2
Ebidhuubo ebyonoonefu
1Abantu ababi baba bakyamu bwe bakoba mule bati: “Obulamu bwaife bumpi ate bwaidhula enaku, era enkomerero yaabwo bw’etuuka, omuntu azira gh’alumukira kwewonia. Ghazira muntu amanhiibwa eyavaayooku eyo e magombe n’aira. 2Okuzaalibwa kwaife kutugwaku bugwe, n’obulamu bwaife bwe buwaagho tuba ng’oti tituzaalibwangaku naire. Omuuka gwe tugheera guli ng’oti mwosi bwosi ogufuumuuka, n’ebidhuubo byaife byaba ng’oti n’obusambuka obuva ku myoyo gyaife nga giri kukuba. 3Obusambuka obwo bwe buzikira, ng’olwo emibiri gyaife gisiriira gifuuka ivu, era ng’olwo omuuka gwe tugheera gufuuka mpewo buwewo eri agho etyo. 4Ekiseera kiidha kutuuka ghabule aidhukira ekintu kyonakyona kye twakola, n’amaina gaife geene goona geerabirwe. Olwo obulamu bwaife bubitegho ng’ekinsense ky’ekire, era bubuliregho irala ng’olufu bwe luwaagho ng’endhuba erwaseeku. 5Ekiseera kye tumala ku nsi kiri ng’oti kinsense ekiri kubita obubite. Ghazira asobola kuwona ng’olunaku olw’okufa kwe lumutuuseeku, kuba lwamala ira okuteebwagho lwakakasibwa nga tirukaaseesekayo mberi.”
6Abantu ababi era bakoba bati: “Agho ni ka twesanhukize ku birungi ebiri mu bulamu, era tubeegho mu nsi muno nga ghazira kitweraliikiriza naire, ng’oti ni bwetwalinga nga tukaali bato. 7Tunhwe omwenge ogusingamu kuba gwa mughendo, twekube n’obuwoowo obusingamu kuba bulungi, era ghalobe kubaagho kimuli kyonakyona ekitusuba mu biseera ebimuli ghe bimulikiza. 8Tunoge ebimuli bya roza tubyetimbe ku mitwe ng’oti ngule, nga bikaali kuniala. 9Twenatwena ka tuyoolookere mu bibinuko, buli ghantu tulekegho obumanhiso obwoleka okwedhalabya kwaife; kuba ogwo n’omugabo gwaife mu bulamu era ekyo kye tuli n’okukola.
10“Ka tukirige abaavu ni bwebaba nga bakola ebituufu, tulobe kusaasira banamwandu, waire okuta akanhagansi mu bantu abakaire. 11Okughaguza n’amaani n’ekinaatuleetera okweyeta abatuufu, tusobole okufunanga kye twenda. Obunafu ghazira kye bugasa naire. 12Abantu abakola ebituufu batukaluubiriza bukaluubirize, kale tuli n’okunoonia engeri ey’okubeewonia. Batakania bye tukola, baatuvunaana okumenha Amateeka ga Musa n’obutajiira ku mpisa dha badhaadha baife. 13Beefuula okuba abaidhi einho Katonda, era beeyeta mbu baana ba Musengwa. 14Ekiseera kyonakyona baba nga bali kukontana n’endowooza yaife yoonayoona. 15Titwenda na kubalingaku, kuba tibali ng’oti n’abantu abandi, n’engeri dhaibwe ti dhiri ng’oti n’edh’abantu abandi. 16Eneebisa yaife bagibona nga nkyamu inho, olwo kyaba nti abantu abandi bali n’okwesamba kiisi kye tukola. Beenhuminkiriza mbu Katonda ni iseibwe, era baakitwala mbu abantu abakola ebituufu bonka n’abalifa obulungi. 17Aye ka tuteege tubone oba nga bwenebwene kye bakoba kituufu. Ka tuteege tubone bwe biriba, nga saawa yaibwe ey’okufa etuuse. 18Oba nga bwenebwene abakola ebituufu baana ba Katonda, Katonda oyo alibawonia abazigu baibwe. 19Kale leka tubalebe, tubavumevume, tubatuuseeku n’obulumi. Memale tubone oba nga bwenebwene balisigala nga bakaali baikaikamu era nga baguminkiriza. 20Ka tubasalire ogw’okufa, okufa kule kwene okw’ensoni. Kasita beene bakoba bati Katonda aidha kubakuumanga.”
21Abantu ababi batyo bwebalowooza, aye nga baba badaaliimye mu ndowooza yaibwe eyo. Ebibi byaibwe byene n’ebibaziba amaiso, 22baaloba kumanha ntegeka dha Katonda edh’ekyama, waire okusuubira okugheebwa empeera ey’okwebisa mu bulamu obutukuvu era obuziraku kye bunenezebwa. 23Katonda yatutonda mu mboneka ye yeene, era nga tituli ba kufa.2:23: Mainh 1:26-27 24Yali nsaalwa ya Sitaani n’eyaleeta okufa mu nsi, era abo aba Sitaani n’abaja okufa.