5
Ababi balyeidhusa
1Ku lunaku olwo, omuntu akola ebituufu alyemerera nga mugumu inho mu maiso ag’abakozi b’ebibi abaamudaazadaazanga ni baanhoomerera n’emirimo gye. 2Balyewuunhia okumubona ng’ali bukalamu, baadhugumira n’okudhugumira olw’okutya okungi. 3Olwo balituuka okweidhusa bye baakola, baawowoola olw’obulumi bati: 4“Ee, ono ti n’omuntu ole ye twasekereranga ni tumuyeeyerezanga! Nga twali basiru inho! Twadhuubanga tuti mulalu olw’obulamu obwo bwe yalingamu. Era bwe yafa titwamutaamu kanhagansi naire. 5Buti wuuno ali kubalirwa mu baana ba Katonda, era ali n’ekifo ekikye ku bubwe mu bantu ba Katonda. 6Agho ni, kitegeeza nti niife otwadaaliima ni tuva mu ngira entuufu. Titubangaku mu butangaavu buva mu kukola butuufu, waire okubulengeraku obw’obulengere ng’oti n’endhuba eri kuvaayo. 7Obulamu bwaife bwonabwona twabumalira mu kugema ngira edhitwala mu bumenhi bw’amateeka n’okuzikirira. Nga tutambulatambula eyo tutyo mu malungu omuziraku waire akagira, mu kifo eky’okumanha engira ya Musengwa ey’okutambuliramu. 8Obwo mpegaano okwekuluntaza kwaife n’okwesuuta okuba abakombe, bitugasiisa ki? 9Ebyo byonabyona byaja byawaagho ng’oti kinsense, era ng’oti n’ekintu ky’owulira obuwulire n’omala weerabira. 10Era byaja byawaagho ng’oti n’eryato eriseeyeeya ku amaadhi g’enhandha agali kwefuukuula, bwerimala okuja tosobola kubona ghe libise naire, kuba ghazira lugye lwe lirekagho ku maadhi. 11Era byaja byawaagho ng’oti n’enhonhi egulukira mu ibbanga, aye n’etalekaagho kamanhiso akooleka ng’ebiseeghooku. Ekozesa amaani g’amaghagha gaayo, yaaziinhuuka okubita mu mpewo, aye ng’ezira lugye lwayo lw’ereseegho naire. 12Era byaja byawaagho ng’oti n’akasaale, ke balasiisa kaje kakube ekintu aye mu kaseera buseera empewo ye kabiseemu n’eiragho, nga ghazira n’asobola kubona ghe kabise. 13N’ife abantu twena bwe tuli. Twazaalibwa, twamala twabulagho, aye nga tituleseegho kamanhiso ka mpisa nkalamu naire. Olwo twereetera beene okuzikirira mu bibi byaife byene.”
14Bwenebwene eisuubi abakozi b’ebibi lye bali nalyo, liri ng’oti bikaba empewo by’efuuwa ere. Liri ng’oti iwovu eriba ku nhandha5:14 iwovu eriba ku nhandha mu bighandiiko ebindi mulimu olufu. ni liwaagho nga kiwunga aidhie. Era liri ng’oti mwosi mu mpewo. Eisuubi lyaibwe lya kaseera buseera ng’oti n’omugeni asula olulala n’aja.
15Aye abakozi ab’ebituufu babaagho nga balamu byanda na byanda. Musengwa alibagha empeera. Oyo Ali Ghaigulu Yeene aidha kubakuumanga. 16Alibagha ebitiibwa ng’oti bakyabazinga, yaabavaaza n’engule y’ebimuli ey’ekitiisa. Era yaabakingiriza n’omukono gwe ogw’amaani, gube ng’oti ngabo ye bali. 17Musengwa oyo alija mu lutalo n’omwoyo gwe ogulumirwa abantu be, nga gumuliku ng’oti n’ekivaalo kye eky’omu lutalo. Era alikozesa ebitonde bye byene ng’eky’okulwanisa eri omuzigu. 18Alivaala obutuufu ng’ekivaalo eky’omu kifuba eky’ekyuma, yaavaala n’okukola amazima agaziramu kusaliriza ng’enkuufiira ey’ekyuma ku mutwe. 19Obutukuvu n’obuliba ng’engabo ye etasoboka kughangulwa. 20Alighagala obusungu bwe obw’akabi bwaba bwogi ng’empiima, olwo ebitonde byonabyona byamweyungaku mu lutalo okulwanisa abo abakola eiralu ni bakana okumutakania. 21Olukuba lulija lwakuba gheene Musengwa oyo gh’alirusindika, nga luli ng’oti busaale bw’ali kulasa ng’akozesa ebire ng’oti kalaso. 22Amabaale ag’omugozi galikuba abazigu be n’amaani mangi, nga gali ng’oti gaviire mu mpanda. Amaadhi g’enhandha n’ag’emiiga galibayoolookeraku gaababuutikira ng’oti mwidhuzo. 23Kiwunga ow’amaani alibafuumuula ng’oti bikaba. Obumenhi bw’amateeka bwayonoonayonoona ensi yoonayoona, n’ebikolwa ebibi byaleetera obwakyabazinga kamaala okugwa.