Swahili Bible2

16

1BATAHYA esanduko ya Ruhanga, bagita hagati yehema Daudi eyiyasimbire: bahonga ebihongwa ebyokeze nebihongwa ebyobusinge omu maiso ga Ruhanga. 2Kandi Daudi obuyamazire okuhonga ebihongwa ebyokeze nebihongwa ebyabusinge, yasabira abantu omugisa omu maiso ga MUKAMA. 3Kandi yagabira abantu bona aba Isareri, abasaija nabakazi, omuntu wena omugati gwengano, nomwanya gwenyama, nekitonge kyemizabibu. 4Yataho abamu hali Abalevi okuhereza omu maiso gesanduko ya MUKAMA, okuhaisaniza nokusima nokukugiza MUKAMA, Ruhanga wa Isareri: 5Asafu omukuru, nogu ayamukuratire Zekaliya, Yeyeri, na Semiramosi, na Yehyeri, na Matisiya, na Eryabu, na Benaya, na Obededomu, na Yeyeri, nendongo nenanga: na Asafu anyina enyege ezigambira haiguru; 6na Benaya na Yahazyeri banyakatagara, nibatera amakondere okutaletaka, omu maiso gasanduko eyekiragano kya Ruhanga. 7Nubwo, ha kiro eki, Daudi yabandize okuragira okusima MUKAMA, habwomukono gwa Asafu na bene babu. 8Musime MUKAMA, mukunge ibaralye; Mumanyise ebiyakozire omu mahanga. 9Mumuzinire, muzine ebyokumukugiza; Mubaze ha byamahanobye byona. 10Mwenyumize obwibaralye erirukwera: Omutima gwabu gusemererwe abanyakuse’ra MUKAMA. 11Muse’re MUKAMA namanige; Muse’rege amaisoge ebiro byona. 12Muijuke ebyamahanobye ebiyakozire; Ebyamahanobye, nebyobulyo ebyarugire omu kanwake; 13Inywe abaijukuru ba Isareri omuiruwe, Inywe, abana ba Yakobo, abakomebe. 14Nuwe MUKAMA Ruhanga waitu: Ebyobulyobye nibihika omu nsi zona. 15Muijukege ekiraganokye okuhikya obuijukuru rukumi; 16Ekiragano ekiyaragaine na Iburahimu, Nekirahirokye ekiyarahirire Isaka; 17Kandi yakigumiza hali Yakobo okuba ekiragiro; Hali Isareri, okuba ekiragano ekitahwaho: 18Nagamba ati Niwe ndiha ensi ya Kanani, Omugabo ogwobugwetwa bwanyu: 19Obumukaba muli Bantu bake omuhendo gwanyu; Ego, abake muno, kandi abagonyi omu; 20Bagendagendaga omu mahanaga agandi nagandi, Okuruga omu bukama obundi, okuhikya omu mahanga agandi. 21Ataikirize muntu wena okubakora kubi; Ego, akahana abakama habwabu; 22Nagamba ati Mutalikora habo abanasesereho amagita, Nobukwakuba okugira kubi banabi bange. 23Muzinire MUKAMA, inywe ensi zona; Mwolekege okujunakwe obukyabukya. 24Mutebeze ekitinisakye omu bamahanga, Ebyamahanobye omu mahanga gona. 25Baitu MUKAMA mukuru, kandi asemerire okukugizibwa muno, Asemerire okutinwa bona. 26Baitu abacwezi bona abamahanga bisisani kwonka: Baitu MUKAMA nuwe yakozire iguru. 27Ekitinisa nobukuru biri omu maisoge: Amani nokusemererwa biri omu kiikarokye. 28Mumuhe MUKAMA, inywe enganda ezamahanga, Mumuhe MUKAMA ekitinisa namani. 29Muhe MUKAMA ekitinisa ekisemerire ibaralye: Mulete ekihongwa, muije omu maisoge: Muramye MUKAMA omu burungi obwokuhiki’ra. 30Mutukumire omu maisoge, inywe ensi zona: Kandi ensi egumire terususobora okutabatabana. 31Iguru lisemererwe, nensi ekyanganuke; Bagambe omu mahanga ngu MUKAMA nalema. 32Enyanja ehi’re nokuijura kwayo; Obwe’re bukyanganuke na byona ebirumu; 33Nubwo emiti eyomu kibira erizina omu maiso ga MUKAMA obwokusemererwa, Baitu naija okucwera ensi omusango. 34Musime MUKAMA; baitu murungi: Baitu okuganyirakwe kwebiro nebiro. 35Mugambe muti Otujune, ai Ruhanga wokujunwa kwaitu, Otusoroze hamu, otujune omu mahanga, Okusima ibara lyawe erirukwera, Nokukyanganukire okukugizibwa kwawe. 36MUKAMA ayebazibwe, Ruhanga wa Isareri, Okuruga ebiro byona nokuhikya ebiro byona. Nabantu bona bagamba ngu Amina, bakugiza MUKAMA. 37Nukwo yasigayo omu maiso ge sanduko eyekiraragano kya MUKAMA Asafu na bene babu, baherezege omu maiso gesanduko ebiro byona, nkomulimo gwa 38bukyabukya okugwali: Na Obededomu hamu na bene babu, nkaga mu munana: na Odededomu mutabani wa Yedusuni na Hosa okuba abakumirizi: 39na Zadoki nyakatagara, omu maiso gehema ya MUKAMA, omu kiikaro ekiraihire ekikaba kiri 40omu Gibeoni, okuhongeraga MUKAMA ebihongwa ebyokeze ha Kyoto ekyebihongwa ebyokeze obutosa, nyenkya na kairirizi, nka byona okubiri bya MUKAMA, ebiyaragire Isareri; 41kandi hamu nabo, Hemani na Yedusuni, nabandi abakomerwemu, abagambirwe amabara gabu, kusima MUKAMA, baitu okuganyirikwe kwebiro nebiro; 42kandi hamu nabo Hemani na Yedusuni banyina amakondere nenyege habwabo abarabiteraga, kandi nebintu ebigamba habwebizina bya Ruhanga: na batabani ba Yedusuni okuikaraga ha irembo. 43Abantu bona bagarukayo omuntu wena omu njuye: Daudi yagarukayo okusabira omugisa enjuye wenka.