17
Ebitiisa ebyagwira Abamisiri obwire
1Wo Musengwa, engeri y’osalamu ensonga yeewuunhisa era nkalangufu ya kwinhonhola. Abantu abaali bakaali kwegeresebwa kyebaava ni badaaliima. 2Abantu abadheemu bwebaalowooza bati eighanga lyo eitukuvu lyali mu buyinza bwaibwe, beene n’abaasibirwa mu nzikiiza ey’obwire obulwagho okukya. Baalambaala mu ndhu dhaibwe nga baigaliirwa omwo, nga tibakaali ghalala n’abo b’olabirira ebyanda n’ebyanda. 3Baalowooza bati ebibi byaibwe byakwekebwa era nga ghaziragho muntu yabibona. Era baalowooza bati olusuubo olutabitamu maiso lwabikingiriza, lwabireetera okwerabirwa. Aye buti batabwirwa era bali mu kutya okw’amaani, nga batiisibwa ebintu ebiri ng’oti mizimu. 4N’ebisenge eby’omunda einho bye baalimu tibyabawonia kutya. Baali beezungulwirwa okuvuuvuuma okw’amamiro agatiisa einho, n’emizimu egyekapye mu maiso gyababonekera. 5Nga ghaziragho muliro gwa maani kubagha ku butangaavu, waire okubaagho emuunienie edhaaka einho okukendeeza ku nzikiiza ey’obwire obwo eyali ng’oti bwa lumbe. 6Ghaalighooku bwa muliro ogwekunaania gwene era nga gutiisa inho, ogwo n’ogwabaakiraku. Era olw’okutya einho kwe baalimu, okwaka okwo kwabaleetera okulowooza bati ebintu bye babona buliidho byali bibi inho okuwula ni bire bye baali beefaanaanirizanga obwefaanaanirize. 7Obukodyo obw’ekirogo abalaguzi baibwe bwe baakozesanga, bwali tibukaalimu makulu naire. N’amagezi goonagoona ge baali beenhumiriza nago ghazira kalungi kaagavaamu. 8Baali bakoba nga bwe basobola okubingagho okutya n’endwaire bive mu myoyo emirwaire, aye ate beene n’abaali n’obulwaire obw’okutya okw’ekisiru. 9Ni bweghaabanga nga ghaziragho kabi koonakoona, nga beene bawulira ng’oti emisota egiri kudhwira ghalala n’ensolo, biri kubaidhira. 10Kale baafa nga bali kudhugumira olw’okutya, nga batya n’okuzibula amaiso gaibwe, ate nga tibaghanga na kugazibiriza.
11Abakozi b’ebibi baba bati inho, era beesalira beene omusango okubasinga. Olw’omwoyo okuba nga gubalumiriza, kibaleetera mule okukubanga ekifaananie nti ebintu bibi inho okuwula ni bwenebwene bwe biba nga biri. 12Okutya tikuva ku kintu kindi okutoolaku okulemererwa okweyambisa amagezi obukalamu. 13Omuntu bw’alemererwa okweyambisa amagezi obukalamu, kimuleetera okuba n’okutya okuleetebwa obutamanha.
14Obwire bwonabwona abantu abo boonaboona baabumala ng’endoolo dhibabuze, waire nga obwire obwo tibwali na buyinza bubafuga, kuba bwava e magombe ezira buyinza naire. 15Ng’olundi ebintu ebiri ng’oti mizimu bibabingirira. Ate olundi okutya kwabagwaku bugwe, kwabasinza amaani baasaanhalala. 16Ng’oja okubona ng’abantu bagwa era baasigala agho, ti lwa kuba nti basibiibwa ndhegere dha kyuma aye lwa kuba nti basibiibwa kutya kwaibwe kwene. 17Abalimi, abaayi n’abapakasi eyo mu byalo, nga batuukibwaku ekizibu ekyo aghazira kukyewonia, era nga basibibwa oludhegere lulala olwo olw’enzikiiza. 18Empewo eri kuwuuma, enhonhi edhiri kwemba eyo mu miti, okuwolomboka okw’amaadhi agali kwefuukuula, 19okududumuka okw’amabaale agali kweyiriikulula, empindo edh’ebitonde ebiri kulumuka aye nga tibiboneka, okuwologoma okw’ensolo enkambwe, n’okwevugiza okuva mu nsozi; ebyo byonabyona byabasaanhalaza olw’entiisa. 20Bino nga bibaagho musana gwene, era nga mu nsi yoonayoona abantu abandi baali bali kwekolera mirimo gyaibwe nga ghazira kibalobera naire. 21Abantu abo bonka n’abaali baghembeibwa mu bwire obwo obwali bugemye butyo, nga bali kulega ku nzikiiza ey’e magombe eyali ebateegereire. Aye ate beene n’abeekaluubiriza einho okusingaku n’enzikiiza eyo ye baalimu bwe yabakaluubiriza.