13
Obusiru obuli mu kusinza obutonde
1Abantu boonaboona abataidhi Katonda, basiru busiru. Abantu ng’oti n’abo balinga ku bintu ebirungi ebibeetooloire, aye era baalemwa okubona nti ghaligho Katonda omulamu. Beekebeedha ebintu Katonda bye yakola, aye baalemwa okubona oyo eyabikola. 2Aye badhuubiriza budhuubirize bati ebintu bino ni bakatonda abafuga ensi: omuliro, oba kiwunga, oba empewo ey’amaani, oba muunienie edheezungulula, oba amaadhi ageefuukuula, oba ebyaka ebiri ku igulu. 3Abantu baasanhusibwa inho emboneka enungi ey’ebintu ebyo, baabidhuubiriza okuba bakatonda. Aye bagwaine bakitegeere ng’ebintu ebyo biriku Musengwa waabyo abifuga era ng’abisinga byonabyona, kuba oyo n’omutonzi eyakola buli kintu kirungi. 4Abantu era beewuunhia amaani ag’ebintu ebyo n’ensambo ye byebisaamu. Aye bagwaine bategeerere ku bintu ebyo nti eyabikola wa maani inho okubiwula. 5Bwetukizuula nti ebitonde bingi inho era nti biboneka bulungi inho, olwo tuba tuli kwega ku Mutonzi waabyo nga bw’afaanana.
6Aye ate, abantu abo tuba kubanenia aye nga titwandibaneniiza inho, kuba tomanha bwe baba nga baayenda inho okuzuula Katonda, aye baamala baadaaliima budaaliime. 7Olw’okuba ebintu Katonda bye yakola biba agho nabo, ekyo kibaleetera okubyekebeedha einho byabatwaliriza omwoyo, baatuuka okulowooza bati olw’okuba biboneka bulungi bityo, biteekwa kuba bakatonda. 8Aye era abantu bano bazira kye beegemya kuwona musango, 9kuba oba baasobola okumanha ebingi bityo, baabaamu n’amagezi aganoonereza ku bitonde by’omu nsi, memale lwaki tibasobola kuzuula nti eriyo Musengwa ow’ebintu ebyo byonabyona?
Obusiru obuli mu kusinza ebitali Katonda
10Mu bantu boonaboona, abasingayo obutaba na isanhu n’abo abata eisuubi lyaibwe mu bintu ebizira bulamu, ni basinza ebintu ebyakolebwa n’engalo edh’abantu nga babyeta “bakatonda”: ebifaananie eby’ensolo ebyakolebwa n’obukugu mu zaabu ni mu feeza, oba ebyabaadhibwa abantu ab’eira mu mabaale agazira mugaso.13:10—14:31: Isa 44:9-20; Yer 10:1-16; Mbal Yer 1:8-73 11Omuntu omukugu mu kubaadha ebintu mu miti, asobola okutema omuti gw’abona nga n’omutuufu, yaagusisibulaku ekiwutu n’obwegendereza, era yaakozesa obukugu yaabaadhamu ekintu eky’omugaso. 12Bw’amala, akozesa ebitundu ebisigalagho ng’enku, yaafumbisa emere era yaagirya yaawoomerwa. 13Aye ku bikutukutu eby’omuti ogwo asobola okutoolaku ekitundu kirala ekitakaali na mugaso, olw’okubaamu ebigufulugufulu oba okuba ekigodegode. Yaakozesa ebiseera bye, bye yandibeereire agho ng’ali kulera bwa ngalo, yaakikolamu ekifaananie ekiri ng’oti kya muntu. 14Oba yaakikolamu ekifaananie eky’ensolo ezira na mugaso. Yaakisiigaku kyonakyona langi ya kasaayisaayi, olw’okukweka kiisi kikyamu ekikiriku. 15Agho yaakikolerayo ekifo mwe kinaaja ku kimante, yaakikomerera omwo n’emisumaali yaakigumya bukalamu. 16Yeegendereza okubona nti tikigwa, kuba aidhi ng’ekyo kifaananie bufaananie ekitasobola kweyamba kyene, aye kye bali n’okuyamba obuyambe. 17Aye ensoni tidhimugema kusaba kintu ekyo ekiziramu bulamu, kimuyambe afune obufumbo, abaana, n’obukombe. 18Kyene kinafu, aye yaakisaba kimughe amaani. Kifu, aye yaakisaba kimughe obulamu. Kizira bumanhirivu bwonabwona, aye yaakisaba kimuyambe. Tikighanga kuva mu kifo kutambula, aye yaakisaba olugendo lwe lube lulungi. 19Kizira maani mu mikono gyakyo aye yaakisaba kimuyambe okukola emirimo, afune empiiya, era abe wa nkabi mu buli ky’akola.