Swahili Bible2

10

1KANDI omukama-omukazi owa Seba obuyahurire okuranganwa kwa Sulemani habwibara lya MUKAMA, yaija okumulenga nebikaguzibwa ebirukulema 2Yaija Yerusalemu nabantu baingi muno, nengamira ezahimbire ebiboya, nezabu nyingi muno, namabale agomuhendo: kandi obuyaizire hali Sulemani, yabaza nauwe byona ebikaba biri omu mutimagwe. 3Sulemani yamusobo’ra byona ebiyakaguize; busaho kigambo ekyaserekerwe omukama ekyataramutebize; 4Kandi omukama-mukazi owa Seba obuyaboine amagezi gona aga Sulemani, nenju eyiyayombekere, 5nebyokulya ebyaha mezaye, nokuika’ra kwabairube nokuhereza kwabahezabe nebyokujwara byabu, nabadumabe, namatemberoge agayatemberahoga okugenda omu nju ya MUKAMA; hatasigale mwoyo omuluwe. 6Yagambira omukama ati Nikyo kyamananu ekinahulire omu nsi yange nyenka ha ngeso zawe, namagezi gawe. 7Baitu ntaikirize ebigambo okuhikya obunaizire, namaiso gange gakirora: kandi dora, batantebezeho nekicweka: amagezi gawe nomugisa gwawe nibikira okuranganwa okunahulire. 8Abasaija bawe banyina omugisa, nabairu bawe banu banyina omugisa, abakweme’ra obutosa omu maiso gawe nibahu’ra amgezi gawe. 9MUKAMA Ruhanga wawe asimwe, ayakusemererirweho okukutaho ha kitebe ekyokulema Isareri. Baitu MUKAMA akagonza Isareri ebiro byona, nokya yakuterireho okuba omukama, okucwaga emisango nokukoraga ebyobulyo. 10Kandi akamuha omukama etaranta ezezabu kikumi mwabiri, nebiboya bingi muno, nobubale obwomuhendo: hataije obundi ebiboya bingi okuingana biri omukama-mukazi owa Seba ebiyahaire omukama sulemani. 11Kandi namato ga Hiramu, agaletaga ezabu za Ofira gakaleta okuruga Ofira emiti nyingi muno eyetwa alimugi, nobubale obwamuhendo. 12Omukama yakora enyomyo omu miti alimugi habwenju ya mukama nenju yomukama, kandi nenanga nendongo habwabazini: tihakaijaga emiti alimugi,kunu tihakabonwaga okuingana eri nokuhikya hati. 13Kandi omukama Sulemani akamuha omukama-mukazi owa Seba byona ebiyagondeze, ekintu kyona ekiyasabire okutabaramu ebi Sulemani ebuyamugaire habwokugaba kwomukama. Nukwo yahinduka, yagenda omu nsiye wenka, uwe nabairube. 14Kandi ezabu eyaizire hali Sulemani omwaka gumu, obulemezi bwayo bukaba buli etaranta zezabu rukaga munkaga mumukaga, 15Okutabaramu egi abasubuzi eyibaletaga, nabaguzi eyibaguraga nabakama bona abihanga eryajwanganize nabalemi bensi. 16Kandi omukama Sulemani akakora obugabu bwezabu eheserwe bikumi bibiri: sekeri rukaga ezezabu zikakora akagabu kamu. 17Kandi yakora engabu ezezabu eheserwe bikumi bisatu; mane isatu ikakora engabu emu: omukama yazita omu nju yekibira kya Lebanoni. 18Kandi omukama akakora ekitebe kyobukama ekihango ekyamasanga, yakisweka nezabu erukukira oburungi. 19Ekitebe eki kikaba kinyina amatembero mukaga, eruguru yekitebe kikaba kyenkulingirire enyuma: kandi hakaba haroho emikono embaju zombi ha kiikaro ekyokuika’raho nentale ibiri zemerire ha mikono rubaju. 20Nentale ikumi naibiri zikeme’raho ha rubaju orumu na ha rubaju orumu ha matembero mukaga: hatakorwe ekindi ekirukusisana nakyo omu bukama bwona na bumu. 21Nembonekyo zona ezokunyweramu ezomukama Sulemani zikaba ziri za zabu, nebibindi byona ebyomu nju eyekibira kya Lebanoni bikaba biri bye zabu esemezibwe: busaho kya feza nekimu; ekaba etali yomuhendo omu biro bya Sulemani. 22Baitu omu nyanja omukama akabanyina amato ga Tarasisi, hamu namato ga Hiramu: omurundi gumu emyaka esatu amato ga tarasisi gaijaga nigaleta ezabu nefeza namasanga nenkerebe nenyonyi ezikitinisa. 23Nukwo omukama Sulemani yakizire ati abakama bona abomunsi obuguda namagezi. 24Nensi zona ikase’ra okurora Sulemani, okuhu’ra amagezige Ruhanga agayataire omu mutimagwe. 25Kandi bakaleta omuntu wena ekisembokye, ebintu byefeza, nebintu byezabu, nebyokujwara, nebyokurwanisa, nebiboya, nembarasi, nenyumbu, ebyacwimbaga omwaka nomwaka. 26Kandi Sulemani akasoloza egali nabaha mbarasi: kakumi mwenkumi ibiri, abayataire omu mbuga ezegali, kandi hamu nomukama Yerusalemu. 27Kandi omukama akafora efeza okuba nkemisukomoli eri omu bihanga habwobwingi. 28Nembarasi Sulemani ezakabanyinazo zikaihwa omu Misiri; kandi abasubuzi bomukama bazihabwaga amagana, igana limu habwomuhendo gwalyo. 29Kandi egali yatembaga eruga omu Misiri habwesekeri zefeza rukaga, nembarasi habwekikumi mwatano: kandi nukwo nabakama bona aba Bahiti nabakama ba aramu baziihayoga bati habwomukono gwabu.