Swahili Bible2

17

1KANDI Yehosafati yalema omu kiikarokye, yayegumya wenka okurwana na Isareri. 2Yataho abaserikale mu mbuga zona eza Yuda eziroho muhuruzi, yataho abokulinda omu nsi ya Yuda, nomu mbuga za Eferaimu, Asa ise eziyanyagire. 3MUKAMA yaikara na Yehosafati, baitu akagendera omu ngeso ezokubanza eza Daudi isenkuru, atase’re Baalimu; 4baitu akase’ra Ruhanga wa ise, yagendera omu biragirobye, kunu atahondere engeso za Isareri. 5Nikyo MUKAMA yagumizeho obukama omu mukonogwe; aba Yuda bona baletera Yehosofati ebirabuko; yatunga obugunda nekitinisa muno muno. 6Kandi omutimagwe gukanyumizibwa omu ngeso za MUKAMA: kandi yaihaho ebiikaro ebiraihire na Aserimu omu Yuda. 7Kandi omu mwaka gwobusingebwe ogwakasatu akatuma abakurube, Beni-hairi, na Obadiya, na Zekaliya, na Netaneri, na Mikaya okwegesa omu mbuga za Yuda; 8kandi hamu nabo Abalevi, Semaya, na Netaniya, na Zebadiya, na Asaheri, na Semiramosi, na Yehonasani, na Adoniya, na Tobiya, na Tobadoniya, Abalevi; kandi hamu nabo Erisama na Yehoramu, banyakatagara. 9Bayegesa omu Yuda, banyina ekitabu ekyebiragiro bya MUKAMA hamu nabo; bagendagenda hona omu mbuga zona eza Yuda, bayegesa omu bantu. 10Kandi okutina MUKAMA kwagwa ha bukama bwona obwensi ezahe’raine Yuda, nukwo baleka okurwana na Yehosafati. 11Kandi Abafiristi abamu bakaletera Yehosafati ebisembo, nefeza ezomusoro; Nabarabu bakamuletera embuzi, entama empaya kasanju mu rusanju, nembuzi empaya kasanju mu rusanju. 12Yehosafati yafoka omukuru muno; yayombeka omu Yuda enkomero nambuga ezamahuro. 13Kandi akabanyina emirimo nyingi omu mbuga za Yuda; nabasaija bokurwana, abasaija bamani abobumanzi, omu Yerusalemu. 14Kandi okubara omuhendo gwabu nkenju zabaisebo okuziri nkunu: abomu Yuda, engabwa ezenkumi; Adina engabwa, kandi hamu nauwe abasaija bamani abobumanzi busirira busatu: 15kandi okukuratira uwe Yehohanani engabwa, kandi hamu nauwe busirira bubiri mu bukumi munana; 16kandi okukuratira ogu Amasiya mutabani wa Zikiri, ayayehongere nagonza hali MUKAMA; kandi hamu nauwe abasaija bamani abobumanzi busirira bubiri: 17nabomu Benyamini; Eryada omusaija wamani owobumanzi, kandi hamu nauwe busirira bubiri abakwasire obuta nengabu: 18nokukuratira ogu Yehozabadi, kandi hamu nauwe kasirira mu bukumi munana abetekanize okurwana. 19Nibo baherezaga omukama, okutabaraho abo omukama abayataire omu mbuga eziroho muhuruzi omu Yuda yona.