukono Gwabalevi. 17Baitu baingi abomu kitebe abakaba bateyereze bonka: nikyo Abalevi baragirwe okuita Okuhingurwaho habwomuntu wena akaba atasemire, okubeza hali MUKAMA. 18Baitu igana lyabantu, baingi abomu Eferaimu nabomu Manase, na Isakara na Zeburuni, bakaba bateyereze bonka, baitu bakalya Okuhinguraho okundi, nkokukutararagirwe. Baitu Hezekiya akabasabira nagamba ati MUKAMA omurungi aganyire 19omuntu wena anyakugumya omutimagwe okuse’ra Ruhanga, MUKAMA, Ruhanga wa baisenkuru, nobwatasemizibwe nkokusemeza okwa harukwera okukuli. 20MUKAMA yahu’ra Hezekiya,yakiza abantu. 21Kandi abana ba Isareri abakaba baloho omu Yerusalemu bakalya obugenyi obwemigati etatumbisibwe ebiro musanju nokusemererwa kwingi: kandi Abalevi na banyakatagara bakugizaga MUKAMA nebintu ebigamba muno. 22Kandi Hezekiya akabaza ebyokuhumuza Nabalevi bona abayategerize omu kuhereza okwa MUKAMA. Nukwo balire bati obugenyi nibamara ebiro musanju, nibahayo ebihongwa ebyobusinge, nibatu’ra MUKAMA, Ruhanga wabaisenkurubo. 23Kandi ekitebe kyona bakahanura okulinda ebiro musanju ebindi: balinda ebiro musanju ebindi nokusemererwa. 24Baitu Hezekiya omukama wa Yuda akaha ebekitebe ente rukumi nentama kasanju okuba ebihongwa; nabakuru bakaha abekitebe ente rukumi nentama kakumi: kandi banyakatagara baingi muno bakeyeza bonka. 25Nekitebe kyona kya Yuda, hamu na banyakatagara Nabalevi, nekitebe kyona ekyarugire omu Isareri, nabanyaihanga abarugire omu nsi ya Isareri, nabo abaikaire omu Yuda, basemererwa 26Nukwo okusemererwa kwingi kwabaho Yerusalemu: baitu okuruga ha businge bwa Sulemani mutabani wa Daudi omukama wa Isareri, hatabeho okuinganaho omu Yerusalemu. 27Nubwo banyakatagara Nabalevi baimuka, basabira abantu omugisa: kandi iraka lyabu lyahu’rwa, okusaba kwabu kwatemba hali ekiikarokye ekirukwera ekyokuikaramu, omu iguru.