Swahili Bible2

2

1KANDI Sulemani akamali’ra okwombeka enju habwibara lya MUKAMA, nenju habwobukamabwe. 2Sulemani yakomamu abantu bukumi musanju okwetweka ebintu, nabantu bukumi munana abakaba bali bokutema omu nsozi, nabantu enkumi isatu mu rukaga okubarole’ra. 3Sulemani yatumira Huramu omukama wa Turo nagamba ati Nkokuwakozire na Daudi isenyowe, kandi wamutwekera enju eyokuikaramuga, nukwo okole oti nanyowe. 4Dora, ninyombeka enju habwibara lya MUKAMA Ruhanga wange, ngimusoro’re namberali, nokwotera omu maisoge emyami’ro erukuboya kurungi, kandi habwemigati eyokwoleka eyobutosa, kandi habwebihongwa ebyokeze nyenkya na kairirizi, ha sabiti, kandi okwezi okuboneka, kandi ha bugenyi obwatairweho obwa MUKAMA Ruhanga waitu. Kinu nikyo kiragiro hali Isareri ekyebiro byona. 5Kandi enju eyindukwombeka nkuru: baitu Ruhanga waitu mukuru orukira abacwezi bona. 6Baitu noha arukusobora oku mwombekera enju, baitu iguru niguru erirukukira iguru tirirukusobora okumumara? Ninyowe oha, nyowe okumwombekera enju, rundi okwote’ra emyami’ro omu maisoge, nikyo kyonka? 7Nukwo hati bunu, ontumire omuntu anyakunyina amagezi okukora ezabu nefeza, nemiringa, nebyoma, nengoye ezirukugajuka, nezirukunanata, neza bu’ru, kandi anyakusobora okusasura byona ebisarurwa, okuikara nabantu abamagezi abali hamu nanyowe omu Yuda nomu Yerusalemu, Daudi isenyowe abayatekanize. 8Kandi ontwekere emiti emikogoto, nensambya, nemiti aligumu eyomu Lebanoni: baitu manyire nti abairu bawe nibetegereza okusaea emiti omu Lebanoni; kandi dora, abairu bange barabaga nabairu bawe, okuntekaniriza emiti nyingi muno: 9baitu enju eyindukugenda okwombeka eriba nkuru muno. 10Kandi dora, ndiha abairu bawe, abatemi abarukutema emiti, ebirengo bukumi bubiri ebyengano empule, nentungiro zamarwa bukumi bubiri ebyengano empule, nebirengo bukumi bubiri ebya sayiri empule, nentugiro zamarwa bukumi bubiri, nentugiro zamagita bukumi bubiri. 11Kandi Huramu omukama wa Turo yahandika nagarukamu, yagitweka Sulemani ati Baitu MUKAMA nagonza abantube, nikyo akufolire omukama wabu. 12Kandi Huramu yagamba ati MUKAMA ASIMWE, Ruhanga wa Isareri, ayokozire iguru nensi, ayahaire Daudi omukama omwana owamagezi, owokumanya nokwetegereza, ayombekere MUKAMA enju, kandi enju habwobukamabwe. 13Kandi hati bunu nyowe ntumire omuntu owamagezi, owokumanya, owa Huramu isenyowe, 14omwana womukazi, womu bahara ba Dani, kandi ise akabali omuntu owa Turo, owokwetegereza okukora nezabu, nefeza, nemiringa, nebyoma, namabale, nemiti, nengoye ezirukugajuka, neza bu’ru, nekitani esemire, nengoye ezirukutukura; kandi owokusarura byona ebisarurwa, nokucwere’ra amagezi gona: nukwo atunge ekiikaro hamu nabantu bawe abamagezi, nabantu abamagezi aba mukama wange Daudi ’so. 15Nukwo hati bunu, engano nesayiri, namagita namarwa, mukama wange ebiyagambireho, abitwekere abairube: 16kandi itwe tulitema emiti omu Lebanoni, yona eyoligonza: kandi tuligikuletera ntugiboha nkebibaya omu nyanja hali Yopa; kandi iwe oligitwara Yerusalemu. 17Sulemani yabara abanyaihanga bona abakaba bali omu nsi ya Isareri, nkokubara kwa Daudi ise okukukaba kuli obuyababazire; kandi bakazoka bali kasirira mu bukumi butano, enkumi isatu mu rukaga. 18Yataho bukumi musanju halibo okuhimba ebintu, nobukumi munana okuba abarukutema omu nsozi, nabarolerezi enkumi isatu mu rukaga okukoza abantu.