8
1Amaani gaago agataloodheka gasansaanira woonawoona okuva ensi y’eva okutuuka y’ekanga, era gaasengeka buli kintu bukalamu.
Solomoni agonza inho amagezi
2Okuviira irala nga nkaali muto mbairenga ngonza inho amagezi, naaganoonianga ngafuule omugole wange, kuba nhenda inho obulungi bwago.8:2: Sir 15:2 3Gagheesa ensimuko yaago ekitiisa kuba gaba ghalala ni Katonda agagonza einho, oyo Musengwa w’ebintu byonabyona. 4Amagezi gaidhi ebyama bya Katonda, era gakolera ghalala naye.8:4: Nsa 8:27-30
5Ni bwekyandibaire ekirungi okuba n’eby’obukombe mu bulamu buno, aye era ghasigala nga ghazira kireetera muntu bukombe okusinga amagezi agaleetera buli kintu okukola obukalamu. 6Oba nga okutegeera kwa mugaso okuba nakwo, olwo ghaba ghazira kiwula magezi agaaleetera buli kintu ekiri ku nsi okuwumbibwa mu nsambo ye kirimu. 7Omuntu yeenayeena bw’aba agonza okukola obutuufu, olwo empisa enkalamu dhoonadhoona adhaagaana mu ebyo Amagezi bye gakola: okukola amazima, okuba omugumu, okwefuga, n’okuba omuntu ategeera. Ezirayo kisinga ebyo okugasa omuntu mu bulamu buno. 8Omuntu yeenayeena bw’aba ayenda okuba n’obumanhirivu mu bintu kamaala, obumanhirivu obwo abwagaana mu Magezi, kuba Amagezi gaidhi ebyaligho mu biseera eby’eira era gasobola okulengera ebija okubaagho ye bwidha. Gaidhi okuvuunula abantu bye boogera, n’okumalagho obuzibu obuba bwidhiegho. Gamanhiragho nga bukaali ebyewuunhio n’ebyewuninkiriza Katonda by’aja okukola, n’ebyo ebiribaagho mu biseera ni mu byanda eby’omu maiso.
9Kale kyenava ni nsalagho okutwala amagezi ewange gabenga ghalala ninze, kuba namanha nti gaidha kumpanga amagezi amalungi era gandhizengamu amaani nga ndi mu bizibu ni mu nnaku. 10Ku lw’Amagezi ago ndidha kuweebwanga ekitiisa nga ndi mu bantu abeesoloiza, era nteebwengamu ekinhagansi abantu abakulu, waire nga nkaali muto. 11Baidha kukizuulanga nga bye ndowooza byoleka okutegeera kungi inho, era ab’obuyinza banaaneegombanga. 12Bwe nnaabanga nga nsiriikiriire baidha kuteeganga bawulire kye nkoba, ate bwe nnaayogeranga baidha kutangayo inho omwoyo. Ni bwennaalwangagho nga nkaayogera baidha kusigalanga nga bawulirisa na mwoyo mulala. 13Olw’okuba n’Amagezi ago nja kufuuka atafa, kuba ndidha kwidhukirwanga ebyanda n’ebyanda abo abaliiragho nga nze nviiregho. 14Ndidha kufuganga abantu, era amaghanga gaidha kubanga mu buyinza bwange. 15Abafuzi abakambwe baidha kutyanga inho nga bawuliire ku liina lyange. Abantu baidha kuumanhanga nga kyabazinga omulungi era ng’omulwani ow’entalo aziramu ntete. 16Bwe nnaabanga nga ndhizeeyo eka Amagezi ye gali, ndidha kuwuumuliranga ghalala nago, kuba ghe gaba tighabaagho butaisania waire okubaagho okulumwa kwonakwona. Aye ghabaagho isanhu lyonka na kusagamba.
17Nakirowoozaaku inho mule, naakibona ng’okuba aghalala n’amagezi ng’oti n’omuntu afumbiirwa, kireeta obutafa. 18Okugonza amagezi kireetera omuntu okuba n’eisanhu eriidhuvu, ate okukola emirimo gyago kyamuleetera okuba n’obukombe obutaloodheka. Omuntu bw’aba aghalala nago kimuleetera okuba n’okutegeera, ate bw’aghaya nago obughaye kimugheesa ekitiisa. Kyenava ni nsalagho okugafuna. 19Ni bwe nali nga nkaali mwana muto nali mulungi mu buntu. Era nali wa nkabi okufuna omwoyo omulungi. 20Oba ka nkobe nti nagheebwa okuba mu mubiri omulungi, lwa kuba nali nga ndi mulungi kuva ira. 21Aye ate nakizuula nti tija kufuna magezi naire okutoolaku nga Katonda n’agampaire. Era okumanha obumanhe ekyo nti Katonda yenka n’asobola okugampa, kiraga okuteegera. Kale kyenava ni nsaba Musengwa nga mmweghemba n’omwoyo gwange gwonagwona nti: