Swahili Bible2

21

1YEHOSAFATI yagwijagara na baisenkuru, yazikwa na baisenkuru omu rubuga rwa Daudi: Yehoramu mutabaniwe yalema omu kiikarokye. 2Kandi akabanyina bene babu tababani ba Yehosafati, Azaliya, na Yehyeri, na Zekaliya na Azaliya, na Mikaeri, na Sefatiya: abo bona bakaba bali batabani ba Yehosafati omukama wa Isareri. 3Kandi isebo akabaha ebisembo ebikoto, ebyefeza, nebyezabu, nebyebintu ebyomuhendo, nembuga eziroho muhuruzi omu Yuda: baitu obukama akabuha Yehoramu, baitu nuwe akabali omuzigaijo. 4Kandi Yehoramu obuyaimukire okulema obukama bwa ise, yatunga amani, yaita bene babu bona na busitama, nabaingi abomu babito ba Isareri. 5Yehoramu akaba ahikize emyaka asatu nebiri hayabandize okulema; yaelemera emyaka munana omu Yerusalemu. 6Kandi yegenderaga omu mihanda yakama ba Isareri, nkabenju ya Ahabu obubakozire: baitu akaswera omuhara wa Ahabu: yakoraga ekibi omu maiso ga MUKAMA. 7Baitu MUKAMA atagonze okuhwerekereza enju ya Daudi, habwekiragano ekiyaragaine na Daudi, kandi, nkokuyamuraganize okumuha etabaza uwe nabanabe ebiro byona. 8Omu birobye Edomu akemera omukono gwa Yuda, kandi bayeko’ra bonka omukama. 9Nubwo Yehoramu yayambuka nengabwaze, negalize zona hamu nauwe; yaimuka ekiro, yatema Abedomu abamwehingulirize, nengabwa ezegali. 10Nubwo Edomu yayemire ati omukono gwa Yuda, nokuhikya hati: na Libuna nubwo yayemire ati omukonogwe omu kasumi ako: baitu akafuruka MUKAMA, Ruhanga wa baisenkuru. 11Kandi akakora ebiikaro ebiraihire omu nsozi za Yuda, yayanjukya abomu Yerusalemu, kandi yahabisa Yuda. 12Kandi ekihindiko kyaija namberali ekyarugire hali Eriya nabi ati Nukwo MUKAMA Ruhanga wa Daudi ‘so agambire ati Baitu iwe togendire omu mihanda eya Yehosafati ‘so, nobuhokuba omu mihanda ya Asa omukama wa Yuda: 13baitu ogendire omu mihanda yabakama ba Isareri, kandi wayanjukya Yuda nabomu Yerusalemu, nkenju ya Ahabu okuyakozire; kandi waita bene babu abomu nju ya ‘so, abakukizire oburungi: 14dora MUKAMA alitera norufu rwingi abantu bawe, nabana bawe, na bakazi bawe, nebintu byawe byona: 15kandi olitunga okurwara kwingi habwendwara yamara gawe, okuhikya amara gawe obugalikurugamu habwendwara yawe ebiro byona. 16Kandi MUKAMA akaimukya omwoyo Gwabafirisiti nogwa Abarabu abarukuhe’rana Abanyesyopia okurwana na Yehoramu: 17baija okuramagira Yuda, bagisesera, baihaho ebintu byona ebyasangirwe omu nju yomukama, na batabanibe na bakazibe; nokusigaraho hatasigareho mutabani namberali, rundi Yehoahazi, mutabaniwe omuto. 18Hanyuma yebi byona MUKAMA akamutera omu marage orufu orutarukukizibwa. 19Kandi kyahika ebiro obubyahinguireho, nokuhikya emyaka ebiri, amarage gamurugamu habwendwaraye, yafa endwara enyingi muno. Kunu abantube batamwote’re ebiboya, nkokubayote’raga baisenkuru. 20Akaba ahikize emyaka asatu nebiri hayabandize okulema, yalemera emyaka munana omu Yerusalemu: yarugaho atarukugonzebwa abantu: bamuzika omu rubuga rwa Daudi, baitu tihali omu gasani zabakama.