Swahili Bible2

15

1KANDI Samuiri yagambira Saulo ati MUKAMA nuwe yantumire okukusesaho amagita okuba omukama wabantu Isareri: nukwo hati bunu, hu’ra iraka eryebigambo bya MUKAMA. 2Nukwo agambire MUKAMA wamahe ati mboine eki Amaleki ekiyakozire Isareri, okuyamuimukirire omu misiri. 3Nukwo, genda oteme Amaleki, ohwerekerereze kimu byona ebibanyinabyo, otalibaganyira; baitu ita abasaija na nabakazi, abenkerembe nabarukwonka, ente nentama, engamira nenkaina.

4Saulo yayeta abantu yababara omu Teraimu, abagenda nebigere busiriria bubiri, nabasaija ba Yuda kakumi. 5Saulo yahika ha rubuga rwa Ameleki, yabagwera omu kihanga. 6Kandi Saulo yagambira abakeni ati Murugeho, mugende, musirimuke okuruga omu Bamaleki, ndeke okubahwerekereza hamu nabo: baitu inywe mukagi’ra embabazi abana bona aba Isareri, obubarugireyo omu Misiri. Nukwo Abakeni barugayo ha gati omu Bamaleki. 7Saulo yatema Abameleki, okuruga Havira nkokwogenda Sura, erolerire Misiri. 8Yahamba Agagi omukama Wabameleki ali mwomezi, yahwerekerereza kimu abantu bona nobwogi bwa busitama. 9Baitu Saulo nabantu bakaganyira oburungi, nomu nte nomu bisajwa, nomu butama, nomu burungi byona, batagonze okubihwerekerereza kimu: baitu byona ebikaba biri bibi nebinugwa, ebi bakabihwerekerereza kimu.

10Nubwo ekigambo kya MUKAMA kyaija hali Samuiri ngu 11Nyeyijukize baitu nkataho Saulo okuba omukama: baitu agarukireyo enyuma okutampondera, kunu tahikireze ebiragiro byange. Samuiri yabihirwa; yakunga MUKAMA ekiro okukiisa obuire. 12Kandi Samuiri akaimuka nyenya kara oku itirana Saulo obuire bukire; kyagambirwa Samuiri ngu Saulo akaija Karameri, kandi dora, yayeteraho ibale, yahinguraho yagenda yasirimukira Girigali. Samuiri yaija hali Saulo: 13Saulo yamugambira ati Ohabwe hali MUKAMA: mpikirize ekiragiro kya MUKAMA. 14Samuiri yagamba ati Mara makuru ki agokujuga kwentama omu matu gange, nokuhoronga kwente okundukuhu’ra? 15Saulo yagamba ati Babiihirer omu Bamaleki: baitu abantu bakaganyira eburungi omu ntama nomu nte okusa’ra ebyonzira MUKAMA Ruhanga wawe; nebindi ebyasigaireho tukabihwerekerereze kimu. 16Nubwo Samuiri yagambira Saulo ati Banzoleke, nyowe nkutebeze MUKAMA ekiyagambirege ekiro kinu. Yamugambira ati Gamba. 17Samuiri yagamba ati Nobwokaba oli muto omu maiso gawe wenka otafoke omutwe ogwenganda za Isareri? Kandi MUKAMA akakusesaho amagita okuba omukama wa Isareri; 18kandi MUKAMA yakutuma orugendo, nagamba ati Genda ohwerekerereze kimu abasisi Abamaleki, orwane nabo okubamaraho. 19Nukwo okabaki okuhu’ra iraka lya MUKAMA, baitu okanyaga eminyago, wakora ekibi omu maiso ga MUKAMA.? 20Saulo yagambira Samuiri ati Ego, nkahu’ra iraka lya MUKAMA, nagendera omu muhanda nambere MUKAMA yantumire, kandi ndesere Agagi omukama Wabamaleki, kandi mperekererize kimu abamaleki. 21Baitu abantu bakatwara ha minyago, omu ntam, nomu nte, ebikuru omu bintu byokuhwereker’ra, okusa’ra ebyonzira MUKAMA Ruhanga wawe omu Girigali. 22Samuiri yagamba ati MUKAMA nasemererwa ebihongwa ebyokeze nebyonzira okuinangana okuhu’ra iraka lya MUKAMA? Dora okworoba nukuhu’ra nukukira ebyonzira, nokuhu’ra nukukira ebisajwa byempaya. 23Baitu obwemi buli nkekibi kyoburogo, nokugumangana kuli nkokuramya ebisisani na terafimu. Baitu iwe okanga ekigambo kya MUKAMA, nikyo uwe akwangire okutaba omukama. 24Saulo yagambira Samuiri ati Nsisire: baitu nkasobya ekiragiro kya MUKAMA, nebigambo byawe: baitu nkatina abantu, nahu’ra iraka lyabu. 25Nukwo nkwesengerize, ondekere ekibi kyange, ogaruke nanyowe, ndamye MUKAMA. 26Samuiri yagambira Saulo ati Tingaruke kya MUKAMA, kandi MUKAMA ayangire iwe okutaba omukama okulema Isareri. 27Kandi Samuiri obuyahindukire okugenda yakwata ha kyebu kyorugoyerwe, rwatemuka. 28Samuiri yamugambira ati MUKAMA akutemuireho obukama bwa Isareri hati, kandi abuhaire omutahi wawe, arukukira iwe oburungi. 29Kandi Amani ga Isareri talibiha ebisuba nobukwakuba okwegarukamu: baitu tali muntu okwegarukamu. 30Nukwo yagamba ati Nsisire: baitu onteho ekitinisa hati bunu nkwesengerize, omu maiso gabakuru babantu bange, nomu maiso ga Isareri; kandi ogaruke nanyowe, ndamye MUKAMA Ruhanga wawe. 31Nukwo Samuiri yagarukira Saulo; Saulo yaramya MUKAMA. 32Nubwo Samuiri yagamba ati Mundetere hanu Agagi omukama Wabamaleki. Agagi omukama Wabamaleki. Agagi yaija namberali nayesindika. Kandi Agagi yagamba ati Mananukwo okuhururwa kwokufa kuhinguireho. 33Samuiri yagamba ati Nka busitama yawe okuyaihire ha bakazi abana babu, nukwo nyoko aliburwa abana omu bakazi. Samuiri yatematema Agagi ebicweka omu maiso ga MUKAMA omu Girigali. 34Kandi Samuiri akagenda Rama; Saulo yatemba hali enjuye omu Gibeha eya Saulo. 35Kunu Samuiri ataije obundi okurora Saulo okuhikya ha kiro kyo kufakwe; baitu Samuiri akali’ra Saulo: kandi MUKAMA akeyijukya okutaho Saulo okuba omukama okulema Isareri.