Swahili Bible2

7

1SULEMANI akamara emyaka ikumi nesatu nayombeka enjuye wenka, yamara enjuye yona. 2Baitu akombeka enju eyekibira kya Lebanoni; okuraiha kwayo mikono kikumi, nobugazi bwayo mikono amakumi atano, noburaibura bwayo mikono amakumi asatu, ha nyi’ri ina ezenyomyo zemikogoto, nemiraba yemikogoto ha ruguru yenyomyo: 3Kandi ekatindwa nemikogoto ha ruguru yemiraba amakumi ana netano ekaberi ha nyomyo; ikumi naitano orunyi’ri rumu. 4Kand hakaba haroho ebirukurorwamu emirundi esatu, kandi ebihengezi omu bikaba biri ha bihengezi omu nka’ra isatu. 5Nemiryango yona nemikumi’ro yayo ekainganingana ha maiso: kandi ebihengezi bikaba biri ha bihengezi omu nka’ra isatu. 6Kandi akakora ekisasi kyenyomyo; okuraiha kwakyo mikono amakumi atano, nobugazi bwakyo mikono asatu; nekisasi omu maiso gazo; nenyomyo nekiti kyomulyango omu maiso gazo. 7Yakora nekisasi ekyekitebe ekyokucweraho emisango, nikyo kisasi ekyokucweramu emisango: kyaswekwa nemikogoto okuruga ha rwemo nokuhikya ha rwemo. 8Nenjuye eyokuikaramu,ezigati endi omunda yekisasi, yaba yomulingo gumu ogurukusisana na gali. Yakora nenju habwomuhara wa faraho, (Sulemani ouyaswire) eyasisaine nekisasi eki. 9Ezi zona zikaba zirizamabale agomuhendo, amabale agatematemerwe, agalengerwe, agasazirwe nemisumeno, omunda na heru, okuruga ha miganda okuhikya ha ruka’ra orweruguru, nukwo na heru okuhikya hali ezigati enkoto. 10Kandi emiganda ekaberi yamabale agomuhendo, amabale amakoto, amabale agemikono ikumi, namable agemikono munana. 11Kandi haiguru hakaba haroha ambale agomuhendo, amabale agabaizirwe, agalengerwe, nemiti yemikogoto. 12Kandi ezigati enkoto eyehingulirize ekaba enyina enka’ra isatu ezamabale agabaizirwe, noruka’ra rumu orwemiraba eyemikogoto; nkezigati eyomunda eyenju ya MUKAMA okwekaberi, nekisasi ekyenju.

13Kandi omukama Sulemani yatayaiha Hiramu omu Turo. 14Akabali omwana womukazi omufakati owomu ruganda rwa Nafutali, kandi/ ise akabali omusaija wa Turo, omukozi wemirimo eyomulinga; kandi akaba aijuire amagezi nokwetegereza nokumanya, okukora emirimo yona eyomulinga geomuhe’re. Yaija hali omukama Sulemani, yakora emirimoye yona. 15Baitu akakora enyomyo ibiri ezemiringa, oburaibura obwenyomyo mikono ikumi nomunana: kandi orukoba orwemikono ikumi nebiri rukehinguliriza enyomyo yona. 16Yakora nemitwe ebiri eyemiringa eyagere, okuta ha ruguru zenyomyo: oburaibura obwomutwe gumu mikono etano, noburaibura obwomutwe gundi mikono etano. 17Hakaba haroho obuteko obwomulimo ogurukwa, nomulimo gwemikufu, habwemitwe ekaberi haruguru zenyomyo; musanju habwomutwe gumu, namusanju habwomutwe ogundi. 18Nukwo yakozire ati enyomyo; kandi hakaba haroho enka’ra ibiri okwehinguliriza ha buteko, okusweka emitwe ekaberi ha ruguru zenyomyo: kandi nukwo yakora ati habwomutwe ogundi. 19Nemitwe ekaberi ha ruguru yenyomyo omu kisasi ekaberoho omulimo gwamaranga, emikono ena. 20Kandi hakaba haroho nemitwe haiguru ha nyomyo ibiri, haihi nokugaliha okwahe’raine omulimo gwobuteko: namakomamahanga hakaba gali bikumi bibiri, omu nka’ra ezirukwehinguliriza ha mutwe ogundi. 21Yaimukya enyomyo ha kisasi kyeyekaru: yaimukya enyomyo eyomukono gwobulyo, yagiruka ibara lyayo* Yakini: yaimukya enyomyo eyomukono gwemoso, yagiruka ibara lyayo Boazi. 22Kandi haruguru yenyomyo hakaba haroho omulomo gwamaranga: nukwo omulimo ogwenyomyo gwahoire guti. 23Yakora nenyanja eyagere eyemikono ikumi okuruga ha mugoma okuhikya ha mugoma, eyenkulingo, noburaibura bwayo mikono etano: kandi omuguha ogwemikono amakumi asatu gukagyehinguliriza. 24Kandi hansi yomugoma gwayo nokwehinguliriza hakaba haroho ebisisi bikaba biri omu nka’ra ibiri, ebyayagibwe hamu nayo. 25Ekaika’ra ha nimi ikumi naibiri, isatu irolerire obukizi bwemoso, kandi isatu irolerire obukizi bwobulyo, kandi isatu irolerire burugaizoba: kandi enyanja ekatebwa halizo eruguru, enyuma yazo zona zikaba ziri omunda. 26Kandi omubiri gwayo entambu emu; nomugoma gwayo gukakorwa nkomugoma gwekikopo nkekyakyo kyorwenge: ekagyamu entugiro enkumi ibiri. 27kandi yakora entebe ikumi ezemiringa; okuraiha kwetebe emu mikono ena, nobugazi bwayo mikono ena, noburaibura bwayo mikono esatu. 28Kandi omulingo ogwentebe gukaba nugusisana guti: zikaba zinyina ebiremu; kandi ebiremu bikaba biri hagati yokuteraniza: 29kandi habiremu ebikaba biri hagati yokuteraniza hakaba haroho entale, nenimi, nabakerubi; kandi hokuteraniza hakaba haroho haterekerire ha ruguru: kandi hansi yentale nenimi hakaba haroho omulingo ogwebirukulengija. 30Kandi entebe yona ekaba enyina enyamuziga ina ezemiringa, nebyomungata ebyemiringa: namaguru gayo ana gakaba ganyina nkamabega: hansi yorwoho hakaba haroho nkamabega agagere, nebirukulengija ha mbaju zabyo. 31Kandi akanwa kayo omunda yomutwe kandi haruguru kakaba kali komukono gumu: kandi akanwa kayo kakaba kali kekulingirire nkomulimo ogwa haruguru nambere haterekerire okuguli, omukono gumu nekicweka: kandi ha kanwa kayo hakaba haroho ebisaruirwe, nebiremu byazo bikaba binyina ebyebu, tibyekulingirire. 32nenyamuziga ina zikaba ziri omunda yebiremu: nebyomungatabyenyamuziga bikaba biri omu entebe: nokuraiha kwenyamuziga kukaba kuli omukono gumu nekicweka. 33Kandi omulingo ogwenyamuziga gukasisana nkomulimo gwenyamuziga eyegali: ebyomungata byazo nengata zazo nenyomyo zazo nengata zazo nenyomyo zazo nenkundi zazo zona zikaba zagibwe. 34Kandi hakaba haroho amabega ana ha burugu buna obwentebe yona: amabega gayo gakaba gali gentebe yonyini. 35Kandi ha ruguru yentebe hakaba haroho ekintu ekyenkulingo oburaibura bwakyo kicweka kyomukono: kandi ha ruguru yentebe emikono yayo nembaju zayo zikaingana orulengo. 36Kandi ha byase byemikono yayo naha mbaju zayo, yasarura bakerubi, nentale, nemikindo, nkomwanya gwa byona okugukaba guli, hamu nebirukulengija okwehinguriza. 37Nukwo yakozire ati entebe ikumi: zona zikakorwa orulengo rumu, nokulenga kumu, nokusisana kumu. 38Kandi akakora enyoho ezemiringa ikumi: orwoho rumu rukagyamu entugiro amakumi ana: kandi orwoho rwona rukaba ruli rwemikono ena: kandi ha ntebe zona ikumi yataho entebe, itano ha ikumi yataho orwoho rumu rumu. 39Yataho entebe, itano ha rubaju rwenju orwobulyo, kandi itano ha rubaju rwenju orwemoso: yataho enyanja ha rubaju rwenju orwemoso burugaizoba erolerire obukizi bwobulyo. 40Kandi Hiramu nuwe yokozire enyoho nebigiko nebibindi.Nukwo Hiramu yamazire ati omulimo gwona oguyakolire omukama Sulemani omu nju ya MUKAMA: 41enyomyo ibiri, nebibindi bibiri ebyemitwe ekaberi ha ruguru yenyomyo: nobutimba obubiri obwokusweka ebibindi bibiri ebyemitwe ekaberi ha ruguru yenyomyo; 42namakomamahanga bikumi bina habwobuteko bubiri; enka’ra ibiri ezamakomamahanga habwobuteko okusweka ebibindi ebibiri ebyemitwe ekaberi hanyomyo; 43nentebe ikumi, nenyoho ikumi ha ntebe; 44Nenyanja emu, nenimi ikumi naibiri hansi yenyanja; nesufuliya nebigiko nebakuli: 45ebintu ebi byona Hiramu ebiyakolire omukama Sulemani omu nju ya MUKAMA, bikaba biri byemiringa emunywire. 46Omukama akabyagiza omu kyeya kya Yorudani, omu itaka eriibumba hagati ya Sukosi na Zalesani. 47Sulemani atalenge obulemezi bwebintu byona, baitu bikaba biri bingi muno: obulemezi obwemiringa batasobole okubumanya. 48Kandi Sulemani akakora ebintu byona ebyomu nju ya MUKAMA: ekyoto ekyezabu, nemeza ekaberoho emigati eyokwoleka, ya zabu: 49netabaza itano ha mukono gwemoso, omu maiso gisabiro, za zabu esemezibwe: nebyekyo, netabaza noruhana, za zabu; 50nebikopo, namakasi, nebakuli, nebigiko, nebiswa bya zabu esemezibwe; nepata, ezenyigi ezenju yomunda, ekiikaro ekirukukira okwera, nezenyigi ezenju, yekaru, za zabu. 51Nukwo omulimo gwona omu nju ya MUKAMA gwahwa. Kandi Sulemani yatahyamu ebintu daudi ise ebiyasoroire, efeza nezabu nebintu, yabita omu mahu,ro agenju ya MUKAMA.