Swahili Bible2

1

1KANDI omukama Daudi akaba ahwisire, ahinguraine emyaka; bamusweka nebyokwesweka, baitu yalema okutagata. 2Nikyo abairube bamugambi’ra ngu Hakire baseru’re mukama wange omukama omuisiki omuto: ayeme’rege omu maiso gomukama, amuherezege; abyamege ha kifuba kyawe, mukama wange omukama atagate. 3Nukwo base’ra omuisiki omurungi omu mitano yona ya Isareri, bazora Abisagi Omusunamu, bamuleta hali omukama. 4Omuisiki akabali murungi muno ha maiso; yaherezaga omukama yamulindaga; baitu omukama atamumanye; 5Kandi Adoniya mutabani wa hagisi akekuza wenka nagamba ati Nyowe ndiba omukama: yayetegekera egali nabaha mbarasi, nabasaija amakumi atano okuirukaga omu maisoge. 6Kandi Ise akaba atakamubihizaga ebiri byona nagamba ati Kiki ekikukoleze kiti? Kandi akabali omusaija omurungi ha mubiri; kandi akazarwa nakuratira Abusolimu. 7Yahanura na Yoabu muatabani wa Zeruya, na Abyasara byakatagara: kandi abo bakuratira Adoniya bamukonyera. 8Baitu zadoki nyakatagara, na benaya mutabani wa Yehoyada, na Rei, nabasaija bamani abakaba bali ba Daudi, bakaba batali na Adoniya. 9Kandi Adoniya akaita entama nenimi nebisajwa haihi nibale lya Zoheresi, eriheraine Eni-rogeri; yayeta bagenzibe bona batabani bomukama, nabasaija bona ba Yuda obairu bomukama: 10baitu nasani nabi, na Benaya, nabasaija bamani, na Sulemani mugenziwe atabete. 11Nubwo Nasani yagambira Basiseba nyina Sulemani ati Tohulire iwe ngu Adoniya omwana wa Hagisi nalema, kandi daudi mukama waitu tarukukimanya? 12Nokwo hati bunu ija, nkwesengerize, kankuhe amagezi, oyejune obwomezi bwawe wenka nobwomezi bwomwana wawe Sulemani. 13Genda otahe hali omukama Daudi, omugambire oti Mukama wange omukama, otarahi’re omuzana wawe nogamba oti Mazimakwo Sulemani omwana wawe alirema hanyuma yange, kandi aliika’ra ha kitebe kyange? Mara kiki ekirukulemesa Adoniya? 14Dora, obworaba nokibaza oku nomukama, nanyowe nditaha enyuma yawe, ningumya ebigambo byawe. 15Basi-seba yataha hali omukama omu kisika: kandi omukama akaba ahwisire muno: na Abisagi Omusunamu akaba nahereza omukama. 16Basi-seba yainama yaramya omukama. Omukama yagamba ati Noyenda ki? 17yamugambira ati Mukama wange okarahi’ra MUKAMA Ruhanga wawe hali omuzana wawe oti Mazimakwo Sulemani Omwana wawe alirema ha nyuma yange, kandi aliika’ra ha kitebe kyange. 18Kandi hati bunu dora, Adoniya nalema; kunu iwe mukama wange omukama tokimanyire: 19kandi aisire enimi, namasajwa, nentama nyingi muno, kandi ayesere batabani bomukama bona, na Abyasara nyakatagara na Yoabu engabwa yihe: baitu Sulemani omuiri wawe tamwesere. 20Kandi iwe,mukama wange omukama, amaiso aga Isareri yona gali haliwe, obagambire aliika’ra ha kitebe kya mukama omukama hanyumaye okwali. 21Obwotakole oti kirihika, mukama wange omukama, obwaligwijagira hamu na baisenkurube, nyowe nomwana wange Sulemani tulibarwa nkabasobya. 22Kandi dora, obwakaba nakibaza nomukama, Nasani nabi yatahamu. 23bagambira omukama ngu Dora, Nasani nabi, ngugwo. Obuyatahire omu maiso gomukama, yainama omu maiso gomukamahansi. 24Nasani yagamba ati Mukama wange omukama ogambire oti Adoniya alirema hanyuma yange kandi aliika’ra ha kitebe kyange? 25baitu ekiro kinu asirirmukire, aisire enimi, namasajwa, nantama nyingi muno, kandi ayesere batabani bomukama bona nengabwa ezihe, na Abyasara nyakatagara; kandi dora, nibalya kandi nibanywa omu maisoge, nibagamba ngu Omukama Adoniya ahangirize. 26baitu nyowe, nyowe omuiru wawe na zadoki nyakatagara, na Benaya mutabani wa Yehoyada, nomuira wawe Sulemani, tatwesere. 27Ekigambo kinu kikozirwe mukama wange omukama? Kandi tomanyisize abairu bawe aliika’ra ha kitebe kya mukama wange omukama hanyumaye okwali? 28Nubwo omukama daudi yagarukamu nagamba ati Onyetere Basiseba. Yaija omu maiso gomukama. 29Omukama yarahira nagamba ati Mka MUKAMA okwali omwomezi, ayacungire obwomezi bwange omu bujune bwona, 30mazimakwo nkokunakurahirire omu MUKAMA, Ruhanga wa Isareri, ningamba nti Mazimakwo Sulemani omwana wawe alirema hanyuma yange omu liikaro kyange; nukwo ndakora nti ha kiro kinu. 31Basiseba yainamya amaisoge hansi, yasima omukama nagamba ati Mukama wange omukama daudi ahangirize ebiro byona. 32Omukama Daudi yagamba ati Munyetere zadoki nyakatagara, na benaya mutabani wa Yehoyada. Baija omu maiso gomukama. 33Omukama yabagambira ati Mutwale hamu nainywe abairu ba mukama wanyu, mutembye Sulemani omwana wange enyumbu yange nyenka, mumusirimule Gihoni: 34kandi Zadoki nyakatagara na Nasani nabi bamuseseho amagita oku abe omukama wa Isareri: kandi mutere ikondere, mugambe muti Omukama Sulemani ahangirize. 35Nubwo muratemba enyumaye, kandi araija aika’re ha kitebe kyage; baitu aliba omukama omu kiikaro kyange; kandi ‘mutaireho okuba omukuru okulema Isareri na Yuda. 36Benaya mutabani wa Yehoyada yagarukamu omukama nagamba ati Amina: MUKAMA, Ruhanga wa mukama wange omukama nauwe agambe ati. 37Nka MUKAMA okuyaikaraga na mukama wange omukama, nukwo aikalege ati na Sulemani, anyumize ekitebekye nokukira ekitebe kya mukama wange omukama Daudi. 38Nukwo Zadoki nyakatagara, na Nasani nabi, na benaya mutabani wa yehoyada, Nabakereti Nabapereti basirimuka, batembya Sulemani enyumbu eyomukama daudi. 39bamuleta Gihini. Zadoki nyakatagara yaiha omu hema ihembe eryamagita, yagasesa ha Sulemani. Batera ikondere; nabantu bona bagamba ngu Omukama Sulemani ahangireze. 40Nabantu bona batemba enyumaye, kandi abantu batera enyamulere, basemererwa okusemererw kwingi, ensi yayatika habwobwogo bwabu. 41kandi Adoniya nabagenyi bona abakaba bali hamu nauwe babuhu’ra obubakaba bamazire okulya. Kandi yoabu obuyahulire okugamba kwikondere yagamba ati obwogo bunu obworubuga rujagaraire buleserwe ki? 42Obwakaba nakigamba dora, Yonasani mutabani wa Abyasara nyakatagara yaija: Adoniya yagamb ati taha; baitu oli muntu murungi, 43noleta ebigambo ebirungi.Yonasani yagarukamu nagambira Adoniya ati Mazimakwo mukama waitu omukama Daudi afoire Sulemani omukama: 44kandi omukama atumire hamu nauwe Zadoki nyakatagara na Nasani nabi, na benaya mutabani wa Yehoyada, Nabakereti Nabapereti, kandi bamutembeze enyumbu eyomukama: 45Kandi zadoki nyakatagara na nasani nabi bamusesereho amagita abe omukama omu Gihoni: kandi barugireyo nibaija nibasemererwa, nukwo okutoka orubuga rwatokera kimu. Nubwo bwogo obumuhulire. 46Kandi Sulemani aikalire ha kitebe kyobukama. 47Kandi abairu bomukama baizirege okusabira omugisa mukama waitu omukama Daudi, nibagamba ngu Ruhanga wawe afore ibara lya Sulemani lirungi okukira ibara lyawe, nekitebekye akinyumize okukira ekitebe kyawe. Kandi omukama yainama ha kitabu. 48Nukwo omukama agambire ati Akugizibwe MUKAMA, Ruhanga wa Isareri, ahaire omuntu okuika’ra ha kitebe kyange ha kiro kinu, namaiso gange gakiboine. 49Kandi abagenyi bona aba Adoniya batina, baimuka bayegendera omuntu wena omu muhandagwe.

50Adoniya yatina habwa Sulemani; yaimuka, yagenda yakwata ha mahembe gekyoto. 51Bagambira Sulemani ngu Dora, adoniya natina omukama Sulemani: baitu dora, akwasire ha mahembe gekyoto nagamba ati Omukama Sulemani andahi’re hati taliita omuiruwe na busitama. 52Sulemani yagamba ati Obwalyeyoleka wenka omuntu omurungi, tihaligwa hansi akasokeke na kamu: baituobubi obubulizoka omuluwe, alifa. 53Nukwo omukama Sulemani yatuma, bamuiha ha Kyoto, bamuleta. Yaija yaramya omukama Sulemani: Sulemani yamugambira ati Genda omu nju yawe.