Swahili Bible2

29

1HEZEKIYA akabanza okulema obwakaba ahikize emyaka abiri netano; yalemera Yerusalemu emyaka abiri mu mwenda: ibara lya nyina nuwe Abiya omuhara wa Zekaliya. 2Akakora ebirungi omu maiso ga MUKAMA, nka byona okubiri Daudi isenkuru ebiyakozire. 3Omu mwaka ogwobusingebwe ogwokubanza, omu kwezi okwokubanza, akakingura enyigi ezenju ya MUKAMA, yazisemeza. 4Kandi yatahyamu banyakatagara Nabalevi, yabasoroza hamu omu kikute eriri buragaizoba 5yabagambira ati Mumpu’re inywe Abalevi; hati bunu mweyeze inywenka, kandi mweze enju ya MUKAMA, Ruhanga wabaisenkuru inywe, muturukye aheru ebibi omu kiikaro ekirukwera. 6Baitu baisenkuru itwe bakasisa, bakora ekibi omu maiso ga MUKAMA Ruhanga waitu, bamufuruka, bahinduire amaiso gabu okuruga ha kiikaro kya MUKAMA ekyokuikaramu, nibatera amabega gabu. 7Kandi bakakinga enyigi ezekisasi, baraza etabaza, kunu tibotire emyami;ro, nobukwakuba okuhonga ebihongwa ebyokeze omu kiikaro ekirukwera, hali Ruhanga wa Isareri. 8Nikyo ekiniga kya MUKAMA kyahikire ha Yuda na Yerusalemu, yabahayo okucundwacundwa, okuba ekyokuhuni’raho, nekyokusimuza, nkokumuboine namaiso ganyu. 9Baitu dora, baisitwe bakagwa habwa busitama, nabana baitu abojo nabaisiki na bakazi baitu bali omu kusengurwa habweki. 10Hati bunu kiri omu mutima gwange okuragana ekiragano na MUKAMA, Ruhanga wa Isareri, ekinigakye ekingi kiturugeho. 11Bana bange, hati mutaba nobugara: baitu MUKAMA akabegomboza okweme’raga omu maisoge, nokuherezaga namberali, mubege abaherezabe, mwoterege emyami;ro.

12Nubwo Abalevi baimuka, Mahasi mutabani wa Amasi, na Yoweri mutabani wa Azaliya, abomu bana Babakohasi: kandi abomu bana ba Merali, Kisi mutabani wa Abudi, na Azaliya mutabani wa Yehalereri: kandi abomu Bageresoni, Yoha mutabani wa Zimuna, na Edeni mutabani wa Yoha: 13kandi abomu bana ba Erizfani, Simuri na Yeuweri: kandi abomu bana ba Asafu, Zekaliya na Mataniya: 14nabomu bana ba Hemani, Yehuweri na Simei: nabomu bana ba Yedusuni, Semaya na Uzyeri. 15Basoroza bene babu, bayeyeza, bataha nkekiragiro kyomukama okukikaba kiri habwebigambo bya MUKAMA, basemeza enju ya MUKAMA. 16Kandi banyakatagara bataha omu nju ya MUKAMA omunda okugisemeza, baihamu ebibi byona ebibasangire omu yekaru ya MUKAMA, babireta omu zigati eyenju ya MUKAMA. Abalevi babitwara babiturukya aheru hali akambu Kidironi. 17Kandi bakabanza okweza ha kiro ekyokubanza okweza ha kiro ekyokubanza ekyokwezi okwokubanza, kandi ha kiro ekyokwezi ekya munana baija hali ekisasi kya MUKAMA; bayereza enju ya MUKAMA ebiro munana: kandi ha kiro kya ikumi na mukaga ekyokwezi okwokubanza bagimara. 18Nubwo bataha omu kikali hali Hezekiya omukama, bagamba ngu Tumazire okusemeza enju yona eya MUKAMA, nekyoto ekyekihongwa ekyokeze, hamu nebintu byakyo byona, nemeza eyemigati eyokwoleka, hamu nebintu byayo byona. 19Kandi nebintu byona omukama Ahazi ebiyanagire omu busingwebe obuyasesire, itwe tubitekanize kandi tubyereze; kandi dora, biri omu maiso gekyoto kya MUKAMA.

20Nubwo Hezekiya omukama yazinduka okuimuka, yasoroza abakuru abomu rubuga, yatemba hali enju ya MUKAMA. 21Baleta enimi musanju, nentama empaya musanju, nebyana byentama musanju, nembuzi empaya musanju, okuba ekihongwa kyekibi habwobukama,. kandi habwa harukwera, kandi habwa Yuda. Yaragira banyakatagara batabani ba Aroni okubihongera ha kyoto kya MUKAMA. 22Nukwo baitu enimi, banyakatagara baiha ha sagama bagimisa ha kyoto: kandi baita entama empaya, bamisa esagama ha kyoto: baita nebyana byentama, babimisa esagama ha kyoto. 23Kandi bakairiza haihi embuzi empaya okuba ekihongwa kyekibi omu maiso gomukama nekitebe; bazitaho engaro zabu: 24banyakatagara bakaziita, bakora ekihongwa kyekibi nesagama yazo ha kyoto, okulihi’ra Isareri yona: baitu omukama akaragira ekihongwa kyekibi bikorwe ha Isareri yona. 25Yata Abalevi omu nju ya MUKAMA bakwasire enyege, nendongo, nenanga, nekiragiro kya Daudi na Gadi omurozi womukama, na Nasani nabi, okukikaba kiri: baitu ekiragiro kikaruga hali MUKAMA omu banabibe. 26Kandi Abalevi bakeme’raho bakwasire ebintu ebigamba ebya Daudi, na banyakatara bakwasire amakondere. 27Kandi Hezekiya akaragira okuhongera ha kyoto ekihongwa ekyokeze. Kandi ekihongwa ekyokeze nambere kyabandize, nubwo habandize nekizina kya MUKAMA, namakondere hamu nebintu ebigamba ebya Daudi omukama wa Isareri. 28Nekitebe kyona baramya, nabazini bazina, nabatezi bamakondere batera; ebi byona bakabikora okuhikya ekihongwa ekyokeze obukyahoireho. 29Kandi obubamazire okuhonga, omukama na bona abakaba baloho hamu nauwe bainama baramya. 30Kandi Hezekiya omukama nabakuru bakaragira Abalevi okuninira MUKAMA ebyokukugiza, omu bigambo bya Daudi nebya Asafu omurozi. Bakazina ebyokukugiza nokusemererwa, bainamya emitwe yabu, baramya. 31Nubwo Hezekiya yagarukamu nagamba ati Hati bunu mwehongire inywenka MUKAMA, mui’re haihi mulete ebyonzira nebihongwa ebyokusima omu nju ya MUKAMA. Abekitebe baleta ebyonzira nebihongwa byokusima; kandi bona abakaba banyina emitima erukugonza bakaleta ebihongwa ebyokeze. 32Kandi omuhendo gwebihongwa ebyokeze Abekitebe ebibalesere, gwahika enimi ensanju, entama empaya kikumi, nebyana byentama bikumi bibiri; ebi byona bikaba biri byekihongwa ekyokeze hali MUKAMA. 33Nebintu ebyasoroirwemu byahika ente rukaga, nentama enkumi isatu. 34Baitu banyakatagara bakaba bali bake, batasobole okubaga ebihongwa byona ebyokeze: nikyo bene babu Abalevi babakonyerire, okuhikya omulimo obugwahoire, kandi okuhikya banyakatagara obubayeyereze: baitu Abalevi bakaba bali bahikirire omu mutima okweyeza bonka okukira banyakatagara. 35Kandi ebihongwa ebyokeze bikaba biri bingi muno, nebisajwa byebihongwa ebyobusinge, nebihongwa byona ebyokeze. Nukwo okuhereza okwomu nju ya MUKAMA kwasemezibwe kuti. 36Hezekiya yasemererwa nabantu bona, habweki Ruhanga ekiyatekanirize abantu: baitu ekigambo kikakorwa bwango.