Swahili Bible2

20

1KANDI kyahika hanyuma yebi abana ba Moabu, abana ba Amoni, kandi hamu nabo abamu hali Abamoni, baramagira Yehosafati okurwana. 2Kandi abantu bakaija bagambira Yehosafati ngu Ekitebe kingi nikiija okukuramagira ekyarugire nseri yenyanja omu Aramu; kandi dora, bali omu Hazazoni-tamara (egi niyo Enigedi.) 3Yehosafati akatina, yayekamba okuse’ra MUKAMA; yaduma okusiba omu Yuda yona. 4Kandi aba Yuda bakesoroza hamu okuse’ra MUKAMA: bakaruga omu mbuga zona za Yuda okuse’ra MUKAMA. 5Kandi Yehosafati akeme’ra ou kuso’rokana kwa Yuda na Yerusalemu, omu nju ya MUKAMA, omu maiso gezigati empyaka; 6yagamba ati Aim MUKAMA, Ruhanga wabaisenkuru itwe, tiniwe Ruhanga womu iguru? kandi tiniwe omulemi okulema obukama bwona obwamahanga? kandi omu mukono gwawe numwo harumu obusobozi namani, kandi busaho arukusobora okukutanga. 7Tiniwe, Ai Ruhanga waitu, wabingiremu abantu abomu nsi enu omu maiso gabantu bawe Isareri, kandi wagiha oruzaro rwa Iburahimu enganjani yawe okuhikya ebiro byona? 8Kandi bakaikamu, bakwombekeramu harukwera habwibara lyawe, nibagamba ngu 9Rundi akabi obukalituizira, busitama, rundi ebyomusango, rundi orufu, rundi ekihe, tulyeme’ra omu maiso genju enu, nomu maiso gawe, (baitu ibaralyawe liri omu nju enu,) kandi tulikunga omu muhito gwaitu, naiwe olihu’ra kandi olijuna. 10Kandi hati bunu, dora, abana ba Amoni na Moabu norusozi Seyiri, abawayangire Isareri okubarwanisa, obubarugireyo omu nsi ya Misiri, baitu bakakubuka okubarugaho. batabahwerekereza; 11dora, okubatusasura, nibaija okutubinga omu butaka bwaitu obuwatuhaire okugwetwa. 12Ai bambi Ruhanga waitu, tolibacwera omusango? baitu itwe titunyina amani okurwana nekitebe kinu ekingi ekirukuija okurwana naitwe; kunu titurukumanya ekitulikora: baitu amaiso gaitu gali haliwe. 13Kandi aba Yuda bona bakeme’ra omu maiso ga MUKAMA, hamu na abana babu abato, na bakazi babu, nabana babu. 14Nubwo omwoyo gwa MUKAMA gwaizira Yahazyeri mutabani wa Zekaliya, mutabani wa Benaya, mutabani wa Yeyeri, mutabani wa Mataniya, Omulevi, owomu batabani ba Asafu, hagati yekitebe; 15yagamba ati Muhu’re inywe, Yuda yona, nainywe abomu Yerusalemu, naiwe omukama Yehosafati: nukwo MUKAMA abagambire ati Mutatina, kunu mutafobe’ra habwekitebe eki ekingi; baitu obulemu tibuli bwanyu, baitu bwa Ruhanga. 16Ijo mulisirimuka namberebali: dora, nabatemba omu ntembotembo ya Zizi; kandi mulibasanga nambere ekihanga kirukugarukira, omu maiso girungu lya Yeruweri. 17Tikiriba kigambo kyanyu okurwana obulemu obu: mwesimbe inywenka, murole okujuna kwa MUKAMA namberemuli, inywe Yuda na Yerusalemu: mutatina, nobukwakuba okufobe’ra: ijo mulibaramagira; baitu MUKAMA ali nainywe. 18Yehosafati yainamya omutwegwe namaisoge hansi: na Yuda yona nabomu Yerusalemu bagwa hansi omu maiso ga MUKAMA, nibaramya MUKAMA. 19Kandi Abalevi, abomu bana Bakakohasi nabomu bana Bakakorahi, baimuka okukugiza MUKAMA, Ruhanga wa Isareri, niraka erihango muno. 20Kandi baimuka nyenkya nibazinduka, bagenda omu irungu lya Tekoa: kandi obubakaba nibaturuka, Yehosafati yayeme’raho yagamba ati Mumpu’re iwe Yuda, nainywe abomu Yerusalemu; muikirize MUKAMA Ruhanga wanyu, nukwo muligumibwaho muti; muikirize banabibe, nukwo mulibona omugisa muti. 21Kandi obuyahanuire nabantu yabataho bazinire MUKAMA, bakugize oburungi obwokuhiki’ra, obubaraturuka omu maiso gihe nibagamba ngu Musime MUKAMA; baitu okuganyirakwe kwebiro nebiro. 22Kandi obubatandikire okuzina nokukugiza, MUKAMA yataho abokugwera abana ba Amoni, na Moabu, norusozi Seyiri, abaizire okurwana na Yuda; batemwa. 23Baitu abana ba Amoni na Moabu bakaimuka okurwana nabomu rusozi Seyiri, okuitira kimu nokubahwerekereza: kandi obubamazireho abomu Seyiri, bakonyeragana okuhwerekerezangana. 24Kandi aba Yuda obubahikire hali orukomero orwokulinda orwomu irungu, bakarole’ra ekitebe; kandi dora, bakaba bali emitumbi kwonka egwire ha itaka, kandi busaho nomu ayakizire. 25Kandi Yehosafati nabantube obubaizire okubaihaho eminyago, basanga omulibo itungo lingi nemitumbi mingi, nebintu ebyomuhendo ebibayeyihire bonka, okukira ebibasoboire okutwara: bakamara ebiro bisatu nabaihaho eminyago, ekaberi mingi eti. 26Kandi ha kiro kyakana bayesoroleza omu kihanga kya Beraka; baitu nuho basimire MUKAMA: nikyo ekiikaro eki kyayetirwe ngu Ekihanga kya Bereka, nokuhikya hati. 27Nubwo bagaruka, omuntu wena owa Yuda na Yerusalemu, na Yehosafati omu maiso gabu, okugarukayo Yerusalemu nokusemererwa: baitu MUKAMA akabaha okusemererwa ha banyanzigwa babu. 28Baija Yerusalemu nendongo nenanga namakondere hali enju ya MUKAMA. 29Kandi okutina Ruhanga kwahika ha bukama bwona obwensi, obubahulire MUKAMA arwana nabanyanzigwa ba Isareri. 30Nukwo obukama bwa Yehosafati bwatunga okuculera, baitu Ruhangawe akamuha okuhumura ha mbaju zona.

31Kandi Yehosafati akalema Yuda: akaba ahikize emyaka asatu netano hayabandize okulema: yalemera emyaka abiri netano omu Yerusalemu: nibara lya nyina nuwe Azuba omuhara wa Sirihi. 32Kandi akagendera omu muhanda gwa Asa ise, atahunguke okugurugamu, yakora ebirungi omu maiso ga MUKAMA. 33Baitu ebiikaro ebirahire bitahweho; kunu abantu bakaba batakagumize emitima yabu hali Ruhanga wabaisenkurubo. 34Kandi ebigambo ebindi ebya Yehosafati, ebyokubanza nebya hanyuma, dora, bihandikirwe omu bigambo bya Yehu mutabani wa Hanani, ekiteranizibwe nekitabu kyabakama ba Isareri.

35Hanyuma yebi Yehosafati omukama wa Yuda akaterana na Ahaziya omukama wa Isareri; ogu akakora kubi muno: 36Yaterana nauwe okukora ebyombo ebyokugenda Tarasisi: bako’ra ebyombo Ezioni-gebere. 37Nubwo Eryeza mutabani wa Doda-vahu owa Malisa yaragu’ra ha Yehosafati nagamba ati Baitu oteraine na Ahaziya, MUKAMA nikyo ahwerekerize emirimo yawe. Ebyombo byacweka, bitasobole okugenda Tarasisi.