3
Ebirituuka ku bakola ebituufu
1Abantu abakola ebituufu Katonda abakuuma, era ezira kabi koonakoona kalibatuukaku. 2Kiba kya butamanha okulowooza nti bwenebwene abakola ebituufu bafa, era nti bwe batulekagho baba bazikiriire irala.3:2: Mag 4:17 3Batulekagho baaja, aye ekituufu kiri nti baba tibazikiriire. Baba bali mu miraala 4kuba waire nga mu kubona kw’abantu baba ng’oti babonerezeibwa, ekituufu kiri nti baba n’eisuubi ery’obulamu obutawaagho. 5Okudaazibwadaazibwa kwe babitamu kuba ng’oti ti kintu naire bw’okugeza ku birungi ebitaloodheka bye balifuna, kuba Katonda yabaleba yaabona nga bagwaniire okuba aghalala naye.3:5-6: Rom 8:18; 2 Kor 4:17 6Yabakenenula ng’oti ni zaabu bw’alongoosebwa ng’abisibwa mu muliro, era yaabasiima ng’oti ni bw’asiima emisengo egyokebwa egigheebwayo abo abamusinza.
7Katonda bw’aliidha okusasula abo abakola ebituufu, balyakira mu bakozi b’ebibi ng’oti n’omuliro bwegubbeibbera mu isubi eikalu. 8Balifuga amaghanga n’abantu baago, era Musengwa n’anaabanga kyabazinga waibwe ebyanda n’ebyanda. 9Abo abata obwesige bwaibwe mu Katonda balitegeera amazima. Abo abeesigwa y’ali balibanga ghalala naye mu kugonza kwe kuba wa kivunika era asaasira abo be yalondamu. 3:9 Ebyaghandiikibwa ebindi byongeraku biti era akuuma abantu abo ababe ku bubwe ( 4:15)
Ebirituuka ku bakozi b’ebibi
10Aye abatatya Katonda balifuna ekibonerezo ekigwanira endowooza yaibwe embi, kuba badheemera Musengwa baaloba okufaayo okukola ekituufu. 3:10 okukola ekituufu oba ku abo abakola ebituufu 11Omuntu yeenayeena bwanhooma amagezi era nga tayenda kugalagirwa, aba ali kweterekera bulamu bwidhwire nnaku ndhereere. Ghazira ky’asuubira naire, emirimo gy’akola adaagira bwereere era ghazira ky’aganhulwamu. 12Omukazi y’afumbirwa tabaamu kategeera naire, n’abaana be badaaliima okuviira irala mu buto bwaibwe. 13Ab’eizaire ery’omuntu oyo boonaboona babaaku ekikolimo.
Obukulu obw’empisa enkalamu
Omukazi omugumba bw’alyagaanibwa nga tabangaku mwenzi ku lunaku Katonda lw’alisaliraku omusango, aliba wa nkabi. Katonda oyo alimugha empeera. 14Ku lunaku olwo, ni bw’aba omusaadha omulaawe, yeena aliba wa nkabi kasita aliba ng’abaire agema Amateeka ga Katonda era nga talowooza bubi ku Katonda oyo. Aligheebwa ekirabo ekirungi einho olw’okuba omwesigwa, era yaagheebwa n’ekifo ekyesiimisa einho mu isinzizo lya Katonda, 15kuba ebikolwa ebirungi bivaamu ebibala eby’ekitiisa einho. Era amagezi gali ng’oti n’omuzi omulamu, kuba gusibuka nga bagutemyeku.
16Aye abaana abazaalibwa mu bwenzi n’abo abazaalibwa mu bumenhi bw’amateeka tibalikula, balifa mangu. 17Ate waire ni bwebalighangaala, baja kunhoomebwanga bunhoomebwe. Ghazira alibataamu kanhagansi mu bukaire bwaibwe. 18Era bwebalifa nga bakaali bato, bazira isuubi lye baliba nalyo waire okuba n’obuyambi bwonabwona ku lunaku olw’okusalirwaku omusango, 19kuba enkomerero y’abaana abazaalibwa mu bumenhi bw’amateeka, bulumi bwereere.