Swahili Bible2

24

1YOASI akaba ahikize emyaka omusanju hayabandize okulema; yalemera Yerusalemu emyaka amakumi ana: kandi ibara lya nyina nuwe Zibuya owa Beeri-seba. 2Kandi Yoasi akakora ekirungi omu maiso ga MUKAMA, ebiro byona ebya Yehoyada nyakatagara. 3Yehoyada yamuswere’ra bakazi babiri: yazara abana abojo nabaisiki. 4Kandi kyahika hanyuma yebi, Yoasi akatekereza okusemeza enju ya MUKAMA. 5Yasoroza hamu banyakatagara Nabalevi, yabagambira ati Mugende omu mbuga zona eza Yuda, musoroze ha Isareri yona erupiya ezokusemezaga enju ya Ruhanga wanyu omwaka nomwaka, kandi mwekambe okurahukya ekigambo. Baitu Abalevi batakirahukye. 6Omukama yayeta Yehodaya omukuru wabu, yamugambira ati Kiki ekyakutangire okuhambiriza Abalevi okusoroza omu Yuda nomu Yerusalemu omusoro gwa Musa omuiru wa MUKAMA, kandi ogwekitebe kya Isareri, habwehema eyobwakasio? 7baitu abana ba Ataliya, omukazi ogu omubi, bakaba basesere enju ya Ruhanga; nebintu byona ebyasoroirwe ebyenju ya MUKAMA bakabihayo hali Baalimu. 8Omukama yaragira, bakora esanduko, bagita heru ha irembo eryenju ya MUKAMA. 9Kandi baduma omu Yuda na Yerusalemu, okuletera MUKAMA omusoro Musa omuiru wa Ruhanga oguyacwerire Isareri omu irungu. 10Kandi abakuru bona nabantu bona basemererwa, baleta, banaga omu sanduko, okuhikya obubamazireho. 11Kandi kyahika obubaletaga esanduko omu maiso gomukama habwomukono Gwabalevi, kandi obubabonaga erumu erupiya nyingi, omuhandiki womukama nomuduma owa nyakatagara, kandi bagiga’raga omu kiikaro kyayo. Nukwo bakoraga bati obukyabukya, basoroza erupiya nyingi. 12Kandi omukama na Yehodaya baziha abantu abo abakozire omulimo ogwokuhereza, okwenju ya MUKAMA; baguli’ra abarukubaija amabale nababaizi bemiti okusemeza enju ya MUKAMA, kandi abo abakozire omulimo gwebyoma nemiringa okusemeza enju ya MUKAMA. 13Nukwo abakozi bakozire bati omulimo, kandi bahikiriza omulimo, kandi baimukya enju ya Ruhanga omu bukuru bwayo, bagigumya. 14Kandi obubamazireho omulimo, baleta erupiya ezasagireho omu maiso gomukama na Yehodaya, kandi bazikoramu ebintu habwenju ya MUKAMA, ebintu ebyokuhereza, nebyokuhonga nabyo, nebigikok, nebintu ebyezabu nebyefeza. Kandi bahongoga ebihongwa ebyokeze omu nju ya MUKAMA obutosa ebiro byona ebya Yehoyada. 15Baitu Yehoyada akagurusa yaijura ebiro, yafa; akaba ahikize emyaka kikumi mwasatu hayaferire. 16Bamuzika omu rubuga rwa Daudi omu bakama, baitu akarora kurungi omu Isareri, na hali Ruhanga hali enjuye. 17Kandi hanyuma yokufa kwa Yehoyada abakuru ba Yuda baija baramya omukama. Omukama yabahu’ra. 18Bafuruka enju ya MUKAMA, Ruhanga wabaisenkurubo, bako’ra Aserimu nebisisani: ekiniga kyaija hali Yuda na Yerusalemu habwekibi kyabu eki. 19Baitu akabatumira banabi babaga’re hali MUKAMA: babagambi’ra: baitu bayanga okuhu’ra. 20Omwoyo gwa Ruhanga gwaija ha Zekaliya mutabani wa Yehoyada nyakatagara; yayeme’ra ha ruguru yabantu yabagambira ati Nukwo Ruhanga agambire ati Inywe nimusisira ki ebiragiro bya MUKAMA, baitu timurukusobora okutunga omugisa? baitu mukafuruka MUKAMA, nikyo abasigire inywe. 21Bamugambirana ensita, bamutera amabale omukama obuyabaragire omu zigati yenju ya MUKAMA. 22Nukwo Yoasi omukama yalema okuijuka embabazi Yehodaya ise eziyamukozire, baitu akaita omwanawe. 23Kandi kyahika omwaka nambere gwahoireho, ihe erya Abaramu likaija okumuramagira: baija hali Yuda na Yerusalemu, bahwerekereza abakuru bona, ababantu omu bantu, batwekera omkama wa Damasiko eminyago yayo yona. 24Baitu ihe erya Abaramu likaija nekitebe kyabantu ekike; MUKAMA yahayo ihe eringi omu mukono gwabu, baitu bakafuruka MUKAMA, Ruhanga wa baisenkurubo. Nukwo bahikiriza omusango ha Yoasi. 25Kandi obubamurugireho (baitu bakamusiga arwaire orufu rwingi) abairube wenka bamugambirana ensita, habwesagama yabana ba Yehoyada nyakatagara, bamuitira ha kitabukye, yafa: bamuzika omu rubuga rwa Daudi, baitu batamuzike omu gasani zabakama. 26Kandi abamugambirairane ensita: mbanu: Zabadi mutabani wa Simeasi Omwanoni, na Yehozabadi mutabani wa Simirisi omukazi Omumoabu. 27Kandi ebyabatabanibe, nebigambo ebikuru muno ebibamuraguireho, nebyokusemeza enju ya Ruhanga, dora, ebi bihandikirweho omu kitabu kyamakuru ekyabakama. Kandi Amaziya mutabaniwe yalema omu kiikarokye.