15
Katonda omutuufu n’agha obulamu obutafa
1Aye iwe Katonda waife, oli omutuufu, wa kivunika era muguminkiriza. Ofuga ebintu byonabyona n’obusaasizi. 2Ni bwetukola ebibi, tusigala nga tuli babo, era nga twidhi n’obuyinza bwo. Aye olw’okuba twidhi nga tuli babo, titwidha kukola bibi. 3Okukumanha iwe, n’ekirala n’omuntu okukola ebituufu ng’aziramu buguya naire. Mu kumanha obuyinza bwo, n’omusimuka obutafa. 4Ife titubuzibwabuzibwangaku kintu kibi kyonakyona ekikoleibwa omuntu mu kupangirira obupangirire. Oba okubuzibwabuzibwa ekintu ekizira mugaso naire ekikoleibwa omukozi w’ebifaananie, ng’akidholiigedholiige ni langi edha buli nsambo. 5Abantu abasiru bwebabona ku kintu ng’oti n’ekyo, kibasiikuula emyoyo kyabaleetera okwegomba ebifaananie ebifu ebizira bulamu naire. 6Abantu abagonza einho ebintu ebibi ng’oti n’ebyo era abagwaniire okubitaamu eisuubi lyaibwe, ni beene abo ababikola ni babyegomba era ni babisinza.
Obusiru obuli mu kusinza ebifaananie ebiwumbe mu itosi
7Omuwumbi akozesa eitosi eigonvu n’obwegendereza, yaaliwumbamu ebintu bye tukozesa. Ebintu ebindi bikozesebwa mirimo mirungi ebindi mibi, aye byonabyona abikola mu itosi irala eryo, era ng’akozesa amagezi malala ago. Omuwumbi mwene n’asalagho omulimo kiisi kiwumbe gwe kinaakola. 8Mu itosi irala eryo, omuwumbi oyo ayonoona omulimo gwe ng’awumba ekifaananie ekizira mugaso yaakyeta katonda. Ate nga ni mwene yeena einhuma ere baamuwumba mu itaka lyene eryo. Era nga ye bwidha eyo nga ghabiseeghooku akaseera, ali n’okwira mu itaka mwe yava, bw’aliba ng’amaze okwizaayo omwoyo gwe baamwazika. 9Obulamu bwe bumpi era wa kufa mangu, aye ekyo takifaaku. Ayenda kusinganwa businganwe n’abo abagheesa ebintu mu zaabu ni mu feeza ni mu kyuma eky’ekikomo, asobole okukola ebintu n’ebirala nga bye bakola. Era yeenhumiriza inho olw’ebyo by’akola, waire nga biziramu makulu naire. 10Omwoyo gwe gwakolebwa mu ivu buvu. By’asuubira biri ng’oti bityanka bya mu nguudo omuzira mugaso. N’eitosi obutosi lya mughendo okuwula obulamu bwe, 11kuba yalemererwa okumanha Katonda eyamuwumba, n’amutaamu omwoyo ogumuleetera okuba omulamu, era n’amufuuwamu n’omuuka gw’agheera. 12Obulamu bw’omuntu abweta muzaanho buzaanho, era abubona ng’oti katale butale ak’okukoleramu amagoba. Awulira mule ng’ateekwa okufuna empiiya, ni bw’aba ng’adhifunie mu bukyamu. 13Omuwumbi oyo akola ebifaananie ebiwumbe n’ensugha edhimenheka ng’abitoola mu itosi n’eirala eryo, aidhi bukalamu okuwula abandi boonaboona nga ky’akola kibi.
Okubonereza Abamisiri
14Aye abasiru abasembayo mu bantu boonaboona, era abaziriramu irala na kategeera nga n’abaana abaghere babawula, n’abo abazigu abaatuntuzanga abantu bo, iwe Musengwa. 15Baalowoozanga bati byonabyona bye baasinzanga ebitali Katonda, byalinga bakatonda beenebeene, waire nga tibisobola kubona n’amaiso gaabyo, oba okugheera n’enhindo dhaabyo, oba okuwulira n’amatu gaabyo, oba okuwulira nga bigemye ekintu n’engalo dhaabyo, oba okutambula n’amagulu gaabyo. 16Muntu buntu, ali n’omwoyo nga baagumwazikaku bwazike, n’eyabikola. Ghazira muntu asobola kukola katonda ali na bulamu ng’oti muntu; 17kuba, nga buli muntu bw’ali n’okufa, n’ekintu kyonakyona ky’akola n’engalo dhe embi kiba kifu. Mwene asinga ekintu ekyo ky’asinza, kuba mwene ali n’obulamu aye ky’asinza tikibangaku na bulamu. 18Wo Musengwa, abazigu abo ab’abantu bo, basinza ebisolo ebisinga kuba bibi era ebitali birongoofu. Baatwalizaamu n’ebyo ebisembayo obutaba na magezi, 19ebitasikiriza muntu yeenayeena kubyenda. Katonda mwene n’eyabitiza ebisolo ebyo, yaaloba kubisiima na kubigha nkabi dhe.