Swahili Bible2

25

1AMAZIYA akaba ahikize emyaka abiri netano hayabandize okulema; yalemera Yerusalemu emyaka abiri mu mwenda: kandi ibara lya nyina nuwe Yehoadani owa Yerusalemu. 2Yakora ebirungi omu maiso ga MUKAMA, baitu hatali omutima oguhikirire mali. 3Kandi kyahika, obukama obubwamugumireho, yaita abairube abaisire omukama ise. 4Baitu ataite abana babu, baita akakora eki ekiri omu biragiro, omu kitabu kya Musa, nka MUKAMA okuyaragire nagamba ati Baisebo tibalifa habwabana, kunu abana tibalifa habwabaisebo, baitu omuntu wena alifa habwekibikye wenka. 5Kandi Amaziya akasoroza Yuda ahamu, yabatekereza nkenju yabaisebo okuziri, yabateraho engabwa ezenkumi nengabwa ezebikumi. Yuda na Benyamini yona: yababara bona abakaba bahikize emyaka abiri nokukiraho, yasanga abasaija abakomerwemu busirira busatu, abasoboire okuramaga okurwana, abasobora okukwata icumu nengabu. 6Kandi yaguli’ra omu Isareri abasaija bamani abobumanzi kasirira, yabaha etaranta zefeza kikumi. 7Baitu omusaija wa Ruhanga yaija namberali nagamba ati Iwe omukama, ihe erya Isareri lireke okugenda naiwe; baitu MUKAMA tali hamu na Isareri, abana bona aba Efereimu. 8Baitu okugenda obwoligenda, kora nobumanzi, foka wamani habwokurwana: Ruhanga alikunaga hansi omu maiso gomumyanzigwa; baitu Ruhanga anyina obusobozi okukonyera, kandi nokunaga hansi. 9Amaziya yagambira omusaija wa Ruhanga ati Tulikora ki habwetaranta kikumi ezefeza ezinahaire ihe erya Isareri? Omusaija wa Ruhanga yagamba ati MUKAMA nasobora okukuha bingi munookukira ezi. 10Nubwo Amaziya yababaganizamu, ihe eryaizire namberali okuruga omu Eferaimu bagarukeyo owabu: nikyo ekiniga kyabu kyayakire muno hali Yuda, bagarukayo owabu babihrwe muno. 11Amaziya yaguma omutima, yaramagya abantube, yataha omu Kihanga Kyesikisura, yatema ha bana ba Seyiri kakumi. 12Na kakumi abana ba Yuda bakabahamba bomezi, babaleta ha ruguru yibale, babanaga hansi yibale, bacwekacwekera kimu. 13Baitu abasaija abomu ihe Amaziya abayagaruireyo batagenda nauwe okurwana, bagwera embuga za Yuda; okuruga Samaliya nokuhikya Besi-horoni, batemaho enkumi isatu, banyaga eminyago mingi.

14Kandi kyahika, Amaziya obuyarugire ha kuita Abedomu, yaleta abacwezi babana ba Seyiri, yabaimukya okuba abacwezibe, yainama omu maiso gabu, yabote’ra emyami’ro. 15Nikyo ekiniga kya MUKAMA kyayakire Amaziya, yamutumira nabi, ayamugambire ati Kiki ekyakuseruzi abacwezi babantu, abatarajunire abantu babu omu mukono gwawe? 16Kandi kyahika, obuyabalize nauwe, omukama yamugambira ati Tukakutaho ha rukurato orwomukama? culera; noyendera ki okuterwa? nubwo nabi yaculera nagamba ati Manyire Ruhanga amalirire okukuhwerekereza, baitu okakora eki kunu tohulire amagezi gange.

17Kandi Amaziya omukama wa Yuda akahanura amagezi, yatumira Yoasi, mutabani wa Yehoahazi mutabani wa Yehu, omukama wa Isareri nagamba ati Ija, turorangane ha maiso. 18Yoasi omukama wa Isareri yatumira Amaziya omukama wa Yuda nagamba ati Itojo erikaba liri omu Lebanoni likatumira omukogoto ogukaba guli omu Lebanoni nirigamba liti Omuhara wawe omuhe mutabani wange amuswere: kandi hahinguraho enyamaiswa ekaberi omu Lebanoni, yalibata hansi itojo. 19Iwe ogambire oti Dora, otemere Edomu: kandi omutima gwawe gwenyumize okwehaisiriza: ikara omuka; nogendeza ki okwetaba omu bigambo okweretera akabi, iwe okugwa, iwe wenka na Yuda hamu naiwe? 20Baitu Amaziya yayanga okuhu’ra; baitu kikaba kirugire hali Ruhanga, abaheyo omu mukono gwabanyanzigwa babu, baitu bakase’ra abacwezi ba Edomu. 21Nukwo Yoasi omukama wa Isareri yaramaga; uwe na Amaziya omukama wa Yuda barorangana ha maiso Besisemesi, eya Yuda. 22Yuda yabingwa omu maiso ga Isareri; bairuka omuntu wena nagenda omu hemaye. 23Kandi Yoasi omukama wa Isareri yakwata Amaziya omukama wa Yuda, mutabani wa Yoasi, mutabani ni Yehoahazi, omu Besi-semesi’ yamuleta Yerusalemu, yasesa muhuruzi ya Yerusalemu okuruga ha irembo lya Eferaimu okuhikya ha irembo eryahakarugu, mikono bikumi bina. 24Yanyaga ezabu zona nefeza zona, nebintu byona ebyasangirwe omu nju ya Ruhanga hamu na Obededomu, nebikwato ebyomu nju yomukama, nabantu abakwatirwe ebihinga, yagarukayo Samaliya.

25Kandi Amaziya mutabani wa Yoasi omukama wa Yuda yayengera okubangara emyaka ikumi netano hanyuma yokufa kwa Yoasi mutabani wa Yehoahazi omukama wa Isareri. 26Nebigambo ebindi ebya Amaziya, ebyokubanza nebyahanyuma, dora, tibihandikirwe omu kitabu ekyabakama ba Yuda na Isareri? 27Kandi omu kasumi ako Ahamaziya obuyahungukire naleka okukuratira MUKAMA, bakabanza okumugambirana ensita omu Yerusalemu; yairukira Rakisi: baitu batuma Rakisi okumukuratira, bamuitira oku. 28Kandi bamuletera ha mbarasi, bamuzika hamu na baisenkuru omu rubuga rwa Yuda.