19
Obusiru obwaitaitana Abamisiri
1Aye abantu abo abatakutya iwe Katonda, baasigala nga bakaalumizibwa obusungu bwo obutaalimu kusaasira naire okutuukiza irala ku nkomerero; kuba wamanha kye baali baja okukola nga bakaali na kukikola. 2Wamanha bukalamu oti waire baaleka abantu bo baje era baabakoba banguyeeku okuvaagho, baali baja kubeefuulaku bababingirire. 3Abamisiri abo bwe baali bakaali ku magombe nga bali kulira abafu baibwe, baamala kabiri baasalagho okukola ekintu ekindi eky’ekisiru, baabingirira abantu be beegayiriire okuja nga bali ng’oti bali bwa kubalumukaku beibe. 4Ekibonerezo ekyo ekyabagwanira n’ekyabaleetera okukola batyo, kyabeerabiza ensonga lwaki ebyo byonabyona byabatuukaku. Olwo okudaazibwadaazibwa okwali kusigaireyo, kusobole okubaidhira mu bwidhuvu nga bwe kwabategekerwa. 5Baali bali n’okufa enfa etali yabuliidho, aye ng’abantu bo baja bwa mu maiso na lugendo lwaibwe olwalimu ebyewuunhisa kamaala.
Katonda yakulemberamu abantu be era yaabakuuma
6Ebitonde byonabyona wabiragira byakyusa engeri dhaabyo, akabi kalobe kutuuka ku bantu bo. 7Baabona ekire nga kiri ghaigulu ghe baasimba weema dhaibwe, baabona nga n’aghabairenga amaadhi ghafuuse itaka ikalu. Enhandha Emyufu yaafuuka ngira mwe basobola okutambulira nga ghazira kibalobera naire, nga n’aghabairenga okusiikuuka kwayo gha mezeegho isubi. 8Agho abantu bo boonaboona iwe b’okuuma, baasomoka enhandha nga bwe beerolera ebyewuunhio ebyo. 9Baaja nga bali kubbagalya ng’oti mbalaasi era nga bali kutuumatuuma ng’oti butaama buto, eno nga bwebaakusaaka iwe Musengwa olw’okubalokola. 10Baali bakaidhukira ebyaligho mu biseera bye baabeeramu abairu. Nga bakaidhukira ensi bwe yazaalagania obudhuuni mu kifo eky’okuzaalagania ensolo, n’omwiga bwe gwazaalagania ebikere ni bivuluudha obuvuluudhe mu kifo eky’okuzaalagania ebyenhandha. 11Oluvainhuma bwe baayenda einho emere enungi, baabona ekika eky’enhonhi kye baali tibabonangaku. 12Obunhonhi obuli ng’oti bukologo bwava ku nhandha, bwaidha okubawonia endhala.
Okubonereza Abamisiri
13Olukuba olw’amaani lwatyabuka, lwalabula abakozi ab’ebibi abo ku kibonerezo ekyali kiri kubaidhira. Baagheebwa ekibonerezo ekyali nga kibajaamu olw’ebibi byaibwe; kuba ghaali tighabangaghooku ighanga likyagha bubi inho bantu bava ndha ng’eryo. 14Abantu abandi baali bamanhiibwa lwa kuloba kwaniriza bantu abava endha abaidhanga ye bali. Aye ate bano baagwa ku bageni baibwe abaabakolera ebirungi, baabafuula bwa bairu. 15Kituufu nti abantu ab’eighanga lyonalyona abaloba okwaniriza abantu abava endha balibonerezebwa. 16Aye bano abaasooka ni baaniriza obukalamu abantu abava ndha, ni babakolera n’embaga mu kusagamba era ni babatwala nga banaibwe be baagayaga nabo, oluvainhuma baabadaazadaaza n’obukambwe obutaloodheka. 17Kyebaava ni basindikirwa okutulughala, baaba ng’oti ni bale ab’e Sodoma abaaja ku mulyango gwa Loti omusaadha eyakolanga ebituufu. Beeyagaana nga bali mu nzikiiza eri bedimudimu, buli muntu ng’ali kughaamanta bughaamante okutuuka ku mulyango gwe.
Amaani ga Katonda ageewuunhisa
18Ku ntongooli, buli lukosi luba n’envuga yaalwo, aye envuga ey’olukosi olulala bwebagiyimba ghalala n’envuga edh’enkosi edhindi, kireetera olwembo okunhuma. Ni mu kiseera ekyo, ebitonde byonabyona bityo bwe byakola. Bona nga bwe byali! 19Ensolo edh’oku bukalu dhaafuuka dha mu maadhi, ate ebitonde eby’omu maadhi ebyewuga obwewuge byaira ku bukalu. 20Omuliro gwayakira ni mu maadhi, era amaadhi ago gaalemererwa okuguzikiza. 21Ate era enimi edh’omuliro dhaalemererwa okwokya emibiri egy’ebitonde ebifa, ebyali biri kugutambuliramu. Era tidhaasaanuusa mere eyava mu igulu, eyandibaire esaanuuka ng’oti mabaale ga mugozi.
22Wo Musengwa, abantu bo wabagulumiza waabagheesa ekitiisa, era tobalekulirangaku agho, obayamba buliidho era buli ghantu.