18
Obutangaavu bwakira ku Baisiraeli
1Aye nga mu kiseera ekyo kyonakyona, obutangaavu obw’amaani bwali bwakiranga abantu bo abatukuvu. Ng’abazigu baibwe bawulira amamiro gaibwe, aye nga tibasobola kubabona. Baabeegombanga olw’okuba baali ba nkabi nga tibadaagadaaga nga beene.18:1-4: Kuv 13:17-22 2Abazigu abo era nga basiima abantu bo abo abatukuvu be baatulugunhianga, olw’okubona nga baali tibali kubeesasuulizaaku ekiseera ekyo. Kale baabeeghemba bagolole babaviire.18:2 baabeeghemba bagolole babaviire oba baabeeghemba babasonighe olw’obukyayi bwaibwe obwaligho.
3Agho waakozesa omuliro ogwali gwesimbye ng’oti mpango, waamuliikirira abantu bo agh’okubita mu nsi ye baali tibaidhi. Omuliro ogwo gwali ng’oti ndhuba eyali nga tesobola kubakola kabi mu lugendo lwaibwe olwo olw’ekitiibwa. 4Aye abazigu baibwe abaali nga tibaikiriziibwa kubona butangaavu obwo kyabagwanira basibirwe mu nzikiiza, kuba beene boona baakuumiranga abantu bo mu busibe. Ate nga obutangaavu obw’amateeka obw’ebyanda n’ebyanda bwali buja kugheebwa ensi nga bubisibwa mu bantu bo abo.
Okufa okw’abaana ababeri ab’Abamisiri
5Abazigu bo bwe baali bali kutuukiriza kye baasalagho eky’okwita abaana abaghere ab’abantu bo abatukuvu, ghaaligho omwana mulala eyalekebwa agho atyo, aye baamala baamulonda yaawona. Agho waabonereza abazigu bo ng’oita abaana baibwe mu bungi bwene. Waadimiza n’eigye lyaibwe eirambirira mu mwidhuzo ogw’amaadhi agaali ag’amaani. 6Aye badhaadha baife baali bamaze okukoberwa ekija okubaagho obwire obwo, basobole okusagamba n’okuta obwesige mu bye wabasuubiza. 7Abantu bo baamanha ng’oidha kuwonia eighanga ery’abantu abakola ebituufu, ate ozikirize abazigu baibwe. 8Kye wakozesa okubonereza abazigu baife, n’ekirala kyene ekyo kye wakozesa okutugheesa ekitiibwa bwe watweta twire y’oli.
9Mu kiseera ekyo kyonakyona abantu abaali nga batya Katonda mu ighanga lyo, baaghangayo emisengo mu ngiso. Era nga bagumyagana bati bali n’okukuuma amateeka ga Katonda, olwo bagabanenga ku nkabi edhigheebwa buli muntu era bagemerenga ghalala ebizibu ebya buli muntu. Baali baatoolera na ira okwemba enhembo dha badhaadha baibwe edhikusaaka iwe Katonda. 10Aye okulira okw’abazigu baibwe okugemya n’enaku kwawulirwanga woonawoona, nga bali kugegenga olw’abaana baibwe abaafa. 11Abaali abairu baafuna ekibonerezo n’ekirala ni basengwa baibwe. Ni kyabazinga yaafiirwa ng’abantu ababuliidho bwe bafiirwa. 12Emirambo egy’abantu abaafa olumbe olulala olwo nga tigibalika olw’obungi. N’abalamu abaasigalagho nga tibamala kugiziika gyonagyona. Mu kaseera buseera kati, abaana baibwe abaali abagonzi einho, baazikirira. 13Abantu abo tibaafaayo ku kulabulwa kwonakwona olw’okwesiguliranga ku maani ag’okulagulwa kwaibwe. Aye abaana baibwe abalenzi ababeri bwe baafa, agho baakitegeera ng’eighanga ly’Abaisiraeli lya baana ba Katonda.
14Obwire obwo obwali obumpi bwali bwakatuuka bwa ghagati, nga woonawoona ghaligho kasiriikiriro. 15Memale ekiragiro kyo eky’amaani agataloodheka kyaziinhuuka ku kityamo kyo eky’obwakyabazinga mu igulu nga kiri ng’oti mwisirukale mukambwe. Kyaika ku nsi eyo eyali emaze okusalirwa ogw’okuzikirizibwa, 16nga kigemye empiima endhogi, okutuukiriza by’olagiire aghazira kukyusaamu naire. Kyayemerera ku nsi aye ng’omutwe gutuuka ku igulu, olwo kyaidhuza ensi yoonayoona okufa. 17Amangu ago abantu baabonekerwa mu birooto ebintu ebitiisa einho. Baidhula okutya okwabazindula obuzindule, kwe bataamanhaku ni ye kwaviira. 18Mu nsi eyo mwonamwona ng’obona abagwire eno n’ere nga kumpi bafu. Era nga bali kwatula ekibaviiriireku okufa. 19Baamanha lwaki baali bali kufa, kuba ebirooto byaibwe ebitiisa einho byali bimaze okubakobera.
Aaroni asabira Abaisiraeli bawone okufa
20N’abantu ab’eighanga ery’abakola ebituufu boona baafa, kuba endwaire ya kawumpuli yaidha yaagema bangi ku bo nga bali mu irungu, aye obusungu bwo tibwalwagho.18:20-25: Kub 16:41-50 21Ghaaligho omuntu eyali aziraku musango gwonagwona ng’eriina lye ni Aaroni, eyayangugha n’abalwanirira okubawonia. Yakola omulimo ogw’obwakabona, yaakusaba era yaaniokeza obubbaani olw’okusoniyisa abantu ebibi. Mu nsambo eyo yaaba nga yakozesa okusaba n’okuniosa obubbaani ng’eky’okulwanisa, okumalagho obusungu bwo n’okukomya endwaire ya kawumpuli eyo. Mu kukola ekyo yakakasa nga bwe yali omugheereza wo. 22Yaghangula ekizibu ekyo ekyali ekikakali,18:22 Mu bighandiiko ebindi kiri nti ekizibu ekyo ekyali ekikakali Mu Lugureki kiri nti eikuukuubira ly’abantu. aye nga takozesa maani ge mwene oba okukozesa eigye. Yakozesa kusaba busabe yaalekeza ekibonerezo, ng’akwidhukiza bye wasuubiza badhaadha baife ng’olayira. 23Emirambo gyali gimaze okughera emungo n’emungo, aye yaavaayo yaidha okulekeza obusungu bwo, bulobe kukola kabi abo abaali bakaasigairegho nga balamu. 24Yavaalanga ekanzu nga ndholigedholige n’ebifaananie eby’ebintu ebiri ku igulu ni ku nsi. Ate olw’okugheesa badhaadha baife ekitiisa, yavaalanga obunhiriri buna obw’amabaale mu kifuba, nga buli ibaale lighandiikiibwaku n’ekyuma ekisongovu eriina irala. Era ng’ekitiisa kyo eky’obwakyabazinga kibonekera mu kitambaala kye eky’oku mutwe, ekyali kidholigiibwa ng’oti ngule. 25Ole eyaidha okuzikiriza bwe yabona ebintu ebyo yaatya, eby’okuzikiriza yaabivaaku buve. Aye waire ng’ekyo kyali ng’oti n’okulegaku obulege ku busungu bwo, kyali kimala bumale.