4
1Omala gaba agho otyo ng’oziraku baana aye waaba n’empisa enkalamu, kuba empisa enkalamu dhisiimibwa Katonda n’abantu, era dhiidha kukuleetera okwidhukirwanga ebyanda n’ebyanda. 2Empisa enkalamu dhigha abantu eky’okuboneraku kye babe bajiireku, era bwe dhiba nga dhiziragho baba ni kye bafiirwa inho. Okuva eira n’eira, empisa enkalamu n’ekirabo ekisinga byonabyona okuba eky’omughendo, era n’edhisinga byonabyona okufuula omuntu okuba omukalamu abantu ye bataamu ekinhagansi.
3Abaana abazaalibwa mu bumenhi bw’amateeka ka babe bangi batya, baidha kunhoomebwanga bunhoomebwe; kuba ti baana beene mu mateeka aye baghambule. Bali ng’oti n’ebimera ebinafu ebizira kikolo kigumu, waire okuba n’emizi egija ghansi mu itaka. 4Bali ng’oti miti egiba n’emizi ku ngulu, ni gitaaku amakaba okumala akaseera obuseera. Aye olw’obutabaaku mizi gija ghansi mu itaka, empewo egiyuuza eno n’ere, kiwunga yaidha yaagikuukulagho. 5Ensaga dhaagyo dhimogokaku nga dhikaali nto. N’ebibala byagyo tibyenga, okutoolaku okuba obwagho nga biziraku mugaso naire. 6Ku lunaku olw’okusalirwaku omusango, abaana abaazaalibwa mu bumenhi bw’amateeka n’abaliba abadhulizi abalirumiriza abazaire baibwe ekibi kye baakola.
7Aye abantu abakola ebituufu baja kufuna ekiwuumulo, ni bwebafa nga bato 8kuba bwe tuta mu bakaire ekitiisa, titujiira ku kiseera kya myaka gye bamaze ku nsi. 9Ku magezi ni ku kukola ebituufu, kwe tumanhira obukulu bw’omuntu n’obukaire bwe.
Enoka ng’eky’okuboneraku
10Agho olwatuuka, ghaabaagho omusaadha nga bamweta Enoka, eyasiimyanga Katonda era nga Katonda amugonza. Katonda yatoola Enoka oyo mu boonooni, be yabanga nabo aghalala, yaamutwala.4:10-14: Mainh 5:21-24; Sir 44:16; Heb 11:5 11Katonda yamutwala alobere ebibi n’obuguya okwonoona ebirowoozo bye n’omwoyo gwe; 12kuba omuntu bw’atwalirizibwa einho okukola ebibi, ekyo kisobola okumuziba amaiso yaaloba kubona kirungi. Ate n’okwegomba kwona kusobola okuleetera omuntu omulungi okutwalirizibwa ebiziramu. 13Omusaadha oyo Enoka yasobola okutuukiriza ebintu mu kiseera kitono kiti, ebyanditwaire emyaka n’emyaka. 14Musengwa yasiima obulamu bwa Enoka oyo, kyeyava n’amutoola amangu mu nsi eno ey’ebibi. Abantu ekyo baakibona aye tibaakitegeera, waire okukitaaku omwoyo bakyege, 15nti Katonda wa kivunika era asaasira abantu be, yaakuuma abalonde be abo.
Ebija okutuuka ku bakozi b’ebibi
16Abantu abakola ebituufu ni bwebafa, balisalira omusango abakozi b’ebibi abasigala nga bakaali balamu. N’abaisuka abaatuukirira amangu mu buto bwaibwe, balireetera abakozi b’ebibi abakaire okuswala. 17Abakozi b’ebibi balibona omugezi ng’afa, aye tibalisobola kutegeera ng’eyo n’ensambo Musengwa ye yategeka okumutwaliramu eyo ezira kibi kirimutuukaku. 18Bwebalimubona ng’afiire balimunhooma, aye Musengwa alibasekerera busekerere. Beene bwe balifa tibaliziikibwa mu kitiisa naire. N’abafu be balyagaana e magombe balibanhoomanga era baabavumiriranga ebyanda n’ebyanda. 19Katonda alibakuba ekigwo ghansi kyabasirisa nga tibakaasobola na kwogera ng’oti kasiru. Baliba ng’oti mmungo dha bifunfugu edh’ebizimbe ebitengeeseibwa okuva ku musingi gwene. Baliba mu bulumi bungi, era tibaliirayo kwidhukirwa kabiri. 20Baliidha okusalirwa omusango nga bali kutya, baababalira ebibi byaibwe. Ebikolwa byaibwe byene ebibi n’ebiribaleetera omusango okubasinga.