12
1Omwoyo gwo ogutafa gubibaamu byonabyona. 2Kale kyova ogalagira mpolampola abo abakola ebibi, waabooleka ensobi dhaibwe era waabalabula balekeyo emize gyaibwe emibi, bakwesige iwe Musengwa.
Ebibi eby’Abakanaani
3Abantu abaabanga mu nsi yo entukuvu mu biseera eby’eira 4wabakyagha olw’okuba baakolanga ebintu ebyenhinhalwa. Baakolanga eby’obulogo, n’emikolo egitali mitukuvu. 5Nga baita abaana baibwe aghazira kusaasira naire, baalya emamba ey’abantu, baanhwa n’omusaayi. Baajanga mu mikolo egikolebwa abatatya Katonda, 6abazaire mwe baitiranga abaana baibwe beene abataasobolanga kwerwanaku naire. Kyewava n’oyenda badhaadha baife bazikirize abantu abo, 7olwo ensi esinga kuba ya mughendo y’oli mu nsi dhoonadhoona esobole okubaamu eighanga ery’abagheereza bo abagwaine. 8Aye era n’abo boona wabagemerwa ekivunika, olw’okuba boona baali bantu buntu. Waabasindikira amalumba gaaziinhuuka geesookangayo eigye lyo, gaje nga gabazikiriza mpolampola.12:8: Kuv 23:28 9Wali osobola okuganha abantu abakola ebituufu bazikirize mu lutalo abantu abo abatakutya. Oba wali osobola okubasaaniagho mu kaseera obuseera ng’obasindikaku ensolo edh’omu nsiko edhitiisa, oba ng’obadhuuka budhuuke n’ekibono kirala kiti ekikambwe. 10Aye mu kifo ky’ebyo, wabasalira omusango mpolampola, waabagha akaghagaanhia ak’okwenenia. Ate nga wali okiidhi bukalamu nga baali basimuka mu lulyo olukozi olw’ebibi, nga baazaalibwa nga boonoonefu era nga tibasobola kukyusa mu ndowooza yaibwe naire.12:10: 2 Esid 9:11 11Eighanga lyaibwe lyonalyona kuviira irala mu mainhama nga liriku ekikolimo, aye iwe wabaleka nga tobabonereiza lwa bibi byaibwe, waire nga ghaali ghaziragho muntu yeenayeena eyakulobera okubabonereza.
Katonda ni yenka ow’obuyinza
12Naani asobola okukubuuza iwe Musengwa ati: “Okoze ki kino?” Oba okukutakania mu nsambo y’osaliramu abantu omusango? Naani asobola okwidha mu maiso go n’awolereza abantu abo ababi? Oba okukuvunaana olw’okuzikiriza abantu be watonda? 13Ebintu byonabyona niiwe obirabirira, era ezirayo katonda wundi y’oteekwa kwinhonhola nga weewozaaku olw’ekyo ky’oba osazeegho. 14Ezira kyabazinga oba mufuzi wundi yeenayeena ku nsi, asobola kukuwozesa olw’abo b’ozikiriza. 15Oli mutuufu era ofugira ebintu byonabyona mu butuufu. Tokozesangaku buyinza bwo kusalira muntu musango kumusinga nga tagwaniire kubonerezebwa. 16Mu maani go n’omuli ensimuko ey’okukola amazima. Era olw’okuba niiwe Musengwa wa boonaboona, osobola okwoleka okusaasira eri buli muntu. 17Oyolesa amaani go, abantu bwe baba nga bali kugabuusabuusaamu era waabonereza oyo yeenayeena aba ng’aidhi bukalamu obuyinza bwo aye n’akana n’abunhooma obunhoome. 18Waire ng’obuyinza bwo tibutuukikaku, aye oli mulamuzi asaasira. Wandibaire osobola okukozesa obuyinza bwo okutubonereza nga bw’oyenda, aye otufuga n’okuguminkiriza okutaloodheka.
19Mu by’okola oyegeresa abantu bo, oti omuntu akola ebituufu ateekwa n’okuba ow’ekivunika. Oghaire abantu bo eisuubi einene, olw’okuba obaganha okwenenia ebibi byaibwe. 20Waire abazigu b’abantu bo baali bagwaniire kufa, iwe wali mwegendereza inho waabaguminkiriza, waabagha ekiseera okulekayo ebibi byaibwe. 21Aye waasalira abantu ababo ku bubwo omusango n’obukambwe, waire nga wakola endagaano ni badhaadha baibwe, waabasuubiza ng’olayira okubaghanga ebintu ebirungi.
22Bwenebwene otubonereza, aye ate obonereza abazigu baife emikuzi egighera omutwalo mulamba (10,000) okusingagho. Olwo kibe nti bwe tuba tuli kusalira bantu banaife omusango, twidhukira obulungi bwo. Ate n’ife beene twena bwe baba bali kutusalira omusango, tube nga tusuubirayo okusaasirwa.
Okubonereza Abamisiri
23Kale kyewava n’otuusa akabi akataloodheka ku abo abaali abasiru, abaakolanga ebibi. Waabatuusaaku akabi ako ng’okozesa ebintu ebyo byene bye baasinzanga ebyenhinhalwa 24kuba baali nga badaaliimye inho, nga baviire ku mazima. Nga basinza ebisolo ebisinga kukyayibwa na kutiisa, era nga balimbibwalimbibwa mangu ng’oti se baana bato beene. 25Kale waabasalira omusango olw’obusiru bwaibwe, era waababonereza ng’abaziramu kategeera naire. 26Kyali kibonerezo kyangu, aye abo abatafaayo ku kulabulwa ng’oti n’okwo baba beereeteire okugwanira Katonda abasalire omusango n’obukambwe. 27Bwe baabonerezebwa ebitonde ebyo, beene bye baatwalanga okuba nga bakatonda, baaswala inho. Olwo baakizuula nti Katonda omutuufu n’oyo ye babairenga baloba okwikiriza. Kyebaava ni bafuna ekibonerezo ekisingagho obunene.