Swahili Bible2

18

1LERO Yehosafi akabanyina obuguda nekitinisa muno muno; yaswera omwa Ahabu. 2Kandi emyaka obuyahinguireho yasirimuka, hali Ahabu omu Samariya. Ahabu yamuitira entama nente nyingi muno, nabantu abakabanyinabo, yamusonasona okuramagira Ramosi-gireadi hamu nauwe. 3Ahabu omukama wa Isareri yagambira Yehosafati omukama wa Yuda ati Oligenda nanyowe Ramosi-gireadi? yamugarukamu ati Nyowe ndi nkaiwe, abantu bange nkabantu bawe: kandi tuliba hamu naiwe omu bulemu. 4Yehosafati yagambira omukama wa Isareri ati Kaguza, nkwesengerize, ekigambo kya MUKAMA hati. 5Nubwo omukama wa Isareri yasoroza hamu banabi, abasaija bikumi bina, yabagambira ati Turamage Ramosi-gireadi okurwana, rundi ndeke? bagamba ngu Ramaga; baitu Ruhanga aligihayo omu mukono gwomukama. 6Baitu Yehosafati yagamba ati Hanu tiharoho na nabi wa MUKAMA, itwe tumukaguze? 7Omukama wa Isareri yagambira Yehosafati ati Hasigaireho omuntu omu outusobora okukaguza MUKAMA: baitu nimunoba; baitu tandagu’ra birungi ebiro byona, baitu obubi obutosa: ogu nuwe Mikaya mutabani wa Imura. Yehosafati yagamba ati Omukama aleke okugamba ati. 8Nubwo omukama wa Isareri yayeta omuduma, yagamba ati Taba’ra bwango Mikaya mutabani wa Imura. 9Kandi omukama wa Isareri na Yehosafati omukama wa Yuda bakaika’ra ha bitebe byabu omu omu, bajwaire engoye zabu omu kiikaro ekigalihire ha irembo eryomusongo’ro gwa Samaliya; banabi bona nibaragu’ra omu maiso gabu. 10Kandi Zedekiya mutabani wa Kenaana akeko’ra amahembe gebyoma nagamba ati Nukwo MUKAMA agambire ati Na ganu olicumiriza Abaaramu okuhikya obubalihwerekere’ra. 11Na banabi bona nukwo baraguire bati nibagamba ngu Ramaga Ramosi-gireadi, otunge omugisa: baitu MUKAMA aligihayo omu mukono gwomukana. 12Nomukwenda ayagenzire okweta Mikaya yamugambira ati Dora, ebigambo byabanabi nibitebeza ebirungi hali omukama nkakanwa kamu: nkwesengerize ekigambo kyawe kisisane nekigambo kyomu halibo, nogamba ebirungi. 13Mikaya yagamba ati Nka MUKAMA okwali omwomezi, eki Ruhanga wange ekyagamba nikyo ndagamba. 14Kandi obuyaizire hali omukama, omukama yamugambira ati Mikaya turamage Ramosi-gireadi okurwana, rundi ndeke? Yagamba ati Muramage, mutunge omugisa; kandi balihabwayo omu mukono gwanyu. 15Omukama yamugambira ati Ndakurahiza emirundi ingaha, okutantebeza na kake ekitali kyamazima omu ibara lya MUKAMA? 16Yagamba ati Nkarora Isareri yona bararangire ha nsozi, nkentama ezitanyina mulisa: MUKAMA yagamba ati Banu tibanyina mukama; bona bagarukeyo omuntu wena omu njuye nobusinge 17Omukama wa Isareri yagambira Yehosafati ati Tinkugambire nti Tandagu’re ebirungi, baitu obubi? 18Kandi akagamba ati Nukwo muhu’re ekigambo kya MUKAMA: mboine MUKAMA aikalire ha kitebekye, nihe ryona eryomu iguru lyemerire namberali ha mukonogwe ogwobulyo na ha gwemoso. 19MUKAMA yagamba ati Noha arabihabiha Ahabu omukama wa Isareri, aramage agwe Ramosi-gireadi? omu yagamba kundi, nomu yagamba kundi. 20Kandi harugayo omwoyo, gwayeme’ra omu maiso ga MUKAMA nugugamba ngu Nyowe ndamubihabiha. MUKAMA yagugambira ati Ota? 21gwagamba guti Ndagenda ninfoka omwoyo ogwebisuba omu kanwa kabanabibe bona. Yagamba ati Oramubihabiha, kandi orasingura: genda, okole oti. 22Nukwo orole, MUKAMA ataire omwoyo ogwebisuba omu kanwa kabanabi bawe banu; kandi MUKAMA agambira kubi haliwe. 23Nubwo Zedekiya mutabani wa Kenaana yai’ra haihi, yatera Mikaya ha rusaya, nagamba ati Omwoyo gwa MUKAMA gukandabaho guta okubaza naiwe? 24Mikaya yagamba ati Dora, olirora ha kiro eki obwoligenda omu kisika kyomunda okwesereka. 25Omukama wa Isareri yagamba ati Mutwale Mikaya, mumuga’reyo hali Amoni, omulemi worubuga, na hali Yoasi omwana womukama; 26mugambe muti Nukwo omukama agambire ati Mute ekisaija kinu omu nju yenkomo, mukirise ebyokulya ebyomuhito namaizi gomuhito, okuhikya obundigaruka nobusinge. 27Mikaya yagamba ati Okugaruka obwoligaruka nobusinge, buli MUKAMA tagambire omuli nyowe. Yagamba ati Muhu’re inywe amahanga gona.

28Nukwo omukama wa Isareri na Yehosafati omukama wa Yuda baramaga Ramosi-gireadi. 29Omukama wa Isareri yagambira Yehosafati ati Nyowe ndayefora okundi, ningenda okurwana; baitu iwe ojwale ebyokukwara byawe. Omukama wa Isareri yayefora okundi; bagenda okurwana. 30Lero omukama wa Aramu akaragira engabwa ezegalize nagamba ati Mutarwana nabato nobubakuba abakuru, baitu nomukama wa Isareri wenka. 31Kandi kyahika, engabwa zegali obubaboine Yehosafati, bagamba ngu Ogu nuwe mukama wa Isareri. Nikyo bakubukira okurwana nauwe: baitu Yehosafati yayami’ra, MUKAMA yamukonyera; Ruhanga yababinga bamurugeho. 32Kandi kyahika, engabwa ezegali obubaboine tali mukama wa Isareri, bagarukayo enyuma nibaleka okumuhondera. 33Kandi omuntu omu rusaro, yarasa omukama wa Isareri nambere ebijwaro byebyoma biteranira: nikyo yagambirire omutwazi wegali ati Hindura omukono gwawe, onyihe omu ihe; baitu mputaire muno. 34Okurwana kwayeyongera ha kiro kiri: baitu omukama wa Isareri bakamusagika omu galiye okurwana Nabaaramu okuhikya akairirizi: kandi izoba obulyagwire akafa.