Swahili Bible2

23

1KANDI omu mwaka ogwomusanju Yehoyada yayegumya wenka, yaragana ekiragano nengabwa ezebikumi, Azaliya mutabani wa Yerohamu, na Isameri mutabani wa Obedi, na Maaseya mutabani wa Adaya, na Erisatati mutabani wa Zikiri. 2Bagendagenda omu Yuda, basoroza Abalevi omu mbuga zona eza Yuda, nemitwe yenju zabaisebo eza Isareri, baija Yerusalemu. 3Kandi ekitebe kyona bakaragana ekiragano nomukama omu nju ya Ruhanga. Yabagambira ati Dora, omwana womukama nuwe alirema, nka MUKAMA okuyagambire ha bana ba Daudi. 4Kinu nikyo kigambo ekimulikora: ekicweka kyanyu ekyakasatu, abataha ha sabiti, abomu banyakatagara nabomu Balevi, muliba abakumirizi benyigi; 5nekicweka ekyakasatu muliba ha nju ya MUKAKA; kandi ekicweka ekyakasatu ha irembo eryemiganda: nabantu bona balibaho omu zigati ezenju ya MUKAMA. 6Baitu mutaliikiriza nomu okutaha omu nju ya MUKAMA, rundi banyakatagara Nabalevi abo abarukuhereza; nibo balitahamu, baitu nibo barukwera: baitu abantu bona balirinda habwa MUKAMA. 7Kandi Abalevi balyehinguliriza omukama mbaju zona, omuntu wena akwasire ebyokurwanisabye omu mukonogwe; kandi omuntu wena alitaha omu nju aitwe: kandi inywe mubege nomukama obwalitahamu, nobwalituruka. 8Nukwo Abalevi na Yuda yona bakora byona nka Yehoyada nyakatagara okuyaragire: bakwata omu omu abasaijabe, abo abokutahamu ha sabiti, hamu nabali abokuturuka ha sabiti; baitu Yehodaya nyakatagara akaba atayoherize abembu. 9Kandi Yehodaya nyakatagara akaha engabwa ezebikumi amacumu, nobugabu, nengabu, ebikaba biri byomukama Daudi, ebikaba biri omu nju ya Ruhanga. 10Kandi akataho abantu bona, omuntu wena akwasire ekyokurwanisakye omu ngaroze, okuruga ha rubaju rwenju orwobulyo, nokuhika ha rubaju rwenju orwemoso, haihi nekyoto nenju, nibehinguliriza omukama. 11Nubwo baturukya omwana womukama, bamutaho ekondo, bamuha ebiragiro ebyobwakaiso, bamufora omukama: kandi Yehoyada na batabanibe bamusesaho amagita; bagamba ngu Omukama ahangirize. 12Kandi Ataliya obuyahulire obwogo bwabantu abarukuiruka nibahaisaniza omukama, yaija hali abantu omu nju ya MUKAMA: 13yarora kandi dora, omukama akaba ayemerire ha nyomyo ye ha mulyango, nengabwa namakondere haihi nomukama; nabantu bona abensi basemererwa, nibatera amakondere; nabazini bakatera ebintu ebigamba, nibebembera okuzina okwokukugiza. Nubwo Ataliya yatemura engoyeze, yagamba ati Bwemi, bwemi. 14Yehodaya nyakatagara yaturukya engabwa ezebikumi ekikaba nizirema ihe, yabagambira ati Mumuturukye hagati yenyiri’ wena rukyeokumukuratira, aitwe na busitama: baitu ba nyakatagara bakagamba ngu Aleke okuitirwa omu nju ya MUKAMA. 15Nukwo bamuhigiza; yagenda omu muhanda nambere embarasi zitahira omu nju yomukama: kandi nuho bamuitire.

16Yehodaya yaraganzia ekiragano nauwe wenka nabantu bona, nomukama, babege abantu ba MUKAMA. 17Kandi abantu bona bakagenda hali enju ya Baali, bagisesa, bacwacwana ebyotobye nebisisinabye, baitira Mutani nyakatagara wa Baali omu maiso gebyoto. 18Kandi Yehodaya akataho abakuru ha nju ya MUKAMA hansi yomukono gwa banyakatagara Abalevi, Daudi abayataire omu nju ya MUKAMA, bahongera ebihongwa ebyokeze ebya MUKAMA, nkokukyahandikirwe omu biragiro bya Musa, nokusemererwa nokuzina, nkekiragiro kya Daudi okukikaba kiri. 19Yataho abakumirizi abenyigi zenju ya MUKAMA, omuntu wana aloho okutasemera habwekigambo kyona aleke okutahamu. 20Yatwara engabwa ezebikumi, nabanyoro, nabalemi babantu, nabantu bona abensi, yaihaho omukama omu nju ya MUKAMA: haraba omu irembo eryeruguru nibataha omu nju yomukama, bata omukama ha kitebe ekyobukama. 21Nukwo abantu bona abensi basemererwa, orubuga rwaculera: kandi bakaita Ataliya na busitama.