6
Obuvunaanizibwa obw’abafuzi
1Agho ni imwe bakyabazinga n’imwe abafuzi mu nsi yoonayoona, muwulirise bukalamu kye nja okukoba, mwege. 2Muntegere amatu imwe abafuga ensi kamaala, ni mwesuuta olw’okuba n’obuyinza ku bantu abangi. 3Aye obuyinza obwo Musengwa Ali Ghaigulu yeene n’eyabubagha. Era alikebera bye mukoze n’ebyo bye mutegeike okukola; 4kuba muli bafuzi ku lwa Katonda oyo na ku lwa bwakyabazinga bwe. Bwemutafugira ku mazima, ni mutajiira ku mateeka, era ni muteebisa nga bw’ayenda mwebise, 5mulisindikirwa ekibonerezo ekitiisa einho, kyabagwaku bugwe nga timwetegeike. Abo abali mu buyinza balisalirwa omusango n’obukambwe. 6Abantu ababuliidho basobola okusaasirwa baasoniyibwa, aye abo abali mu buyinza baja kusalirwa omusango n’obukambwe. 7Musengwa ow’abantu boonaboona ghazira y’atya k’abe mukologho atya, kuba mwene n’eyakola abantu boonaboona abakologho n’ababuliidho, era boonaboona abalabirira mu nsambo n’endala. 8Aye aliramula abafuzi n’obukambwe bungi. 9Agho ni, bino ndi kubighandiikira imwe bakyabazinga musobole okwega amagezi, mwesambe okukola ebikyamu. 10Bwe munaatwalanga ebintu ebitukuvu mu butukuvu bwabyo, olwo n’imwe beene mwena mwidha kulowoozebwangaku ng’abatukuvu. Era ekyo bwe munaakyega, mulisobola okwewozaaku ku lunaku olw’okusalirwaku omusango. 11Mbeeni mwekalangulire ku kwegeresa kwange kuno n’omwoyo mulala, olwo mwidha kufuna okugalagirwa kwene.
Omuganhulo oguli mu magezi
12Amagezi gamesunkana era okwakayakana kwago tikwiririra naire. Abo abagagonza ni baganoonia gabanguyira okugazuula. 13Geeyolekera mangu abo abaganoonia. 14Bw’owuuna mu nkyonkyo okuganoonia toja kufuna buzibu bwonabwona, oja kugaagaana nga gatyaime agho ku mulyango gwo. 15Bw’ogataaku omwoyo nga tosugansugana, ofuna okutegeera okwidhuvu. Era bw’oganoonia tolwagho kufuna miraala, 16kuba gaja nga ganoonenkereza gazuule abo abagwaine okuba nago. Kale gaja kukutuukaku woonawoona gh’oliba. Gali n’okusaasira kungi era gaidhanga kuba n’iwe mu ndowooza yo yoonayoona.
17Ku mwoyo ogwenda okwega, amagezi kwe gava. Bweweegomba amagezi, olwo ni geene goona oba ng’ogagonza. 18Bw’ogonza amagezi, ogema n’amateeka gaago. Bw’ogema amateeka gaago, olwo oba weekakasa obutafa. 19Obutafa bukuseesa kumpi ni Katonda. 20Okwegomba amagezi kutegeka omuntu okufuga obwakyabazinga. 21Kale imwe abafuga amaghanga, oba nga ebityamo byaimwe eby’obwakyabazinga n’emiigo gyaimwe egy’obwakyabazinga mubitwala ng’ekintu ekikulu, mutenga mu magezi ekitiisa olwo musobolenga okufuga ebyanda n’ebyanda.
Solomoni ayenda okugabaniaku abandi ku magezi ge
22Ka mbakobere amagezi bwe gali, ni bwe gaasookereza. Tiidha kulekayo kintu waire ekirala kiti ekigagemaku. Ndidha kuganoonerezaaku okuviira irala mu mainhama, ebigafaaku mbyatule mu lwatu. Amazima goonagoona agagagemaku ndidha kugoogera aghazira kugalekayooku naire. 23Tiidha kugemwa nsaalwa ni ntuuka na kusirikira ebyo bye ndidhi mbu olwo abantu balobe kubimanha, kuba amagezi tigasobola kuba na ndowooza ng’oti n’eyo. 24Ensi y’ekoma okuba n’abagezi abangi, y’ekoma n’okuba obukalamu. Kyabazinga omugezi aleetera abantu be okuba mu miraala. 25Kale ni mwege bino bye nja okubagalagira, mwidha kuganhulwamu inho.