14
Okugerangerania ebisinzibwa ebitali Katonda n’eryato lya Noa ery’ekiti
1Mu nsambo n’endala, n’omuntu ali kwetegeka okusomoka enhandha esiikuuse, aja yaasaba ekiti obuti kimuyambe. Aye nga n’eryato ly’aja okusomokeramu likisinga obugumu. 2Omuntu yayiiya okukola eryato ng’ayenda kufunamu magoba. Era omukugu yaalikola n’amagezi. 3Aye iwe Lata, niiwe olirabirira waalibisa bukalamu mu kwefuukuula okw’enhandha. 4Olwo weeyoleka nti osobola okuwonia abantu akabi koonakoona, era kyaba nti n’abazira bumanhirivu baghanga okuja ku nhandha baasaabala mu lyato. 5Oyenda ebintu bye wakola n’amagezi go bikozesebwe. Ekyo kyasobozesa abantu okughaayo obulamu bwaibwe, baasomoka enhandha eri kwefuukuula nga bali mu lyato, era baatuuka bukalamu ku bukalu, olw’okwesiga okukuumibwa ekiti obuti ekitono kityo.
6Ekyo kyaligho ni mu biseera eby’eira, oluse olw’abantu abawaigufu abeekuluntazanga bwe lwali luli kuzikirizibwa. Eisuubi ery’ensi lyawonera mu lyato ng’oti n’eryo ku lw’obuyinza bwo. Mu nsambo eyo waalekagho oluse olw’abantu oluyaaka ku nsi. 7Eryato lya Noa ery’omuti lyali lya nkabi, kuba lyawoneramu abaakolanga ebituufu. 8Aye ekisinzibwa ekitali Katonda omuntu ky’akola n’engalo, kiriku ekikolimo. N’omuntu akikola yeena aliku ekikolimo, olw’okukola ekintu ekija okuzikirira aye n’akyeta katonda. 9Katonda akyagha abantu abatamutya, era mu nsambo n’endala eyo yaakyagha n’ebintu bye bakola ebyoleka nga bwebatamutya. 10Era aja kubonereza ebintu ebyakolebwa, ghalala n’abantu abaabikola. 11Aja kusalira omusango ebisinzibwa ebitali Katonda waire nga bikolebwa mu bintu Katonda bye yatonda, kuba bimalanga byafuuka ebyenhinhalwa byagemya abantu abasiru ng’oti mutego, byabasuula mu kabi.
Ensimuko ey’okusinza ebitali Katonda
12Obwenzi bwatoolera na kukola bisinzibwa ebitali Katonda. Era okwo n’okwava obulamu bw’abantu okwonooneka. 13Ebisinzibwa ebyo ebitali Katonda tibyaligho mu mainhama, era tibyakubaagho byanda na byanda. 14Byaidha mu nsi olw’okwekuluntaza okw’abantu. Era enkomerero yaabyo yamala ira okubitegekerwa, nga ya mangu geene.
15Olwatuuka ghaabaagho omuzaire eyali mu bughafu obubitirivu olw’okufiirwa omwana we amangumangu. Yaakola ekifaananie eky’omwana oyo eyamutoolebwaku amangu gatyo. Kale yaagha omuntu obuntu omufu ekitiisa ng’oti katonda, era yaateeragho ab’omu maka ge emikolo n’obulombolombo ebikolebwa abatatya Katonda. 16Ebiseera bwe byaja nga byeyongerayo, empisa eyo eziramu kutya Katonda yaaja ng’eyongerwamu amaani, era yaafuukira irala iteeka. Olwo abafuzi ab’obuyinza baatoolera okulagira abantu basinzenga ebifaananie ebibaadhe. 17Abantu abaalinga eghala n’omufuzi waibwe nga tibasobola kumutaamu kitiisa nga bali kumubonaku, beefaanaanirizanga emboneka ye, baakolanga ekifaananie ekiri ng’oti ni mwene. 18Abakozi ab’ebifaananie abaafubanga einho baajanga nga basansaania okusinza okwo, baakutuusanga ni mu bantu abaalinga tibaidhi kyabazinga oyo. 19Omukozi ow’ebifaananie bwe yayendanga okusanhusa omufuzi, ng’akozesa obukugu bwe yaabaadha ekifaananie ekiboneka obulungi einho okusinga n’omufuzi mwene. 20Agho abantu baasikirizibwa obulungi obw’ekifaananie ekyo, olwo nga n’omufuzi ye babairenga bagha obw’ekitiisa, afuuka kintu kye basinza. 21Kale ebyo byonabyona byafuuka omutego omwisi, kuba abantu abaabanga mu bughafu oba nga bafugibwa bakyabazinga, baatolanga ebintu ebyakolebwa mu mabaale oba mu miti baabighanga ekitiisa ekyandibaire kigheebwa Katonda yenka.
Ebiva mu kusinza ebitali Katonda
22Tibaakoma ku kya kuwubwa kumanha Katonda kyonka, baayongerangaku n’eky’okuba mu ntalo kamaala. Aye olw’obutamanha bwe baali nabwo, embeera embi etyo ye baalimu baagibonanga nga ya miraala. 23Baatemulanga abaana mu mikolo gyaibwe gye baakolanga ku bantu, ni gye baakolanga egy’ekyama, n’ebibinuko ebibi eby’okwesanhukizaamu bye baakolerangamu ebintu ebitali bya mu buntu. 24Nga tibakaafaayo kukuuma mpisa nkalamu mu bulamu bwaibwe ni mu bufumbo bwaibwe. Aye nga basalira banaibwe enkwe baabaitisa, oba baabaleetera enaku nga babendera bakazi baibwe. 25Woonawoona nga ghaidhwire kwitagana, bwibi, buguya, kulya nguzi, buteesigagana, bwegugungo, kusubaghagana, 26kutuntuza bantu baziraku musango, butasiima, bwonoonefu bwa mpisa, kukozesa mibiri bikolwa bya budankaanu, bufumbo kusasikasasika, bwenzi na bugwenhufu. 27Mu kusinza ebitali Katonda ebiri n’amaina agatasaine na kubisibwa mu kanwa, n’omuva okukola ebibi ebya buli nsambo. Era n’ebyo ebiva mu kukola ebibi, omwo mwe biva ghalala n’enkomerero yaabyo. 28Abantu ababisinza beeyasa bweyase ng’oti balalu, oba baagha obulanzi obw’obuguya, oba baamalira obulamu bwaibwe ku kukola ebibi, oba baaloba kutuukiriza bye basuubiza. 29Boogera eby’obuguya, baalayira n’okulayira nga baziramu na kutya nti baidha kubonerezebwa kuba ebisinzibwa ebyo bye bataamu obwesige biziramu bulamu naire. 30Aye ku nkomerero baja kubonerezebwa lwa nsonga ibiri: Esooka, lwa kuba baagwa mu nsobi baava ku Katonda, baasinza ebitali Katonda. Eyokubiri, lwa kuba tibaatwala butukuvu ng’ekikulu, kale baalayiranga eby’obuguya okulimba abantu. 31Abantu abatakola bituufu bwe bakola ebibi, amaani g’ekyo kye bakozesa mu kulayira ti n’agabayiiga, aye ekibonerezo ekigwaniire abakozi b’ebibi n’ekibayiiga kyene.