Swahili Bible2

3

1NUBWO Sulemani yatandika okwombeka enju ya MUKAMA omu Yerusalemu ha rusozi Moliya, nambere MUKAMA yabonekire Daudi ise, nambere yatekanize omu kiikaro Daudi ekiyataireho, ha rubuga rwokuhu’raho orwa Orunani Omuyebusi. 2Kandi akatandika okwombeka ha kiro kyakabiri omu kwezi kwakabiri, omu mwaka ogwobusingebwe ogwakana. 3Kandi emiganda ya Sulemani eyiyalengire okwombeka enju ya Ruhanga nginu: okuraiha kwayo okwemikono eyorulengo orwokubanza, ekaba eri mikono nkaga, nokugaliha kwayo mikono abiri. 4Nekisasi ekikaba kiri omu maiso genju, okuraiha kwakyo nkokugaliha kwenju, kikaba kiri emikono abiri, noburaibura bwakyo kikumi mwabiri: yagisweka omunda nezabu esemire. 5Kandi enju enkoto akagitinda nemisambya, negi yagisweka nezabu esemire, yagisaru’raho emikindo nemikufu. 6Yakunisa enju nobubale obwomuhendo habwokusemera, kandi ezabu ekaberi ezabu ya Paravaimu. 7Kandi yasweka enju, nemiraba, nebiti ebyemiryango, nebisika byayo, nenyigi zayo nezabu; yasarura bakerubi habisika. 8Kandi yakora enju erukukira okwera; okuraihi kyayo, nkokugaliha kwenju, ekaba eri emikono abiri: yagisweka nezabu esemire, etaranta rukaga. 9Kandi obulemezi bwemisomali bukaba buli sekeri zezabu amakumi atano. Kandi akasweka ebisika ebyeruguru nezabu. 10Nomu nju erukukira okwera akakora bakerubi babiri abomulimo gwebisisani; babasweka nezabu. 11kandi amapapa aga bakerubi gakaba gali okuraiha kwago mikono abiri: ipapa erya kerubi omu mukono etano, nirihika ha kisika kyenju; kandi nipapa erindi mikono erya kerubi ondi. 12Nipapa erya kerubi ondi mikono etano, nirihika ha kisaka kyenju: nipapa erindi naryo minkono etano, niriterena nipapa erya kerubi ondi. 13Amapapa aga bakerubi abo gakesasanura emikono abiri: kandi bakeme’ra nebigere byabu, namaiso gabu gakaba nigarole’ra enju. 14Yakora enyigamo eya bu’ra nengoye erukugajuka nerukutukura, nekitani esemire, yagitabamu bakerubi. 15Kandi akakora omu maiso genju enyomyo ibiri, okuraiha kwazo mikono asatu netano, kandi emitwe ekaberi ha ruguru yazo ekaberi yemikono etano. 16Kandi akakora emikufu omu isabiro, yagita ha ruguru yenyomyo; yakora emakomamahanga kikumi, yagata ha mikufu. 17Yaimukya enyomyo omu maiso ga yekaru, emu ha mukono gwobulyo, nendi ha mukono gwemoso; egi eyomukono gwobulyo yagyeta ibara lyayo * Yakini, nibara lyegi ha mukono gwemoso yalyera Boazi.