Swahili Bible2

8

1NUBWO Sulemani yasoroza abakuru ba Isareri, nemitwe yona eyenganda, abakuru abenje zabaisebo abomu bana ba Isareri, hali omukama Sulemani omu Yerusalemu, baiheyo esanduko eyekiragano kya MUKAMA omu rubuga rwa Daudi Sayuni. 2Abasaija bona aba Isareri bayesoroza hali omu kama Sulemani ha bugenyi, omu kwezi Esanimu, nukwo kwezi kwa musanju. 3Abakuru bona ba Isareri baija, nabanyakatagara bahimba esanduko. 4Batembya esanduko ya MUKAMA, nehema eyokutangatanganiramu, nebintu byona ebirukwera ebikaba biri omu hema; ebi banyakatagara nabalevi babitembya. 5Kandi omukama Sulemani nekitebe kyona ekya Abaisareri, abakaba bamwesorolizeho baba hamu nauwe omu maiso gesanduko, nibahayo ebyonzira ebyentama nenimi ebitarasoboirwe okubarwa nobukwakuba okumanywa obwingi. 6banyakatagara batahyamu esanduko eyekiragano kya MUKAMA omu kiikaro kyayo omu isabiro eryenju, hali ekiikaro ekirukukira okwera hansi yamapapa ga bakerubi. 7baitu bakerubi basasanura amapapa gabu okusweke’ra ekiikaro kyesanduko, bakerubi basweke’ra esanduko nemigamba ha ruguru. 8Kandi emigamba ekaba eraihire eti entuli zemigamba ikarorwa omuntu ayemere omu maiso gisabiro; baitu itarorwe ayemere aheru: kandi nuho ziri nokuhikya hati. 9Omu sanduko hakuba hatarumu kantu, rundi amabale abiri Musa agayatairemu Holebu, MUKAMA obuyaragaine ekiragano nabana ba Isareri, obubarugire omu nsi ya Misiri. 10Kandi kyahika, banyakatagara obubarugire omu kiikaro ekirukwera, ekicu kyaijura omu nju ya MUKAMA, 11nukwo banyakatagara batasobole okweme’raho okuhereza habwekicu: baitu ekitinisa kya MUKAMA kyaijura omu nju ya MUKAMA.

12Nukwo Sulemani yagamba ati MUKAMA akagamba ati araikaraga omu muirimu kasira. 13Mazimakwo nkwombekire enju eyokuikaramu, ekiikaro kyawe ekyokuikaramuga ebiro byona. 14Omukama yahindura amaisoga, yasabira omugisa ekitebe kyona ekya Isareri:Ekitebe kyona ekya Isareri bayeme’raho. 15Yagamba ati Asimwe MUKAMA, Ruhanga wa Isareri, ayagambire nakanwakena Daudi isenyowe, kandi akihikirize nomukonogwe nagamba 16ati okuruga ebiro obunaihire abantu bange Isareri omu Misiri, ntakome orubuga omu nganda zona eza Isareri okwombeka enju, ibara lyange liikaleyoga; baitu nkakoma Daudi alemege abantu bange Isareri. 17Lero kikaba kiri omu mutima gwa Daudi isenyowe okwombeka enju habwibara lya MUKAMA, Ruhanga wa Isareri. 18Baitu MUKAMA yagambira Daudi isenyowe ati Baitu kikaba kiri omu mutima gwawe okwombeka enju habwibara lyange, iwe okakora kirungi okukitekereza omu mutima gwawe: 19Baitu nobukiri kiti iwe otalyombeka enju: baitu omwana wawe aliruga omu nda yawe, nuwe alyombeka enju habwibara lyange. 20Kandi MUKAMA agumize ekigambokye ekiyagambire omu kiikaro kya Daudi isenyowe, nyikalire ha kitebe kya Isareri, nka MUKAMA okuyaraganize, kandi nyombekere nju habwibara lya MUKAMA, 21Ruhanga wa Isareri. Kandi nuho ntaireyo ekiikaro kyesanduko, nambere harumu ekiragano kya MUKAMA, ekiyaraganize nabaisenkuru itwe, obuyabaihire omu nsi ya Misiri. 22Sulemani yayeme’ra omu maiso gekitebe kyona ekya Isareri, yasasanura engaroze haiguru: 23yagamba ati Ai MUKAMA, Ruhanga wa Isareri, tihaloho Ruhanga ondi nka iwe, omu iguru haiguru, rundi omu nsi hansi; arukukwata ekiragano nebyokuganyira nabairu bawe, abarukugendera omu maiso gawe nemitima yabu yona: 24ayakwasire nomuiru wawe Daudi isenyowe ebiwamuraganize: ego, okagamba nakanwa kawa, wakihikiriza nomukono gwawe, nkokukiri hati. 25Nukwo hati bunu ai MUKAMA, Ruhanga wa Isareri, kwata nomuiru wawe Daudi isenyowe eki ekiwamuraganize nogamba oti Tihalikuburaho omusaija omu maiso gange okuika’ra ha kitebe kya isareri; kimu kyonka abana bawe obubalyerinda omuhanda gwabu, okugenderaga omu maiso gange nkaiwe okuwagenderaga omu maiso gange. 26Nukwo hati bunu ai Ruhanga wa Isareri, ikiriza ekigambo kyawe kinanukirwe, ekiwagambirw omuiru wawe Daudi isenyowe. 27Baitu Ruhanga alikara mazima hansi? dora, iguru niguru erya haiguru torukusobora okuligyamu: kirisura ki enju enu iwe okugihikamu! 28Baitu iwe oteho omutima ha kusaba kwomuiru wawe, na ha kwesengerezakwe, ai MUKAMA Ruhanga wange, okuhu’ra okukunga nokusaba omuiru wawe ebyorukusaba omu maiso gawe ha kiro kinu: 29amaiso gawe gaigukire enju enu ekiro na nyamusana, ekiikaro ekiwagambire oti Ibara lyange lirabaga oku: okuhu’raga okusaba omuiru wawe okwarasabaga hali ekiikaro kinu. 30Naiwe ohu’rege okwesengereza kwomuiru wawe, kandi okwabantu bawe Isareri, obubarasabaga hali ekiikaro kinu: ego, ohu’rege omu iguru ekiikaro kyawe ekyokuikaramu; kandi obworahu’raga oganyirege. 31Omuntu obwarasisiraga omutahiwe, kandi ekirahiro bakimutaho okumurahiza, kandi aija okurahira omu maiso gekyoto kyawe omu nju enu: 32iwe ohu’rege omu iguru, kandi okolege ocwege emisango yabairu bawe, nocwera omusango omuntu omubi okumuletera ha mutwegwe omuhandagwe;noihaho omusango hahikirire, okumuha nkokuhi’rakwe okukuli. 33Abantu bawe Isareri obubarabingwanga abanyanzigwa habwo kusisira iwe; obubaliba nibakuhindukira, nibatura ibara lyawe, nibasaba nibesengereza omumaiso gawe omu nju enu: 34iwe ohu’rege omu iguru,oganyirege ekibi kyabantu bawe Isareri, obaga’reyoga omu nsi eyiwahaire baisenkurubo. 35Iguru obulirakingwahoga, enjura etarukugwa, habwokusisa kwabu namberoli; obubaliba nibahindukira ekiikaro kinu, nibatura ibara lyawe, nibahinduka okuleka ekibi kyabu, obworababonabonesaga: 36iwe ohu’rege omu iguru, oganyirege ekibi kyabairu bawe, kandi ekyabantu bawe Isareri, obwolibegesa omuhanda omurungi ogubahikirire okugendamu; kandi onagege enjura ha nsi yawe, eyiwahaire abantu bawe okuba obugwetwa.

37Enjara obweragwaga omu nsi, rundi orufu, rundi okuhukurwa, rundi okuhumba, rundi kadoima, rundi enzige; omunyanzigwa obwabarabagotaga omu nsi eyembuga zabu: obuharabahoga orufu rwona, rundi okurwara kwona; 38okusaba kwona, rundi okwesengereza kwona, okurasabwaga omuntu wena, rundi abntu bawe bona aba Isareri, abalimanya omuomu omuhito gwomutimagwe wenka, nasasanura engaroze hali enju enu: 39iwe ohu’rege omu iguru ekiikaro kyawe ekyokuikaramu, oganyirege, okolege, kandi ogarulege omuntu wena nkemihandaye yona okweri, oworukumanya omutimagwe: (baitu iwe, iwe wenka omanyire emitima yabana babantu bona;) 40bakutinege ebiro byona obubaraikaraga omu nsi eyiwahaire baisenkurubo. 41Kandi ebyomunyaihanga atali womu Bantu bawe Isareri, obwararugaga omu nsi ya hara habwibara lyawe; 42(baitu balihu’ra ha ibara lyawe erikuru, na ha ngaro zawe ezamani, na ha mukono gwawe ogugoroirwe;) ogu obwaraijaga okusaba omu maiso genju enu; 43iwe ohu’rege omu iguru ekiikaro kyawe ekyokuikaramu, okolegebyona omuyaihanga ebyarakukungiraga; abantu bona abahansi bamanye ibara lyawe, okukutina, nkabantu bawe Isareri okubakora, kandi bamanye ngu enju eyinyombekere neyetwa ibara lyawe. 44Abantu bawe obubararamagiraga abanyanzigwa babu, omu muhanda gwona ogworabasindikamuga, nibasaba MUKAMA hali orubuga oruwakomeremu, habwibara lyawe: 45iwe ohu’rege omu iguru okusaba kwabu, notonganira ebigambo byabu ebyobulyo. 46Obubarakusisiraga, ( baitu tiharoho muntu atasisa), naiwe nobabihi’rwa, nobahayo hali omunyanzigwa, bo babasenguze nibabatwara omu nsi yomunyanzigwa, rundi hara rundi haihi; 47baitu obubalyeyijukya omu nsi nambere balisengurwa, nibahinduka nibakwesengereza omu nsi yabo ababasenguize, nibagamba ngu / Tukasisa, twakora ebyobwereme, twakora kubi; 48kandi obubaliba nibagaruka namberoli, nomutima gwabu gwona nobwomezi bwabu bwona, omu nsi yabanyanzigwa babu, ababasenguize, nibakusaba barolerire ensi yowabu, eyiwahaire baisenkurubo, orubuga oruwakomeremu, nenju eyinyombekere habwibara lyawe: 49iwe ohu’rege okusaba kwabu nokwesengereza kwabu omu iguru, ekiikaro kyawe ekyokuikaramu, kandi otonganirege ebigambo byabu ebyobulyo; 50kandi oganyirege abantu bawe abakusisira,nebyokusisa byabu byona ebibakusisira; obahege okuganyirwa abo ababasenguza, nukwo babaganyirege: 51baitu bali Bantu bawe, kandi obugwetwa bwawe, abawaihire omu Misiri hagati yekikomi ekyekoma: 52nukwo amaiso gawe gaigukirege okwesengereza okwomuiru wawe, kandi nomkwesegereza okwabantu bawe Isareri, okubahu’raga obubarakakungaga bwona. 53Baitu okabasorora omu mahanga gona aga hansi, babe obugwetwa bwawe, nkokuwagambire habwomukono gwa Musa omuiru wawe, obuwaihire baisenkuru itwe omu Misisri, ai Mukama RUHANGA

54Kandi kyahika, Sulemani obuyamazire okusaba ebi byona nokwesengereza hali MUKAMA yaimuka omu maiso gekyoto kya MUKAMA, nambere akaba atize amajuge nayanju’ra engaroze haiguru. 55Yayeme’ra, yasabira omugisa ekitebe kyona kya Isareri niraka erihango, 56nagamba ati Akugizibwe MUKAMA,ahaire abantube Isareri okuhumura, nka byona okubi ri ebiyaraganize: tihakagwaga ekigambo nekimu ekyomuragogwe omurungi, oguyaragire habwomukono gwa Musa omuiruwe. 57MUKAMA Ruhanga waitu aikalega naitwe, nkokuyaikaraga nabaisenkuru itwe: aleke okuturugaho nobukwakuba okutusiga; 58nukwo ahindulege emitima yaitu namberali, okugendaga omu mihandaye yona, nokukwataga ebiragirobye, nebiyataireho, nebyobulyobye, ebiyaragire baisenkuru itwe. 59Nebigambo binu ebyange ebinyesengerize nabyo omu maiso ga MUKAMA, bimuikalege haihi MUKAMA Ruhanga waitu nyamusana nekiro, atonganirege ebigambo byomuiruwe nebyabantube Isareri nkokubirabaga obukyabukya: 60amahanga gona ha nsi gamanye ngu MUKAMA Nuwe Ruhanga; tiharoho ondi rundi uwe wenka. 61Nukwo omutima gwanyu guhik’rege ahari MUKAMA Ruhanga waitu, okugenderaga omwebi ebiyataireho, nokukwataga ebiragirobye nkokukiri hati. 62Nomukama na Isareri yona hamu nauwe bahayo ekyonzira 63omu maiso ha MUKAMA. Sulemani yahayo ekyonzira ekyebihongwa ebyobusingye ebiyahaireyo hali MUKAMA enimi bukumibubiri mwenkumi ibiri, nentama kasirira mu bukumibubiri. Nukwo omukama nabana ba Isareri bona basoroire bati enju ya MUKAMA. 64Ha kiro eki yayo omu maiso genju ya MUKAMA; baitu nuho yahaireyo ekihongwa ekyokeze nekihongwa ekyebyokulya nebisajwa ebyekihongwa ebyobusinge: baitu ekyoto ekyomulinga ekikaba kiri omu maiso ga MUKAMA kitasobole okubaha ekihongwa ekyokeze, nekihongwa kyebyokulya nebisajwa byebihongwa ebyobusinge, baitu kikaba kiri kike. 65Nukwo Sulemani yacumbire ati obugenyi ha kasumi ako, na Isareri yona hamu nauwe, ekitebe kingi, okuruga Hamasimbere hatahi’rwa, nokuhikya akambu ka Misiri, omu maiso ga MUKAMA Ruhanga waitu, ebiro musanju nebiro musanju, nibyo biro ikumi na bina. 66Ha kiro ekya munana yayohereza abantu, basabira omukama omugisa, bagenda hali ehema zabu basemerirwe, kandi bakyanganukire omu mutima, habwomugisa gwona MUKAMA oguyayolekere daudi omuiruwe na Isareri abantube.