11
Okugwa okw’abafuzi abo abakambwe
1Iwe Lebanoni igulagho endhigi dho,
omuliro gwokye emiti gyo emivule gugizikirize!11:1: emivule: Ghano emiti gikozesebwa ng’obumanhiso obutegeeza amaghanga ag’amaani, oba abafuzi baago.
2Imwe emiti emisipuressi muwowoole kuba emivule gigwire,
emiti egyo emirungi einho bagizikiriiza.
Imwe emiti emikologho egy’e Bashani muwowoole,
kuba ekibira ekibaire ekizibirivu bakitemyegho!
3Wulira abaayi bwe bawowoola,
olw’okufiirwa ekitiibwa kyaibwe.
Wulira empologoma bwe dhiwologoma,
olw’okuba ekibira ky’e Yorudani mwe dhiba bakizikiriiza.
Abaayi ababiri
4Agho Musengwa Katonda wange yankoba ati: “Fuuka mwayi11:4: mwayi: Ekibono kino “mwayi” kikozeseibwa ghano ng’akamanhiso akategeeza kyabazinga oba omukulembeze, ate “ntaama” kyakozesebwa okutegeeza abantu. wa ntaama edh’okwitibwa. 5Abo abadhigula, baja baadhiita era ghaaloba kubaagho ababonereza. Abo abadhitunda bakoba bati, ‘Musengwa Katonda asaakibwe, tufuuse bakombe!’ Era abaayi baadho tibadhisaasira naire.”
6Musengwa Katonda kyava n’akoba ati: “Zeena tikairayo kusaasira muntu mu nsi eno. Bona eno, nze mwene ndighaayo abantu boonaboona, naabata mu buyinza bw’abafuzi baibwe. Abafuzi abo balizikiriza ensi eno, era ezira muntu ye ndinunula kumutoola mu buyinza bwaibwe.”
7Kale naafuuka mwayi wa ntaama edh’okwitibwa, nga ndhayira abo abaadhisuubulanga. Era naatoola emiigo ebiri, naagigema mu ngalo: ogundi naagutuuma eriina “Nkabi” ate ogundi naagutuuma eriina “Kweyimba”. Agho naasigala nga ndi kulabirira entaama edho. 8Ghaabaagho abaayi basatu abankyagha ni bandeetera okubeesinwa. Kale naababinga mu mwezi mulala guti. 9Agho naakoba entaama nti: “Tikaali mwayi waimwe. Edho edh’okufa ka dhife, edho edh’okuzikirira ka dhizikirire, edho edhinaasigalagho ka dhiriidhagane emamba.” 10Agho naatoola omwigo gwe natuuma eriina “Nkabi” naagumenhamu, okusazaamu endagaano Musengwa Katonda ye yali akoze n’abantu ab’amaghanga goonagoona. 11Kale endagaano eyo yaasazibwamu ku lunaku olwo. Era abo abaasuubulanga entaama baali agho nga baaningiriire, baategeera nga Musengwa Katonda n’eyali ali kwogerera mu ekyo kye nakola. 1211:12-13: Mat 27:9-10 11:12: Mat 26:15 Naabakoba nti: “Bwe muba nga musazeegho okunsasula, mumpe empeera yange. Aye oba timwenda kugimpa, mugisigaze.” Kale bampa ebitundu bya feeza amakumi asatu, nga n’empeera yange.
13Musengwa Katonda yankoba ati: “Ebitundu bya feeza ebyo bite mu ndyanga ey’eisinzizo.”11:13: Mu bighandiiko ebindi eby’eira mulimu: bite mu ndyanga ey’eisinzizo Aye mu by’Oluheburayi mulimu, Bighe omuwumbi. Kale naatoola ebitundu bya feeza amakumi asatu ebyo, empeera ey’ekikungu ye baabona nga n’engyamu, naagita mu ndyanga ey’eisinzizo. 14Naatoola omwigo ogwokubiri gwe natuuma eriina “Kweyimba”, naagumenhamu okusazaamu okweyimba kwa Buyudaaya ni Isiraeli.
15Agho Musengwa Katonda yankoba ati: “Kabiri fuuka mwayi wa ntaama, aye ku luno fuuka mwayi wa ntaama azira ky’agasa naire 16kuba, bona eno, ndi kutaagho mu nsi eno omwayi w’entaama atafaayo ku edho edhiri kuzikirira, oba okwagala edho edhiri kutambulatambula eyo dhityo. Era ataidhandhaba edho edhighenhera, waire okutwala edho edhikaali enamu aghali eisubi dhirye. Aye aligho okulya obulye emamba y’edho ensavu, n’alya n’amabbonge. 17Akagwireku omwayi w’entaama oyo azira ky’agasa naire, alekulira obwagho ekisibo! Olutalo lugwananga lwamukuba yaava mu buyinza yaagwira irala. Era omukono gwamuniala n’eriiso lye ery’oku mukono omusaadha lyamutulughala.”