9
Solomoni asaba Katonda Amagezi
1“Wo Katonda wa badhaadha bange era Musengwa omusaasizi, iwe wayogera kibono bubono waatonda ebintu byonabyona.9:1-18: 1 Bakyab 3:6-9; Mag 7:7 2Wawumba omuntu ng’okozesa amagezi go, afugenga ebintu byonabyona bye watonda. 3Waamugha alabirirenga ensi nga mutukuvu era ng’akola ebituufu, olwo asalenga emisango n’omwoyo omwesimbu. 4Nze ndi kukusaba ompe ku magezi ago agaba agho okumpi n’ekityamo kyo eky’obwakyabazinga, onganhe okubalirwanga mu baana bo. 5Ndi mwiru wo, ng’oti ni maama yeena bwe yali omwiru wo. Era ndi muntu buntu, atali wa maani naire, era ow’obulamu obumpi. Ndi n’okutegeera kutono inho ku bigema ku mateeka n’enkola yaago. 6Ole ni bw’aba nga n’atuukiriire mu bantu baine, aja kubanga oti ti kintu naire, kasita aba ng’azira magezi agava y’oli. 7Waanonda nze okuba kyabazinga ow’abantu bo, mbenga mulamuzi wa batabane bo ni baghala bo. 8Wandagira nzimbe eisinzizo ku lusozi lwo olutukuvu, nzimbe n’alutaari mu Yerusalemu ekibuga mw’oba. Eisinzizo eryo nga lyefaanaanirazaaku ni weema entukuvu iwe mwene ye wataagho mu mainhama. 9Amagezi gali agho n’iwe, era gaidhi by’okola. Gaaligho ng’otonda ensi, era gaidhi bukalamu ebyo ebikusanhusa, n’ebyo ebituufu ebijiira ku biragiro byo. 10Gatume gave eyo mu igulu lyo eitukuvu ku kityamo kyo eky’obwakyabazinga eky’ekitiisa, gaidhe gakolere ghalala ninze, olwo nsobole okwega ebyo ebikusangaaza; 11kuba gaidhi era gategeera buli kintu. Gaidha kungalagiranga mbenga n’obumanhi mu ebyo bye nkola. Era ekitiisa kyago kiidha kunkuumanga. 12Olwo ndidha kulamulanga abantu bo nga tisaliriza, mbe nga ngwanira okutyama ku kityamo eky’obwakyabazinga ekya lata wange. Ni bye nkola bibe nga bisiimibwa.
13“Naani asobola okumanha Katonda by’ategeike, oba okutegeera by’ayenda? 14Endowooza yaife abantu ezira ky’eghanga, ni bye tutegeka tibituukirira, 15kuba omubiri gwaife guno ogufa guzitoogherera omwoyo gwaife. Omubiri guno oguli ng’entindi obutindi ey’oku nsi, gukaluubiriza omwoyo gwaife ogulowooza. 16Kye tusobola n’okuteebereza obuteebereze ebiri ku nsi. N’ebyo ebituli agho okumpi, tuli na kufaabiikana inho okusobola okubyega. Memale olwo naani asuubira okutegeera eby’omu igulu? 17Ghazira amanhangaku by’otegeike, okutoolaku ng’osoose kumugha Magezi, waagheereza n’omwoyo gwo omutukuvu gwamwikaku. 18Mu nsambo eyo abantu ab’oku nsi baizibwa mu ngira entuufu, baayega ebyo ebikusangaaza, era Amagezi gaabalokola.”