Swahili Bible2

28

1AHAZI akaba ahikize emyaka abiri hayabandize okulema; yalemera Yerusalemu emyaka ikumi na mukaga: atakole ekirungi omu maiso ga MUKAMA, nka Daudi isenkuru: 2baitu akagendera omu mihanda yabakama ba Isareri, kandi akako’ra Baalimu ebisisani ebyagere. 3Kandi yayote’raga emyami’ro omu kihanga ekyomwana wa Honomu, yayokya abanabe omu mu’ro, nkebinugwa ebyabakafiri okubiri, MUKAMA abayabingire omu maiso gabana ba Isareri. 4Yaseraga ebyonzira kandi yayote’raga emyami’ro omu biikaro ebiraihire, kandi ha nsozi, kandi hansi yomuti gwona omubisi. 5Nikyo MUKAMA Ruhangawe yamuherireyo omu mukono gwomukama wa Aramu; bamutera, basengura abantube baingi, babaleta Damasiko. Kandi akahebwabyo omu mukono gwomukama wa Isareri, ogu yamutera okuita kwingi muno. 6Baitu Peka mutabani wa Remaliya akaitira omu Yuda abantu kasirira omu bukumi bubiri ha kiro kimu, bona basaija bobumanzi; baitu bakafuruka MUKAMA, Ruhanga wa baisenkurubo. 7Kandi Ziriki, omusaija wamani owa Eferaimu, akaita Maaseya, mutabani womukama, na Azirikamu ayakuratire omukama. 8Kandi abana ba Isareri bakasengura ha bene babu busirira bubiri, abakazi nabana abojo nabaisiki, kandi babanyaga eminyago nyingi, baleta eminyago Samaliya. 9Baitu nabi wa MUKAMA akabaliyo, ibaralye nuwe Odedi: yarugayo okutangi’ra ihe eryaizire Samaliya, yabagambira ati Dora, baitu MUKAMA Ruhanga wa baisenkuru inywe akabihi’rwa Yuda, nikyo abaherireyo omu mukono gwanyu, mwabaita nekiniga kingi ekihikire haiguru omu iguru. 10Kandi hati bunu nimutekereza okutunga abana ba Yuda na Yerusalemu, babe abairu rubale nabazana namberemuli: baitu nainywe timunyina ebyokusisa byanyu inywenka hali MUKAMA Ruhanga wanyu? 11Nukwo mumpu’re hati bunu, muga’reyo abanyagwa abamwanyagire ha bene banyu: baitu ekiniga ekingi ekya MUKAMA kibahikireho. 12Kandi abamu abaha mitwe yabana ba Efereimu, Azaliya mutabani wa Yohanani, Berekiya mutabani wa Miseremosi, na Yehizikiya mutabani wa Sarumu, na Amasa mutabani wa Hadirai, bayeme’ra hali abo abarugire ha 13bulemu, babagambira ngu Mutatahya munu abanyagwa: baitu omusango gwaitu mwingi, kandi haroho ekiniga kingi ha Isareri. 14Nukwo abasaija bebyokurwanisa basiga abanyagwa neminyago omu maiso gabakuru na gekitebe kyona. 15Kandi abasaija abagambirweho amabara gabu baimuka, batwara abanyagwa, bajweka neminyago bona abakaba bali busa omulibo, babataho ebyokujwara, nenkaito, babaha ebyokulya nebyokunywa, babasiga namagita, bahimbira ha nkaina bona abakaba bali baceke omulibo, babaleta Yeriko, orubuga orwemikindo, hali bene babu: nubwo bagarukayo Samaliya.

16Omu kasumi ako omukama Ahazi akatumira abakama ba Asura bamukonyera. 17Baitu Abedomu bakaba bagarukire okutera Yuda, kandi basengura abanyagwa. 18Nabafirisiti bakaba baramigi’re embuga ezekyeya, nezobukizi Bwobulyo obwa Yuda, kandi banyaga Besi-semesi, na Aiyaroni, na Gedorosi, na Seko hamu nembuga zayo, na Timuna nembuga zayo na Gimuzo nembuga zayo: baikara oku. 19Baitu MUKAMA akabundaza Yuda habwa Ahazi omukama wa Isareri; baitu akakora nobwereme omu Yuda, yasisira muno MUKAMA. 20Kandi Tirigasi-piri-nese omukama wa Asura akamuizira, yamutuntuza, baitu atamuhe amani. 21Baitu Ahazi akaihamu ebyomu nju ya MUKAMA, nebyomu nju yomukama neyabakuru, yabiha omukama wa Asura: baitu eki kitamugasire. 22Kandi omu kasumi komuhitogwe akeyongera okusisira MUKAMA, ogu omukama Ahazi. 23Baitu akasa’ra ebyonzira abacwezi ba Damasiko abamutire: yagamba ati Baitu abacwezi babakama ba Aramu bakabakonyera, nikyo ndibasa’ra ebyonzira bankonyere. Baitu bakamuletaho okuhwereke’ra, na Isareri yona. 24Kandi Ahazi akasoroza ahamu ebintu ebyenju ya Ruhanga, yasara ebicweka ebintu ebyenju ya Ruhanga, yakinga enyigi ezenju ya MUKAMA; yayeko’ra wenka ebyoto omu nsonga zona eza Yerusalemu. 25Kandi omu mbuga zona za Yuda, rumu rumu, akakora ebiikaro ebiraihire ebyokwote’ra abacwezi emyami’ro, yayeremera MUKAMA, okumubihiza Ruhanga wa baisenkuru. 26Kandi engesoze ezindi, nemihandaye yona, eyokubanza neya hanyuma, dora, ehandikirewe omu kitabu ekyabakama ba Yuda na Isareri. 27Ahazi yagwijagara na baisenkuru, bamuzika omu rubuga, omu Yerusalemu; baitu batamutahye omu gasani yabakama ba Isareri: kandi Hezekiya mutabaniwe yalema omu kiikarokye.