Swahili Bible2

25

1KANDI Samuiri akafa; Abasareri bayesoroza hamu, bamuli’ra bamuzika omu njuye Rama. Daudi yaimuka yasirimuka hali irungu lya Parani. 2Kandi hakaba haroho omusaija omu Maoni, nobutakabwe bukaba bulu Karameri; omusaija ogu akabali omukuru mali, akabanyina entama enkumi isatu, nembuzi enkumi isatu: uwe akaba nasara ebyoya byentamaze omu Karameri. 3Kandi ibara lyomusaija ogu nuwe Nabali; nibara lya mukaziwe nuwe Abigari: kandi omurungi ha maiso: baitu omisaija akabali witima, kandi owengeso embi; akabali womu nju ya Kalebu. 4Kandi Daudi akahu’ra omu irungu ngu Nabali nasara ebyoya byentamaze. 5Daudi yatuma abasigazi ikumi, Daudi yagambira abasigazi abo ati Mutembe Karameri, mugende hali Nabali, mumuramukye omu ibara lyange: 6kandi muragambira ogu arukuikara kurungi muti Obusinge bube haliwe, kandi obusinge bube hali enju yawe, kandi obusinge bube hali byona ebyonyinabyo. 7Mpulire ngu oyina ebasazi bebyoya byentama: abalisa bawe babaire nibaikara hamu naitwe, kunu titubakozire kubi, kunu bataburwe kantu ebiro byona obubaikaraga Karameri. 8Kaguza abasigazi bawe, balikutebeza: leka abasigazi babone embabazi omu maiso gawe; baitu tuizire omu kasumi akarungi: obahe, nkwesengerize abairu bawe eki ekirasangwa omu mukono gwawe nomwana wawe Daudi. 9Abasigazi ba Daudi obubaizire, bagambira Nabali nkebigambo ebi byona okubiri omu ibara lya Daudi, baculera. 10Nabali ya garukamu abairu ba Daudi ati Daudi noha? Ebiro binu abairu baingi nibacwa nibairuka omuntu wena mukamawe. 11Nyowe nditwara omugati gwange, namaizi gange, nenyama yange eyinaitire abasazi bebyoya bange, ndigiha abasaija abantarukumanyaho owabu? 12Nukwo abasigazi ba Daudi bakubutuka, bagarukayo, baija nibamutebeza nkebigambo ebi byona okubiri. 13Daudi yagambira abasaijabe ati Muhagataire inywena busitama zanyu. Bahagatira omuntu wena busitamaye; hakuratira Daudi abasaija nkebikumi bina; nebikumi bibiri bakaikara hamu nebintu. 14Baitu omu hali abasigazi yatebeza Abigari muka Nabali nagamba ato Dor, Daudi akatuma abakwenda abarugire omu irungu okuija okuramukya mukama waitu; yabacomera. 15Baitu abasaija bakatugira kurungi mali, tutaswazibwe, kunu tutaburwe kantu obutwateranaga nabo, obutwaikaraga omu iswa: 16Bakasisana namberetuli nkorukomera ekiro na nyamusana, ebiro byona obutwaikaraga nabo ntulisa entema. 17Nukwo hati bunu, tekereza, orole ekyorakora; baitu bamalirire okukora kubi mukama waitu nenjuye yona: baitu uwe musaija mubi ati okusoboka tikisoboka okubaza nauwe. 18Nubwo Abigairi yarahuka, yatwara emigati bikumi bibiri, nendyanga zamarwa ibiri, nentama itano itegekerwe, nebigega bitano ebyenkole, nemigimba yemizabibu kikumi bibiri, kandi yabitweka hankaina. 19Yagambira abasigazibe ati Munyebembere omu maiso; dora, nimbakuratira. Baitu atagambire iba Nabali. 20Kandi nabasaijabe bakasirimuka namberali: yabaitirana. 21Kandi Daudi akaba agambire ati Mazimakwo nkalindira busa byona omuntu onu ebyanyinabyo omu irungu, nokubura tihabuzireho kintu kyona ha byona ebikaba biri bye: kandi angarulire ebibi omu kiikaro kyebirungi. 22Ruhanga akole ati abanyanzigwa ba Daudi, kandi nokukiraho, obundaba ninsigazaho okuhikya nyenkya omwana musaija nomuha bona abanyinabo. 23Kandi Abigairi obuyaboine Daudi yayanguha, yaruga ha nkainaye, yagwa ajumaire omu maiso ga Daudi, yainama hansi. 24Yagwa ha bigerebye nagamba ati Okusisa kube hali nyowe mukama wange, kube hali nyowe: leka omuzana wawe, nkwesengerize agambe omu matu gawe, naiwe ohu’re ebigambo byomuzana wawe. 25Mukama wange, nkwesengerize, aleke okuta omutima ha musaija onu omubi, Nabali: baitu nkibaralye okuliri nukwo ali; Nabali niryo ibaralye, kandi obudomadoma buli nauwe: baitu muzana wawe ntabone abasigazi ba mukama wange abotumirege. 26Nukwo hati bunu mukama wange, nka MUKAMA okwali omwomezi, nobwomezi bwawe nkokubuli, baitu MUKAMA esagama nokweho’ra wenka enzigu nomukono gwawe, nukwo hati bunu leka abanyanzigwa bawe, nabo abaseru’ra okubi mukama wange, bafoke nka Nabali. 27Nekisembo kinu omuiru wawe ekyaletire mukama wange, leka bakihe abasigazi abarukukuratira mukama wange. 28Ganyira, nkwesengerize, okusisa kwomuzana wawe: baitu mazimakwo MUKAMA alifora mukama wange enju egumireho, baitu mukama wange narwana obulemu bwa MUKAMA, kandi ekibi tikirizoka omuliwe ebiro byawe byona. 29Nobwomuntu alimuka okukuhiga, nokuse’ra obwomezi bwawe, obwomezi bwa mukama wange bulibohwa omu kiba kyo bwomezi hamu na MUKAMA Ruhanga wawe; nobwomezi bwa banyanzigwa bawe alibuhungura nkomuhanda yomwesuso. 30Kandi kirihika, MUKAMA obwalikakora mukama wange nkebirungi byona ebiyakugambireho, kandi obwalikakutaho okuba omukuru okulema Isareri; 31kinu tikirikutuntuza, nobukwakuba okubihiza omutima gwa mukama wange, iwe okusesera busa esagama, rundi mukama wange okwoho’ra enzigu: kandi MUKAMA obwalikagira kurungi mukama wange, nubwo oliijuka omuzana wawe. 32Daudi yagambira Abigairi ati Akugizibwe MUKAMA Ruhanga wa Isareri, akutumirege ekiro kinu okunyitirana: 33namagezi gawe gakugizibwe, naiwe okugizibwe, baitu ontangire hati hali omusango gwesagama, nokweho’ra nyenka enzigu nomukono gwange nyenka. 34Baitu mazimakwo nka MUKAMA Ruhanga wa Isareri okwali omwomezi, antangire okutakukora kubi, obwotarahukire okuija okunyitirana, mazimakwo tihakusigaireho ha Nabali okuhikya nyenkya nobukakuba akasaija kamu. 35Nukwo Daudi yahabwa ha mukonogwe eki ekiyamuletire: yamugambira ati Temba nobusinge hali enju yawe; dora, mpulire iraka lyawe, kandi nyikirize iwe wenka. 36Abigairi yaija hali Nabali; kandi dora, akaba nalya obugenyi omu njuye, nkobugenyi bwomukama; omutima gwa Nabali gwasemererwa omundaye, baitu akatamira muno: nikyo yalemera okumutebeza ekigambo nekimu, okuhikya nyenkya. 37Kandi kyahika nyenkya, amrwa obugarugireho Nabali, mukaziwe yamutebeza ebigambo ebi, omutimagwe gwafera omundaye, yafoka nkibale. 38Kandi kyahika ebiro ikumi obu byahinguireho, MUKAMA, yatera Nabali, yafa. 39Daudi obuyahulire Nabali afire yagamba ati Akugizibwe MUKAMA, atongaine omusango gwokujumwa kwange hali omukono gwa Nabali, kandi atangire omuiruwe atakora kubi: okusisa kwa Nabali MUKAMA akumugarulire ha mutwegwe wenka. Daudi yatuma okubaza na Abigairi ebyokumuswera. 40Abairu ba Daudi obubaizire hali abigairi omu Karameri, babaza nauwe nibagamba ngu Daudi atutumire namberoli, akutwale akuswere. 41Yaimuka yainamya amaisoge hani yagamba ati Dora omuzana wawe aba muiru kwonka okunabisa ebigere byabairu ba mukama wange. 42Abigairi yarahuka yaimuka, yatemba enkaina, hamu nabaisikibe batano abamukuratire: yakuratira abakwenda ba Daudi, yaba mukaziwe. 43Daudi yatwara na Ahinoamu owa Yezereri; bafoka bombi bakazibe. 44BAITU Saulo akaba ahaire Mikali omuisikiwe, muka Daudi, hali Paliti mutabani wa Laisi, owa Galimu.