Swahili Bible2

29

1KANDI Daudi omukama akagambira ekitebe kyona ati Sulemani mutabani wange, Ruhanga ouyakomere omu muno, kandi omulimo mwingi: baitu yekara teri yomuntu, baitu ya MUKAMA Ruhanga. 2Kandi nyowe ntekanize namani gange gona habwenju ya Ruhanga wange ezabu habwebyezabu, nefeza habwebyefeza, nemiringa habwebyemiringa, nebyoma, nemiti habwebyemiti: obubale bwa berulo, nobubale bwokusarurwamu, obubale bwomulimo gwokuserura, kandi obwemirimo gwokuserura, kandi obwemiringo nyingi, nobubale bwomuhendo obwemiringo yona, na mabale agarukwera maingi muno. 3Kandi,, baitu ntaireho omutima gwange hanju ya Ruhanga wange, obuntungire itungo lyange nyenka eryezabu neryefeza, nindihayo hali enju ya Ruhanga wange okusegi’ra byona ebinatekanirize enju erukwera; 4etaranta zezabu enkumi isatu, omu zabu ya Ofiri, netaranta zefeza ezisemezibwe kasanju, ezokusigisa ebisika byenju: 5zabu habwebyezabu, nefeza habwebyefeza, kandi erukukorwa engaro zabakozi. Kandi noha arukwehonga nagonza okwehayo wenka ha kiro kinu hali MUKAMA? 6Nubwo abakuru abenju zabaisenkuru, nabakuru abagenda za Isareri, nengabwa ezenkumi kandi ezebikumi, hamu nabalemi abarukurole’ra omulimo gwomukama, bahonga nibagonza; 7kandi baha habwokuhereza kwomunju ya Ruhanga etaranta zezabu enkumi itano, na daliki zezabu kakumi, netaranta zefeza kakumi, netaranta zomulinga kakumi mu kanana, netaranta zebyoma kasirira. 8Kandi abo abakaba banyina obubale bwomuhendo babuha hali obuguda obwenju ya MUKAMA, omu mukono gwa Yehiyeri Omugeresoni. 9Kandi abantu bakasemerwa, baitu bakahayo nokugonza, baitu bakahayo hali MUKAMA nomutima oguhikirire: na Daudi omukama akasemererwa nokusemererwa kwingi. 10Nukwo Daudi yasima MUKAMA omu maiso gekitebe kyona: Daudi yagamba ati Osimwe, ai MUKAMA, Ruhanga wa Isareri isenkuru itwe ebiro nebiro. 11Ai MUKAMA obukuru bwawe, nobusobozi, nekitinisa, nokusingura, nokukugizibwa: baitu byona ebiri omu iguru nomu nsi byawe: obukama bwawe, ai MUKAMA, kandi onyumizibwa okuba omutwe gwa byona. 12Itungo nekitinisa nibiruga namberoli, kandi nolema byona; omu mukono gwawe nuho harumu obusobozi namani: nomu mukono gwawe harumu okukuza nokuha bona amani. 13Nukwo ai Ruhanga waitu ntukusima, ntukugiza ibara lyawe eryekitinisa. 14Baitu nyowe ninyowoha, nabantu bange nikyo kiki, itwe okusobora okuhayo tuti nokugonza mali? Baitu ebintu byona nibiruga namberoli, kandi tuhaire ha byawe wenka. 15Baitu tuli banyaihanga omu maiso gawe, nabasuhuki, nka baisenkuru itwe okubabaka bali: ebiro byaitu ebya hansi biri nkekiituru, kunu busaho kuikaraho. 16Ai MUKAMA, Ruhanga waitu, ebintu binu byona ebitutekanize okwombeka enju habwibara lyawe erirukwera nibiruga omu mukono gwawe, kandi byona byawe. 17Kandi manyire, Ruhanga wange, nti Iwe nolenga omutima, kandi nosemererwa okuhiki’ra. Kandi nyowe, omu kuhiki’ra okwomutima gwange mpaireyo nokugonza ebintu binu byona: kandi hati bunumboine nokusemererwa abantu bawe abaloho hanu okuhayo haliwe nokugonza. 18Ai MUKAMA, Ruhanga wa Iburahimu, owa Isaka, ogumize kimu ebiro byona omu bitekerezo ebyomutima gwabantu bawe, otakanize omutima gwabu namberoli: 19kandi omuhe Sulemani mutabani wange “omutima oguhikirire, okukwataga ebiragiro byawe, nebyomanyisa nebiwataireho, nokukora binu byona, nokwombeka enju eyintegekere. 20Daudi yagambira ekitebe kyona ati Hati bunu musime MUKAMA Ruhanga wanyu. Ekitebe kyona kyasima MUKAMA Ruhanga wabaisenkuru, bainamya emitwe yabu nibaramya MUKAMA nomukama. 21Kandi bayaho ebyonzira hali MUKAMA, kandi bahonga ebihongwa ebyokeze hali MUKAMA nyenkya, ekiro eki kihinguireho, enimi rukumi, nempaya ruskumi, nentama rukumi, hamu nebihongwa byabyo ebyokunywa nebyonzira bingi muno habwa Isareri yona: 22kandi balya, banywera omu maiso ga MUKAMA ha kiro kiri nokusemererwa kwingi. Kandi Sulemani mutabani wa Daudi bakamufora omukama omurundi ogwakabiri, bamusesaho amagita hali MUKAMA okuba omubito, na Zadoki okuba nyakatagara. 23Nubwo Sulemani yaikara ha kitebe kya MUKAMA okuba omukama omu kiikaro kya Daudi ise, yatunga omugisa; Nabaisareri bona bamuhu’ra. 24Nabakuru bona, nabantu bamani na batabani bona ba Daudi omukama nabo bakacule’ra Sulemani. 25MUKAMA yanyumiza Sulemani muno omu maiso ga Isareri yona, yamuha ekitinisa kyobukama kingi kiti, ekitakabaga ha mukama wena ayamubandize omu Isareri. 26Kandi Daudi mutabani wa Yese akalema Isareri yona. 27Emyaka eyiyalemire Isareri ekaberi emyaka amakumi ana; akalemera Heburoni emyaka musanju, kandi yalemera Yerusalemu emyaka amakumi asatu mwesatu. 28Kandi akafa agurusire kurungi, aijuire ebiro nobuguda nekitinisa: kandi Sulemani mutabaniwe yalema omu kiikarokye. 29Kandi engeso za Daudi omukama, ezokubanza neza ha nyuma, dora, zikahandikwa omu bigambo bya Samuiri omurozi, nomu bigambo bya Nasani nabi, nomu bigambo bya Gadi omurozi; 30nobusingebwe bwona namanige, nebiro ebyamuhinguireho uwe na Isareri nobukama bwona obwensi ezahe’raine.